ସ୍ନାନ ମଣ୍ଡପରେ ଶ୍ରୀଜୀଉ
କବି ସୌରଭ ବୈଜୟନ୍ତୀ ମାଳା ମହାପାତ୍ର
ବାର ମାସେ ତେର ଯାତରା ତୁମର
ହୋଇଥାଏ ହେ ଠାକୁର,
ଜ୍ୟେଷ୍ଠ ପୂର୍ଣ୍ଣିମାରେ ସ୍ନାନ ଯାତରାରେ
ଶୋଭାଟି ଅତି ମଧୁର ll୦ll
ଦିଶ କି ସୁନ୍ଦର ସ୍ନାନ ମଣ୍ଡପର
ଭାଇ ଭଉଣୀକୁ ନେଇ
ଶହେ ଆଠ ଗରା ଗାଧୋଇବ ପରା
ତୁମେ ହେ ଜଗତ ସାଇଁ
ଧନ୍ୟ ତୁମ ଲୀଳା ଆହେ ଚକାଡୋଳା
କି ବର୍ଣିବି ନର ଛାର….(୧)
ଧରି ହାତୀ ବେଶ ଆହେ ଜଗଦୀଶ
ଭକତେ ଦେବ ଦର୍ଶନ
ପାପ ତାପ ହରି ତୁମେ ହେ ମୁରାରି
ହୋଇଛ ପରା ମହାନ
ତୁମ ସରି କେହି ନାହିଁ ହେ ମଣିମା
ଏହି ମହୀ ମଣ୍ଡଳର….(୨)
ସୁନା କୂଅ ଜଳ ଆହେ ଆଦିମୂଳ
ଲାଗି ହେବ ତୁମେ ବୋଲି
ମା ଶୀତଳା ଦେବୀ ତୁମ କଥା ଭାବି
ଜଗି ଥିଲେ କୂଅ ଖାଲି
ଲୋକ କଥା ଶୁଣି କହୁଛି ସାଆନ୍ତେ
ଗଣା ମୁଁ ହେ ମୁରୁଖର……(୩)
କରି ତୁମେ ସ୍ନାନ ହେ ଜଗ ମୋହନ
ଅଣସରରେ ରହିବ
ତୁମ ବିନା ନାଥ ହୋଇବୁ ଅନାଥ
ଧରାକୁ କିଏ ରଖିବ
ଏତିକି ଗୁହାରି ଶୁଣିବ ଶ୍ରୀହରି
ଯତନ ନେବ ନିଜର ….(୪)
ଫୁଲବାଣୀ, କନ୍ଧମାଳ
