ହାଟ ସରିଗଲା ବାଟ ସରୁନାହିଁ
ଉପେନ୍ଦ୍ର କୁମାର ବସ୍ତିଆ
ହାଟ ସରିଗଲା ବାଟ ସରୁନାହିଁ
ସରିଗଲା କିଣାବିକା
ନଦୀ ସେପାରୀରୁ କିଏ ସେ କହୁଛି
ନିଜପାଇଁ ନିଜେ ଏକା ।
ହାଟର ସଉଦା ହାଟେ କରି ଗଦା
ଭାବୁଛି ମନରେ ବସି
ଯାହା ମୁଁ କିଣିଲି ଯାହା ମୁଁ ବିକିଲି
ଜାଣିଗଲି ଅଙ୍କ କଷି ।
ସୁଖଦୁଃଖ ପାପପୁଣ୍ୟ ଧର୍ମ ବଳ
ଅରଜିଲି ଯେତେ ଯାହା
ତହିଁରୁ କେବଳ ପୁଣ୍ୟ ଧର୍ମ ବଳ
ହୋଇବଟି ମୋର ସାହା ।
ଦିନ ସରିଗଲା ସଂଜ ଆସିଗଲା
ସରିଲା ସଂସାର ଖେଳ
କେତେ ମୁଁ ପାଇଲି କେତେ ହରାଇଲି
ଭାବୁଭାବୁ ଗଲା ବେଳ ।
ସଂସାର ସାଗର ପାରିହେବା ପାଇଁ
କୂଳରେ ହୋଇଛି ଠିଆ
ନାଉରୀ କହୁଛି କାହିଁକି ବିଳମ୍ବ
ଆ ରେ ହାଟୁଆ ଆ ।
ମାହାଯାତ୍ରା ତୋର ସଜା ହୋଇଲାଣି
କାଲି ହେବୁ ବାସି ମଡା
ପ୍ରିୟ ପ୍ରାଣପକ୍ଷୀ ଉଡିଗଲା ପରେ
ଆଉ କିବା ତୋର ଲୋଡା ।
ରାମନାମ ସତ୍ୟ ହରିନାମ ସତ୍ୟ
ଜୀବନେ ଭଜିଲୁ ନାହିଁ
ଜୀବ ଗଲାପରେ ବନ୍ଧୁ ସହୋଦର
ଯିବେ ହରିନାମ କହି ।
ମଶାଣିର ଯୁଈ ରହିଛି ଅନାଇ
ନିମିଷେ ପାଉଁଶ ହେବ
ରାମନାମ ସତ୍ୟ ହରୀନାମ ସତ୍ୟ
କର୍ମ ଫଳ ବାଛି ଦେବ ।
ରାଉରକେଲା
