ନୀଳାଦ୍ରି ବିଜେ କରିବ
(ଗୀତି କବିତା)
ଜୟ ଶ୍ରୀ ଜଗନ୍ନାଥ ମହାପ୍ରଭୁ
କବି ସୌରଭ ବୈଜୟନ୍ତୀ ମାଳା ମହାପାତ୍ର
ମହାପ୍ରଭୁ ତୁମ ଲୀଳା ହେ ଅପାର
ତୁମ ଠୁ କିଏ ବଳିବ,
ଛଳିଆ କାଳିଆ ମନ ମୋହନିଆ
ନୀଳାଦ୍ରି ବିଜେ କରିବ…….(୦)
ଶ୍ରୀହୀନ ଦିଶୁଛି ଶ୍ରୀମନ୍ଦିର ପୁଣି
ରତ୍ନ ସିଂହାସନ ଖାଲି
ମାଉସୀ ଘରକୁ ଗଲ ହେ ମଣିମା
ବରଷକେ ଥରେ ବୁଲି
ଠକି ଦେଇଗଲ ପଡ଼ିଦାତ୍ରୀଙ୍କୁ ହେ
ତୁମେ ଭଳି କିଏ ହେବ………(୧)
ଗୋଡ଼ାଇଲେ ତୁମେ ଦୂରେଇ ଯାଉଛ
ଏବେ କି କରିବ ପୁଣି
ଲକ୍ଷ୍ମୀ ରୁଷିଛନ୍ତି ମାନ କରିଛନ୍ତି
କି କରିବ କମ୍ବୁପାଣି
ରସଗୋଲା ଖୋଇ ପାଟ ଶାଢ଼ୀ ଦେଇ
ମିଛରେ ମନ ମୋହିବ…..(୨)
ନାମ ଟି କାଳିଆ ବୁଦ୍ଧିରେ ଛଳିଆ
କପଟିଆ ତୁମେ ନାଥ
ରାଧାଙ୍କୁ ଠକିଛ ସୀତାଙ୍କୁ ଛାଡିଛ
କରି ହେ ତାଙ୍କୁ ଅନାଥ
ମାଆ ସାଆନ୍ତାଣୀ ଲକ୍ଷ୍ମୀ ଠାକୁରାଣୀ
ହୃଦୟକୁ ହେ ଚିହ୍ନିବ……..(୩)
ଭକତ ବାନ୍ଧବ ହେ କଳା ମାଧବ
ତୁମ ଲୀଳା ହେ ଅପାର
ଜଗତର ହିତ ପାଇଁ ତୁମେ ପ୍ରଭୁ
ସହି ଅଛ ଦୁଃଖ ଘୋର
ଧରମ ରକ୍ଷକ ହେ ରମା ନାୟକ
ରକ୍ଷା କର ଏହି ଭବ ……(୪)
ଫୁଲବାଣୀ, କନ୍ଧମାଳ
