ବ୍ଲକ ଅଧ୍ୟକ୍ଷା ଦେଖାଇଲେ ବଦାନ୍ୟତା, ଆମ୍ବୁଲାନ୍ସ ଡକାଇ ଆହତଙ୍କୁ ପଠାଇଲେ ହସ୍ପିଟାଲ
ଲାଞ୍ଜିଗଡ଼,୧୧/୦୫(ମ.ନି.ସ)-ଆଜି ସନ୍ଧ୍ୟା ସାତଟା ସମୟରେ ଲାଞ୍ଜିଗଡ ବ୍ଲକ କଦମ୍ବଗୁଡା-ନର୍ଲା ରାସ୍ତାର ଗୋବର୍ଦ୍ଧନପୁର ନିକଟରେ ଘଟିଛି ଏକ ପିକଅପ୍ ଦୁର୍ଘଟଣା । ମଦନପୁର ରାମପୁରରୁ ମୁଷାନାଳକୁ ବରଯାତ୍ରୀ ଯାଉଥିବାବେଳେ ପିକଅପ୍ ଗାଡିଟି ଦୁର୍ଘଟଣାଗ୍ରସ୍ତ ହୋଇଥିବାବେଳେ ଏଥିରେ ଛଅଜଣ ବରଯାତ୍ରୀ ଗୁରୁତର ଆହତ ହୋଇଛନ୍ତି । ଦୁର୍ଘଟଣା ପରେ ପିକଅପ ଗାଡିଟି ଆହତଙ୍କୁ ଛାଡି ଫେରାର ହୋଇଯାଇଥିଲା । ଗୋବର୍ଦ୍ଧନପୁର ଗସ୍ତରେ ଆସି ବିଶ୍ୱନାଥପୁର ଫେରୁଥିବା ସମୟରେ ଦୁର୍ଘଟଣାଗ୍ରସ୍ତ ଲୋକଙ୍କୁ ଦେଖି ଲାଞ୍ଜିଗଡ ବ୍ଲକ ଅଧ୍ୟକ୍ଷା କମଳା ପାତ୍ର, ତାଙ୍କ ସ୍ୱାମୀ ହରିଶ୍ଚନ୍ଦ୍ର ପାତ୍ର ତୁରନ୍ତ ନିଜ ଗାଡିରୁ ଓହ୍ଲାଇ ଆହତଙ୍କୁ ଉଦ୍ଧାର କରିବା ସହିତ ଦୁଇଟି ଆମ୍ବୁଲାନ୍ସ ଡକାଇ ଆହତମାନଙ୍କୁ ନର୍ଲା ହସ୍ପିଟାଲ ପଠାଇବା ବ୍ୟବସ୍ଥା କରିଥିଲେ । ଏହି ସମୟରେ ଗୋବର୍ଦ୍ଧନପୁର ନାଏବ ସରପଞ୍ଚ ସଞ୍ଜୀବ କୁମାର ପଣ୍ଡା, ସମାଜସେବୀ ପ୍ରସନ୍ନ କୁମାର ପରିଡା ମଧ୍ୟ ଆହତଙ୍କୁ ଉଦ୍ଧାର କରି ହସ୍ପିଟାଲ ପଠାଇବାରେ ସହାୟତା କରିଥିଲେ । ବ୍ଲକ ଅଧ୍ୟକ୍ଷା ଶ୍ରୀମତୀ ପାତ୍ର ଓ ତାଙ୍କ ସ୍ୱାମୀଙ୍କ ଏତାଦୃଶ ସେବା ମନୋବୃତ୍ତିକୁ ନେଇ ସାଧାରଣରେ ଚର୍ଚ୍ଚା ଆରମ୍ଭ ହୋଇଯାଇଥିବାବେଳେ ବିଭିନ୍ନ ମହଲରେ ପ୍ରଶଂସା କରାଯାଇଛି ।
ଲାଞ୍ଜିଗଡରୁ ସୁଶୀଲ କୁମାର ବାଗଙ୍କ ରିପୋର୍ଟ