ହୃଦୟର ଜଣାଣ
ଜୟ ଶ୍ରୀ ଜଗନ୍ନାଥ ମହାପ୍ରଭୁ
କବି ସୌରଭ ବୈଜୟନ୍ତୀ ମାଳା ମହାପାତ୍ର
ତୁଳସୀ କି କଲା ସୌଭାଗ୍ୟ ପାଇଲା
ମଥାରେ ତାକୁ ରଖିଲ
ଲକ୍ଷ୍ମୀ ସାଆନ୍ତାଣୀ ତୁମ ପାଟରାଣୀ
ସମ ସମତୁଲ କଲ
ତୁଳସୀକୁ ପୂଜା କରି,
ତୁମକୁ ପାଇବି ସାର୍ଥକ ହୋଇବି
ବୋଲି ଆଶା ହେ ମୁରାରି……(୧)
ରୀତି ନୀତି କାନ୍ତି ନ ଜାଣେ ଏ ମତି
ଜାଣେ ଏକା ତୁମ ନାମ
ଜନମ ମରଣ ସବୁର କାରଣ
ତୁମେ ହିଁ ତୁମେ ସକ୍ଷମ
ଅକ୍ଷମରେ ଗଣା ମୁହିଁ,
କ୍ଷମାର ସାଗର ନ କରିବ ପର
ତୁମେ ହେ ଜଗତ ସାଇଁ………(୨)
ଇଚ୍ଛାରେ ତୁମର ଏ ଜୀବନ ମୋର
ଚଳାଉଛ ଇଛାମୟ
ଇଚ୍ଛାକୁ ପୂରଣ କରି ଆର୍ତ୍ତତ୍ରାଣ
ରଖିବ ନୋହି ନିର୍ଦ୍ଦୟ
ତୁଳସୀର ମହିମାକୁ,
ନିତି ଗାଉଥିବି ସେବା କରୁଥିବି
ତୁମକୁ ହେ ପାଇବାକୁ…….(୩)
ଫୁଲବାଣୀ, କନ୍ଧମାଳ