କୃଷ୍ଣ କେଶବ

 କୁଞ୍ଚିତ କୁନ୍ତଳ କୃଷ୍ଣ ସୁମଞ୍ଜୁଳ

      କର୍ଣ୍ଣେ କନକ-କୁଣ୍ଡଳ 

 କୁରଙ୍ଗ ଚାହାଣି କଳାକୃଷ୍ଣ ମଣି 

   କାୟାରେ କେଶରୀ ବଳ |(୧)

କରେ ଧରି ବେଣୁ କୋଟି ହୃଦ ଜିଣୁ 

     କୁଞ୍ଜବନେ କରୁ କେଳି

କୌସ୍ତୁଭମଣ୍ଡନ କୃଷ୍ଣ ଶ୍ୟାମଘନ 

     କଳାକାହ୍ନୁ ବନମାଳି |(୨)

କାଶ୍ୟପୀର କୋଳେ କାଳିନ୍ଦୀର କୂଳେ

     କଦମ୍ବମୂଳେ ତୋ ଖେଳ

କାଞ୍ଚନ କଙ୍କଣ କର ଆଭୂଷଣ 

   କଟି କିଙ୍କିଣୀ ରେ ଭୋଳ |(୩)

କୋକନଦଧାରୀ କୃଷ୍ଣ ତୁ କଂସାରୀ

     କଞ୍ଜମାଳ ତୋ ଗଳାରେ 

 କରୁ ତୁ କୁହୁକ କଳ୍ପନା ଅନ୍ତକ

   କାଳୀୟ ଦଳନ ଗୋପରେ |(୪)

କମନୀୟା ପ୍ରିୟ କଳକଣ୍ଠି ପ୍ରିୟ 

      କଦମ୍ବମୂଳିଆ କୃଷ୍ଣ

କର ଯୋଡ଼ି କହେ କରୁଣାକର ହେ!

     କଞ୍ଜନୟନ ମୋହନ |(୫)

  କରୁଣାସାଗର କରୁଣା ବିତର

      କଟୁ ସର୍ବ ମୋହ ମାୟା ।

 କୁଷ୍ଣ କୃଷ୍ଣ ଭଜି କୃଷ୍ଣ ପ୍ରେମେ ମଜ୍ଜି 

   କୃତାର୍ଥ ହେଉ ଏ କାୟା |(୬)

କାୟ,,ବାକ୍ୟ,ମନ, ତୋତେ ସମର୍ପଣ

       କରେ ମୁଁ ପ୍ରିୟଦର୍ଶିନୀ

 କୃପାଳୁ କହ୍ନେଇ କୃଷ୍ଣ ନାମ ଗାଇ

     କଟୁ ମୋ କ୍ଷୁଦ୍ର ଜୀବନୀ |(୭)

ଶ୍ରୀମତୀ ପ୍ରିୟଦର୍ଶିନୀ ମିଶ୍ର

ଜୁନାଗଡ଼ ( କଳାହାଣ୍ଡି) 

ଜନ୍ମଭୂମି :-ମଣ୍ଡଳ ( ବଲାଙ୍ଗିର)