କୋଷାଗୁମୁଡା : ନବରଙ୍ଗପୁର ଜିଲ୍ଲାରେ ଗତ ଦୁଇ ସପ୍ତାହ ହେଲା ଲଗାଣ ବର୍ଷା ଜାରୀରହିଛି । ପ୍ରବଳ ବର୍ଷା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଜିଲ୍ଲାର କୋଷାଗୁମୁଡା ବ୍ଲକରେ ରେକର୍ଡ ସଂଖ୍ୟକ ବର୍ଷା ହେବା ଯୋଗୁଁ ବିଭିନ୍ନ ସ୍ଥାନରେ ବର୍ଷା ଜଳ ଜମିରହୁଛି । ଏମିତି ଏକ ପ୍ରରିସ୍ଥିତି ଦେଖିବାକୁ ମିଳିଛି କୋଡ଼ିଙ୍ଗା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଠାରେ । ଗତ କାଲି କୋଡ଼ିଙ୍ଗା ଗ୍ରାମରେ ପ୍ରବଳ ବର୍ଷା ହେବା ଯୋଗୁଁ ମେଡ଼ିକାଲ ଭିତରେ ବର୍ଷା ଜଳ ଜମି କୁତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା । କୋଡ଼ିଙ୍ଗା – ପାପଡାହାଣ୍ଡି ମୁଖ୍ୟ ରାସ୍ତା କୁ ଲାଗି କୋଡ଼ିଙ୍ଗା ମେଡିକାଲ ରହିଛି । ରାସ୍ତା ନିର୍ମାଣ କାର୍ଯ୍ୟ ସମୟରେ ରାସ୍ତାର ଉଭୟ ପାର୍ଶ୍ଵ ରେ ଡ୍ରେନେଜ ବ୍ୟବସ୍ଥା କରାଯାଇଥିଲା । କିନ୍ତୁ ଉକ୍ତ ଡ୍ରେନେଜ ଗୁଡ଼ିକ ଧୀରେ ଧୀରେ ପୋତି ହୋଇଯାଇଥିଲା । ଯଦ୍ୱାରା କି ବର୍ଷା ପାଣି ନିଷ୍କାସନ ନହୋଇ ରାସ୍ତାର ଉଭୟ ପାର୍ଶ୍ଵ ରେ ଥିବା ଦୋକାନ , ସରକାରୀ କାର୍ଯ୍ୟାଳୟ ଭିତରେ ପାଣି ଜମିରହୁଛି । ଗତ ଦୁଇ ଦିନର ଲଗାଣ ବର୍ଷାରେ କୋଡ଼ିଙ୍ଗା ମେଡ଼ିକାଲ ଭିତରେ ପାଣି ଜମିଯିବାରୁ ରୋଗୀ , ସ୍ୱାସ୍ଥ୍ୟ କର୍ମଚାରୀ ଯିବା ଆସିବା ରେ ଅସୁବିଧା ଭୋଗିଥିବା ଦେଖିବାକୁ ମିଳିଥିଲା । ଏଣୁ ଜିଲ୍ଲା ପ୍ରଶାସନ ପକ୍ଷରୁ ଏଥିପ୍ରତି ଦୃଷ୍ଟି ଦେଇ ଡ୍ରେନେଜ ବ୍ୟବସ୍ଥା ଗ୍ରହଣ କରିବା ପାଇଁ ସାଧାରଣରେ ଦାବି ହୋଇଛି ।
କୋଷାଗୁମୁଡା ରୁ ମହେନ୍ଦ୍ର ବିଶୋଇ ଙ୍କ ରିପୋର୍ଟ
