ଜୁନାଗଡ଼,୨୩/୬(ମ ନି ସ) କଳାହାଣ୍ଡି ଜିଲ୍ଲା ଜୁନାଗଡ଼ ବିଇଓ କାର୍ଯ୍ୟଳୟ ଏବେ ଜଣେ ପିଅନଙ୍କ କବଜାରେ । ଅଧିକାରୀ ଓ କର୍ମଚାରୀମାନେ କାର୍ଯ୍ୟାଳୟକୁ ମନଇଚ୍ଛା ଯିବା ଆସିବା କରୁଥିବା ଯୋଗୁଁ ସାଧାରଣରେ ଉଦବେଗ ପ୍ରକାଶ ପାଇଛି । ଦିନ ୧୧ ଟା ହେଲେ କିରାଣି ବାବୁ ଓ ଏହି ପିଅନ ଅଫିସ ଆସି ପୁଣି ୩ ଟା ରେ ଫେରାର ମାରୁଛନ୍ତି । ଫଳରେ ସାଧାରଣରେ ଉଦବେଗର ବିଷୟ ହୋଇଛି । ପ୍ରାପ୍ତ ସୂଚନାରୁ ପ୍ରକାଶ ଯେ , କଳାହାଣ୍ଡି ଜିଲ୍ଲା ଜୁନାଗଡ଼ ଗୋଷ୍ଠୀଶିକ୍ଷା ଅଧିକାରୀ କାର୍ଯ୍ୟାଳୟ ବା ବିଇଓ ଅଫିସରେ ଜଣେ ବିଇଓ, ୩ଟି ଏବିଇଓ,୩ ଟି କିରାଣୀ, ୨ଟି ଡିଇଓ, ୨ଟି ଆକାଉଣ୍ଟଟେଣ୍ଟ, ୨ଟି ବିଆରପି, ଗୋଟିଏ ଏମଆଇଏସ ଓ ୩ ଟି ପିଅନ ଅଛନ୍ତି । 
ବର୍ତ୍ତମାନ ଦୁଇଟି ପିଅନ ଡେପୁଟେସନରୁ ଆସିଥିବା ବେଳେ ଆଉ ଜଣେ ରେଗୁଲାର ପିଅନ ଅଛନ୍ତି । ଏହି ରେଗୁଲାର ପିଅନଙ୍କ ହାତରେ ବିଇଓ ଅଫିସର ରିମୋଟ ଥିବା ନେଇ ଅଭିଯୋଗ ହୋଇଛି । ଏହି ପିଅନ ହିଁ କେଉଁ ଶିକ୍ଷକକୁ କେଉଁଠି ବଦଳି କରାଯିବ ଓ କାହାକୁ କେଉଁ ଦାୟିତ୍ୱ ପ୍ରଦାନ କରାଯିବ ତାହାର ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥାନ୍ତି । ବିଇଓ କାର୍ଯ୍ୟାଳୟରେ ଦୁଇଜଣ ଡେପୁଟେସନ ପିଅନ ପ୍ରଥମେ ଆସି ଅଫିସ ଖୋଲିବା ସହିତ ସଫା ସୁତରା କରିଥାନ୍ତି । ପରେ ଡାଟାଏଣ୍ଟ୍ରି ଅପରେଟରମାନେ ଆସିଥାନ୍ତି । ଛୋଟିଆ କର୍ମଚାରୀମାନେ ଚାକିରୀ ଭୟରେ ଶୀଘ୍ର ଶୀଘ୍ର ଅଫିସକୁ ଆସୁଥିବା ବେଳେ କିରାଣୀବାବୁମାନେ ଓ ସେହି ପିଅନ ବାବୁ ୧୧ ରୁ ୧୨ ଟା ସମୟରେ ଅଫିସ ଦୁଆର ମାଡି ଥାନ୍ତି । ମହିଳା ବିଇଓଙ୍କୁ ଢାଲ କରି ନିଜର ସମ୍ରାଜ୍ୟ ବିସ୍ତାର କରୁଛନ୍ତି ଏହି କର୍ମଚାରୀ ମାନେ । ଲେଟ ରେ ଆସୁଥିବା ନେଇ ଆଗରୁ ମଧ୍ୟ ଏମାନଙ୍କ ନାମରେ ଅନେକଥର ଅଭିଯୋଗ ହୋଇଛି । ହେଲେ ଅଭିଯୋଗ ପରେ ଗୋଟିଏ କି ଦୁଇଦିନ ଠିକ ସମୟରେ ଆସି ପୁଣିଥରେ ସେ ୧୧ ଟା ସମୟରେ ଆସୁଥିବା ଅଭିଯୋଗ ହୋଇଛି । ଶିକ୍ଷା ବିଭାଗର ଅଧିକାରୀ ମାନେ କେବେ ବି ଏହି ଅଫିସକୁ ତଦନ୍ତ ପାଇଁ ଆସୁନଥିବା ଯୋଗୁଁ ଅଫିସରେ ପିଅନ ମଧ୍ୟ ବିଇଓଙ୍କ ଠାରୁ ଅଧିକ ବଲବାନ ହେଉଛନ୍ତି । ଏନେଇ ଜିଲ୍ଲା ଶିକ୍ଷା ଅଧିକାରୀଙ୍କୁ ପଚରିବାରୁ ଆମେ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବୁ ବୋଲି ପ୍ରତିକ୍ରିୟାରେ କହିଥିଲେ।
ଜୁନାଗଡ଼ ରୁ ନରେନ୍ଦ୍ର ଖିତି ଙ୍କ ରିପୋର୍ଟ ।
