ଭବାନୀପାଟଣା – ଆଗାମୀ ନିର୍ବାଚନକୁ ଦୃଷ୍ଟିରେ ରଖି ଯୁବ କମିଟି ପରେ ଏବେ ଛାତ୍ର ବିଜେଡି ସାଂଗଠନିକ ପରିବର୍ତ୍ତନ କରାଯାଇଛି। ରାଜ୍ୟ ବିଜେଡ଼ି ସଭାପତି ନବୀନ ପଟ୍ଟନାୟକଙ୍କ ଅନୁମୋଦନ କ୍ରମେ ଛାତ୍ର ସଂଗଠନକୁ ସୁଦୃଢ ଓ କ୍ରିୟାଶୀଳ କରିବା ପାଇଁ ଛାତ୍ର ବିଜେଡିର ରାଜ୍ୟ ସଭାପତି ଦେବୀ ରଞ୍ଜନ ତ୍ରିପାଠୀ ନୂତନ କର୍ମକର୍ତ୍ତାଙ୍କ ନାମ ଘୋଷଣା କରିଛନ୍ତି । 
ଏହି ନୂତନ କମିଟିରେ ପୂନର୍ବାର ଟାଣୁଆ ଛାତ୍ର ନେତା ଅବିନାଶ ଠାକୁରଙ୍କୁ ରାଜ୍ୟ ର କାର୍ଯ୍ୟକାରୀ ସଭାପତି ଭାବରେ ଦାୟିତ୍ଵ ଦିଆଯାଇଛି। ସେ ୨୦୦୯ ମସିହାରେ ଭବାନୀପାଟଣା ସ୍ଵୟଂଶାସିତ ମହାବିଦ୍ୟାଳୟ ଛାତ୍ର ସଂସଦ ସଭାପତି ଭାବରେ ନିଜର ରାଜନୈତିକ କ୍ୟାରିଅର ଆରମ୍ଭ କରିଥିଲେ । ପରେ ୩ଥର କଳାହାଣ୍ଡି ଜିଲ୍ଲା ଛାତ୍ର ବିଜେଡ଼ି ସଭାପତି ଓ ରାଜ୍ୟ ସାଧାରଣ ସମ୍ପାଦକ ଭଳି ଗୁରୁ ଦାୟିତ୍ବ ତୁଲାଇ ସାରିଛନ୍ତି। ତାଙ୍କର ସାଂଗଠନିକ କାର୍ଯ୍ୟଦକ୍ଷତା ଓ ନେତୃତ୍ବ ପାଇଁ ଆଜି ଦ୍ବିତୀୟ ଥର ବିଜୁ ଛାତ୍ର ଜନତା ଦଳର ରାଜ୍ୟ କାର୍ଯ୍ୟକାରୀ ସଭାପତି ଭାବରେ ଗୁରୁ ଦାୟିତ୍ବ ମିଳିଥିବାରୁ ସେ ମୁଖ୍ୟମନ୍ତ୍ରୀ, ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏବଂ ଜିଲ୍ଲା ର ସମସ୍ତ ନେତୃମଣ୍ଡଳୀ ଙ୍କୁ ଧନ୍ୟବାଦ ଓ କୃତଜ୍ଞତା ଜଣାଇଛନ୍ତି । 
ସେହିଭଳି ଛାତ୍ର ଜନତାର ନୂତନ କମିଟିରେ ଅଜିତ କୁମାର ସାହୁଙ୍କୁ କଳାହାଣ୍ଡି ଜିଲ୍ଲା ସଭାପତି ଦାୟିତ୍ୱ ମିଳି ଥିବାବେଳେ ଛାତ୍ର ନେତା ଅଭିଷେକ ମହାପାତ୍ର ଙ୍କୁ ରାଜ୍ୟ ଉପ ସଭାପତି , ଆଶିଷ ମହାପାତ୍ରଙ୍କୁ ସମ୍ପାଦକ, ଚିରାଗ ସିଂ ଦେଓ ଜୋନ ସଭାପତି ଦାୟିତ୍ବ ମିଳିଛି । ନୂତନ କମିଟିରେ କଳାହାଣ୍ଡି ଜିଲ୍ଲାର ଛାତ୍ର ନେତାମାନେ ସାମିଲ ହୋଇଥିବାରୁ ବିଭିନ୍ନ ମହଲରୁ ଶୁଭେଚ୍ଛା ଜଣାଇଛନ୍ତି।
କିଶନ ଶର୍ମା ଙ୍କ ରିପୋର୍ଟ
