ଚତୁର୍ଥ ସ୍ତମ୍ଭ
ନିରୁପମା ପାଣି
ଚତୁର୍ଥ ସ୍ତମ୍ଭ ଯେ ଖମ୍ବ ପାଲଟିଲେ
ପାଟିରେ ପକେଇପଟି
କଳା କାରବାର ଦୁନିଆ ନଜାଣୁ
ଇସ୍କୁଲ୍ ଭିତର କିର୍ତ୍ତୀ ।।
ଦମ୍ଭ ହଲିଗଲା ବଡ ବଡିଆଙ୍କ
ଭୟରେ ବାଟ କାଢିଲେ
ସାମ୍ବାଦିକ ଆଉ ସତ ନଦେଖିବେ
ଇସ୍କୁଲୁ ବାହାରେ ଥିଲେ ।।
ପଚାଅଣ୍ଡା ଯାକ ପୋକା ଡାଲି ସହ
ଗମୁଆ ଚାଉଳ ଭାତ
ଖାଇ ଆମ ପିଲା ବଢିବେ ପଢିବେ
ଧନ୍ୟ ସେ ଦାତାଙ୍କ ହାତ ।।
ହ୍ୟାଣ୍ଡୱାସ୍ ଡବା ଖାଲି ପଡିଥିବ
ଡବା ଥିବ ପତିଆରା
ପିଲାଙ୍କ ହାତରେ ରୋଷେଇ ହୋଇବ
ନଦେଖିଲେ କେହି ଗଲା ।।
ଅଫିସି ଭିତରେ ମଧୁର ଆଳାପ
ଦିଦିଙ୍କ ସହିତ ସାର୍
ପିଲା ଖେଳୁଥିବେ ଏଣେ ତେଣେ ବୁଲି
କହିବାକୁ କାହା ଜୋର୍ ।।
ଚତୁର୍ଥ ସ୍ତମ୍ଭଙ୍କୁ ଭାରି ଡରୁଛନ୍ତି
ବୋଧେ ଆମ ସରକାର
ସେ ଲାଗି ବାରଣ ହେଲା ସେମାନଙ୍କୁ
ହତା ଯେ ବିଦ୍ୟାଳୟର ।।
ଚାନ୍ଦବାଲି , ଭଦ୍ରକ
