ଟେମରି (ମ. ନି. ସ ):-ଓଡିଶାର ଆରାଧ୍ୟ ଦେବତା ହେଉଛନ୍ତି ମହାପ୍ରଭୁ ଶ୍ରୀ ଶ୍ରୀ ଜଗନ୍ନାଥ l ମହାପ୍ରଭୁ ଜଗନ୍ନାଥ ଜାତି, ଧର୍ମ, ଛୁଆଁ ଅଛୁଆଁ ନିର୍ବିଶେଷରେ ଓଡିଶାର ପୁରୀଧାମ ଶ୍ରୀକ୍ଷେତ୍ରଠାରୁ ଗାଁ ଗଣ୍ଡା, ପୁର ପଲ୍ଲୀରେ ବିଭିନ୍ନ ସ୍ଥାନରେ ଶ୍ରୀ ଶ୍ରୀ ଜଗନ୍ନାଥ ମନ୍ଦିର ପ୍ରତିଷ୍ଠିତ l ମହାପ୍ରଭୁ ଜଗନ୍ନାଥ ସର୍ବଧର୍ମର ପ୍ରତୀକ l ଗୋଲାମୁଣ୍ଡା ବ୍ଲକର ଚିଚିଆ ଗ୍ରାମର ଲୋକମାନେ ଦୀର୍ଘ ଦିନରୁ ତାଙ୍କର ପୂଜା ଅର୍ଚନା କରି ଆସୁ ଥିଲେ l କିନ୍ତୁ ମନ୍ଦିରଟିଏ ତୁଳିବା ଓ ପ୍ରତିଷ୍ଠା କରିବା ଅଭିଳାଷ ଅବଶୋଷ କାରଣ ପାଲଟିଥିଲା l ଆଜି ଗ୍ରାମବାସୀଙ୍କ ଏକତା ଓ ସହଯୋଗ କ୍ରମେ ଶ୍ରୀ ଶ୍ରୀ ଜଗନ୍ନାଥ ମହାପ୍ରଭୁଙ୍କ ବିଗ୍ରହ ସ୍ଥାପନ ଓ ମନ୍ଦିର ପ୍ରତିଷ୍ଠା ହୋଇଯାଇଛି l ଭକ୍ତବୃନ୍ଦ ଗ୍ରାମବାସୀ ଓ ଅଂଚଳବାସୀଙ୍କ ମୁହଁରେ ହସର ଲହରୀ ଖେଳି ଯାଇଛି l ଗ୍ରାମ ଆଜି ଭଜନ, କୀର୍ତ୍ତନ, ଶଙ୍ଖ, ହୁଳହୁଳି ନାଦରେ ଉଛୁଳି ଉଠିଛି l ତା23/06/2022ରେ ବିଗ୍ରହ ସ୍ଥାପନ ଓ ମନ୍ଦିର ପ୍ରତିଷ୍ଠା କରାଯାଇ ଥିବା ବେଳେ ତା 24/06/2022 ରେ ଅଷ୍ଟ ପ୍ରହର ନାମ ଯଜ୍ଞ ଆୟୋଜନ କରାଯାଇଛି l ଏଥିରେ କର୍ତ୍ତା ଭାବରେ ଚିଚିଆ ଗ୍ରାମର ଗଜାନନ ମୁଣ୍ଡ ଓ ତାଙ୍କ ଧର୍ମପତ୍ନୀ ଲକ୍ଷ୍ମୀପ୍ରିୟା ମୁଣ୍ଡ , ପୂଜକ ଭାବରେ ପଣ୍ଡିତ ଜଗଦୀଶ ଠାକୁର ସମସ୍ତ ପୂଜା କାର୍ଯ୍ୟ ତୁଲାଇ ଥିବାବେଳେ ବିଭିନ୍ନ କାର୍ଯ୍ୟରେ ଗ୍ରାମବାସୀ ସହଯୋଗ କରିଥିଲେ l
ଜଗଜ୍ଜୀବନ ସାଙ୍କ ରିପୋର୍ଟ
