କାହାକୁ ଦେବୁନି ଜଣେଇ

    ଜ୍ୟୋତ୍ସ୍ନା ରାଣୀ ଦେବୀ

କହ୍ନେଇ କହ୍ନେଇ ମୋ କଳାକହ୍ନେଇ

ଭଙ୍ଗା କୁଡିଆରେ ପାଦ ଦେଏ ଥରେ

   ରହିଛି ତୋତେ ରେ ଅନେଇ ।

କହ୍ନେଇ…..

ରଖିଛି କସ୍ତୁରୀ ଅଗୁରୁ ଚନ୍ଦନ

ଗୋରଚନା ଚିତା କାଟିବି ସୁଷମ

ତ୍ରିଭଙ୍ଗୀ ଠାଣିରେ ନାଚିନାଚି ଆ’

      ଚାହୁଁଥାଆ ଥରେ କଣେଇ ।

କହ୍ନେଇ….

ମୂରଲୀ ଫୁଙ୍କା ତୁ ଲବଣୀ ରସିଆ

କଦମ୍ଵ ଦୟଣା ତୁଳସୀ ବାସିଆ

ରଖିଛି ଲବଣୀ ଶିକାରେ ସାଇତି

    ଖୁଆଇଦେବିରେ ମନେଇ ।

କହ୍ନେଇ…….

ବାଛିବାଛି ରଖିଅଛି ମିଠାକୋଳି

ଶାଗଭାଜି ଭାତ ରଖିଛି ପଖାଳି

  ପୋଡ଼ପିଠା ଖିଆ ଆରେ ବନମାଳି

     ଆସି କହ କଥା ଖନେଇ ।

କହ୍ନେଇ……

ଶ୍ରୀମୁଖ ପଖାଳି ଦେହୁ ଝାଡି ଧୂଳି

  ଗେଲ କରିଦେବି ଆରେ ଗଳାମାଳି

କାଇଁଚମାଳିଆ ଶୁଆଇଦେବିରେ

   ନିଦ ତ ଆସିଲେ ଘନେଇ ।

କହ୍ନେଇ….

ହୃଦୟ କବାଟ ଦେଇଛି ରେ ଫେଡି

  ବସିଅଛି ଖାଲି କରପତ୍ର ଯୋଡି

ଭାବ ବିନୋଦିଆ ରେ ଚକାଆଖିଆ

    ମିଛ କହିବୁନି ବନେଇ ।

କହ୍ନେଇ….

ତୋର ମୋର ଭାବ କେ କାହୁଁ ଜାଣିବ

ପାରି କରିଦେବୁ ଏ ସଂସାର ନାବ

ସାଥେ ସାଥେ ଥିବୁ ଦୋଷ ନ ଧରିବୁ

 କାହାକୁ ଦେବୁନି ଜଣେଇ ।

କହ୍ନେଇ……

ବ୍ରହ୍ମପୁର, ଗଂଜାମ