ନୀଳାଦ୍ରି ବିଜେ 

ନିଳାଚଳ ନାଥ ପ୍ରଭୁ ଜଗନ୍ନାଥ

         ଜଗତ ମାଲିକ ତୁମେ

ତୁମରି ଲୀଳାକୁ କିଏବା ବୁଝିବ

         ଛାର ମାନବ ହେ ଆମେ ॥

ବାରମାସେ ତେର ପରବ ତୁମର

           ଜଗତକୁ ଶିକ୍ଷା ପାଇଁ

ସସ୍କାର ସଂସ୍କୃତି ସାମ୍ୟ ମୈତ୍ରୀ ପ୍ରୀତି

             ଶାନ୍ତି ମୁକ୍ତି ପଥ ଦେଇ ॥

ଦ୍ଵାଦଶ ଉତ୍ସବ ମଧ୍ୟରେ ଗୁଣ୍ଡିଚା

              ମହାନ ପର୍ବ ତୁମର

ରଥେ ତୁ ବାମନ ଦରଶନ ଦେଇ

              ପତିତ ଜନେ ଉଦ୍ଧାର ॥

କଥା ଦେଇ ମାତା ଗୁଣ୍ଡିଚା ରାଣୀଙ୍କୁ

             ଜନମ ବେଦୀକୁ ଗଲ

ଆର୍ଦ୍ଧାଶନୀଙ୍କର ପୋଡ଼ପିଠା ଖାଇ

              ମାଉସୀ ମନ ତୋଷିଲ ॥

ହେରା ପଞ୍ଚମୀରେ ଲକ୍ଷ୍ମୀଙ୍କ କୋପରୁ

            ବାହୁଡ଼ିବା ଆଜ୍ଞା ଦେଲେ

ନବଦିନାତ୍ମକ ଯାତରାକୁ ସାରି

             ବାହୁଡ଼ା ବିଜେ କରିଲ ॥

ଚତୁର୍ଦ୍ଧା ମୂରତି ରଥେ ପଥେ ଆସି

            ସିଂହଦ୍ଵାରେ ଅଟକିଲ

ସୁନାବେଶ ସାରି ଅଧରପଣାରେ

              ଜଗତକୁ ତୋଷ କଲ ॥

ସଂସାରୀ ମାନବ ପରି ଲୀଳା କରି

            ମା’ ମାନ ତୁଟାଇଲ

ଚାହାଣୀ ମଣ୍ଡପେ ରସଗୋଲା ଦେଇ

             ପତ୍ନୀ ମନ କିଣି ନେଲ ॥

ଗୋଟି ପହୁଣ୍ଡିରେ ତ୍ରୟୋଦଶୀ ଦିନେ

             ନିଳାଦ୍ରି ବିଜେ କରିଲ

ଜନମ ବେଦୀରୁ ରତନ ବେଦୀକୁ

            ସଭିଏଁ ଫେରି ଆସିଲ ॥

ମାର୍ଜନା ହୁଅଇ ରତ୍ନ ସିଂହାସନ

           ନୀଳଚକ୍ରେ ଲାଗେ ବାନା

ହରିଙ୍କ ଶୟନ ଆରମ୍ଭ ହୁଅଇ

           ଏହା ପରଠାରୁ ସିନା ॥

ନୀଳାଦ୍ରି ବିହାରୀ ଶୁଣ ଚିତ୍ତ ଡେରି

         ଅଧମ କରେ ଗୁହାରୀ

ଜଗତର ଦୁଃଖ ଶୋକ ଦୂର କରି

         ନିଅ ସୁପଥେ ଶ୍ରୀହରୀ ॥

ରତିନାରାୟଣ ରାଉତ 

ହରିଚନ୍ଦନପୁର,କେନ୍ଦୁଝର,ଓଡ଼ିଶା