ନିବେଦନ
ଜ୍ୟୋତ୍ସ୍ନା ରାଣୀ ଦେବୀ
ଆହେ ଲୀଳାମୟ ଆନନ୍ଦ ନିଳୟ ନୀଳନୀଳ କଳେବର
ନୀଳାଦ୍ରି ଭୂଷଣ ନୀଳ ସମ୍ମୋହନ ସୌମ୍ୟକାନ୍ତି ବଳୀୟାର
ହେ ଛନ୍ଦାପୟର ଧରିନିଅ କର ବାହୁଡା ବିଜୟ ସାରି
କମନୀୟ କାନ୍ତି ତେଜସ୍କର ଭାନ୍ତି ଦେଖିବାକୂ ମନ ଭାରି ।
ଚିତ୍ରିତ ସୁଷମ ତୁମେ ଅନୁପମ ଅଦ୍ଵିତୀୟ ଆଦିନାଥ
ପରମପୁରୁଷ ନ ହୁଅ ବିରସ ଧରି ସୁଦର୍ଶନ ଅସ୍ତ୍ର
ଛେଦିଦିଅ ପ୍ରଭୁ ସକଳ ଅନ୍ଧାର ଯେତେଯେତେ କଳାଛିଟା
ପୋଛି ନେଇଯାଅ ତମସାର ତୀରୁ ପକାଇ ନବୀନ ଭଟ୍ଟା ।
ହାତଟେକି ସବୁ ସ୍ଵଦେହୀ ବିଦେହୀ ରହିଛନ୍ତି ଅନୁକ୍ଷଣେ
ହେ ଅଦୃଶ୍ୟ ହାତ ତୁମରି ଇଙ୍ଗିତ ମାରେ ତାରେ ପ୍ରତିକ୍ଷଣେ ।
ହେ ସତ୍ୟ ସୁନ୍ଦର ଦିବ୍ୟ ରଙ୍ଗମଞ୍ଚ ତିଆରିଛ ନିଜ ହାତେ
ଅସୂୟା ଅନ୍ଧାର ଘୋଟିଆସେ ଘୋର ପ୍ରଶାନ୍ତିର ଚଲାପଥେ ।
ତୁମ ତ ବାଟୋଇ ଆମେ ତ ବାଟୋଇ ଆଜି ଏଇ ଧରାଧାମେ
ହାତଧରି ନିଅ ସାଥେ ରଖିଥାଅ ଫେରନ୍ତା ର ଏହି ଭୂମେ ।
ବ୍ରହ୍ମପୁର, ଗଂଜାମ
