ଗାଧୁଆ ପୂନୀ
ମାହାପୁରୁ ହୋ ସତେ ଆଅ ତମେ କେଡ଼େ ଲବାର
ମାହାପୁରୁ ହୋ
ମାଏଝୀକେ ଛାଡି, ‘ଦିନ୍ ସାରା ଗାଧ୍ଲ’, (୩ ଥର)
ଇଥିଁ କାଏଁଯେ ନାଇଁ ହେବ ବେମାର। ମାହାପୁରୁ ହୋ
ତମର୍ ଭକତ୍ ଗଖା କମିହାଁ
ତମେ ପର୍ଭୁ ଘର୍ବସିଆଁ
ବଡ୍ଖା ଦଦାର୍ ସାଙ୍ଗେ, ‘ବୁହେନ୍କେ କାଏଁ ଧରି’ (୩ ଥର)
ତଅଁରା ତଅଁରି କେନ୍ତା ବେଭାର। ମାହାପୁରୁ ହୋ
ଅରନ୍ ଗେଫି ହେଲ ଭୁଷ୍କା
ଭୁଷ୍କା ଲୁକେ ଥିସନ୍ ଫସ୍କା
ଦୁହି ଡେନା ଧରି, ‘ଗୁଧାଲେ ପଁଡାମାନେ’ (୩ଥର)
ହେଇଗଲା ପର୍ଭୁ ଲସମ ଜର। ମାହାପୁରୁ ହୋ
ନାଇଁ ଡାକି ଲଖିଁମାତାକେ
ବାଟ ଚାହିଁ ଅଛନ୍ ତମ୍କେ
ବିର୍ହୁନ୍ ବାଢ଼ୁନ୍ ହେଉ କି, ‘ସୁନାର୍ ବାଢ଼ୁନ୍ ହଉ’ (୩ଥର)
ମାଏକି ଆଏଜ୍ ମିଲିଯିବା ପାହାର। ମାହାପୁରୁ ହୋ
ମାଏଝିକେ ଥିଲେ ହୋ ଡର
ସିଧା ରୁଥି ଯାଅ ବଏଦର୍ ଘର
ଉଷୋକଷା ପିଇ, ‘ ସିଧା ଲାଙ୍ଗ୍ଛାଟ୍ ହଇ'(୩ଥର)
ଶୁଇପଡ଼ ଲୁକି ଘର ଭିତର। ମାହାପୁରୁ ହୋ
ମାହାପୁରୁର୍ ହଗା କି ମୂତା
ଜାନି ପାରୁଥିସନ୍ ଦେବ୍ତା
ସେ କଥାକେ ଆମେ ‘କେଭେଁ ନାଇଁ ପାସ୍ରୁଁ'(୩ଥର)
ଆମର୍ ଲାଗି ବନି ଯାଏସି ତିହାର। ମାହାପୁରୁ ହୋ
ଗଅଁଲିଆ କବି ସୁଧୀର୍ ପଂଡା
