ରଜ ପରବ
ବଣରେ ମହକେ ମଲ୍ଲୀ
ରଜ ପରବଟି ଆସିଛି ବୋଲି
ଆସିଛି ବୋଲି ଲୋ
ଆନନ୍ଦ ପସରା ମେଲି।।
ଭଅଁର ଫୁଲେ ବସିଲା
ଉତ୍ସାହରେ ପୁର ପଲ୍ଲୀ ଉଠିଲା
ପଲ୍ଲୀ ଉଠିଲା ଲୋ
ମୌସୁମୀ କାନେ କହିଲା।।
ଚକୁଳି ଆରିସା ପିଠା
ତା ସାଥେ ସୁଆଦ ସେ ପୋଡପିଠା
ସେ ପୋଡପିଠା ଲୋ
ରଜ ପାନ ମିଠା ମିଠା।।
ସାଙ୍ଗ ସାଥି ମିଶି ଆଜ
ଝିଅ ବୋହୁ ସବୁ ପାଳିବେ ରଜ
ପାଳିବେ ରଜ ଲୋ
ହୋଇ ନୂଆ ସଜବାଜ।।
ଚନ୍ଦନ କୁଙ୍କୁମ ନାଇ
ନୂଆ ଶାଢୀ ପିନ୍ଧି ସଜାଇ ହୋଇ
ସଜାଇ ହୋଇ ଲୋ
ଖେଳିବେ ଆନନ୍ଦ ହୋଇ।।
ପାଦରେ ସରୁ ଅଳତା
ଲଗାଇ ହୁଅ ଲୋ ସାଙ୍ଗ ସରିତା
ସାଙ୍ଗ ସରିତା ଲୋ
କି ସୁନ୍ଦର ନାଲି ଚିତା।।
ଗାଆଁ ଆମ୍ବ ତୋଟା ପୁରି
ଝିଅ ବୋହୁ ମିଶି ଖେଳନ୍ତି ଦୋଳି
ଖେଳନ୍ତି ଦୋଳି ଲୋ
ରଜଯେ ଆସିଛି ବୋଲି।।
ବରଷକେ ଥରେ ରଜ
ଆଣିଛି ତା ସାଥେ କେତେ ମଉଜ
କେତେ ମଉଜ ଲୋ
କୁଆଁରି କୁମୁଦ ସଜ।।