କୃଷ୍ଣ ରୂପେ ଆସ ତୁମେ
ପ୍ରଶାନ୍ତ କୁମାର ନାଥ
ଦୁଷ୍ଟ ନାଶିବାକୁ ଜନମିଥିଲ ହେ
ଵନ୍ଦୀଶାଳ ଗୃହେ ତୁମେ
ଆଉ ଥରେ ନିଅ ତୁମେ ତ ଜନମ
କଳିଯୁଗେ ମର୍ତ୍ତ୍ୟ ଧାମେ।
ମହାକଳିକାଳ ଦୁଷ୍ଟଙ୍କର ବଳ
ନିରିହ ପଡନ୍ତି ବଳି
ନାହିଁ ଦୁଷ୍ଟ ପାଖେ ନୀତି ନୈତିକତା
ସମାଜକୁ କାଳି ବୋଳି।
ଧର୍ମ ଭାବନାରେ ନାହାଁନ୍ତି କେ ଜଣେ
ଅଧର୍ମରେ ହେଵେ ପଣେ
ସତ୍ୟ ଶାନ୍ତି ଦୟା ଯିଏ ଆଚରିଲା
ଜୀଵନ ରହେନା କ୍ଷଣେ।
କଂସ ଠାରୁ ବଳି ଏ ନର ରାକ୍ଷସ
ପୂରିଛନ୍ତି ମର୍ତ୍ତ୍ୟ ପୁରେ
ଶିଶୁ ନାରୀ ଧନ ଲୋଭରେ ସେ ବଶ
କ୍ଷଣିକରେ ସଵୁ ହରେ।
ଏକ କଂସ ସିନା ତୁମର ବଇରି
ଵଦ୍ଧି ପାରିଥିଲ ସତେ
ଏ କଳି କାଳରେ ଲକ୍ଷ ଲକ୍ଷ କଂସ
କାହାକୁ ମାରିବ କେତେ।
କଳିର ବଳିରେ ହୋଇ ବଳିଆର
ଧର୍ମକୁ ଦିଅନ୍ତି ବଳି
ଅଧର୍ମୀଙ୍କ ସଂଖ୍ୟା ବଢିତ ଯାଇଛି
ଧର୍ମକୁ ଦିଅନ୍ତି ଜାଳି।।
ପ୍ରଶାନ୍ତ କୁମାର ନାଥ
ଜୁଣଗଡି (ରାଜନଗର) କେନ୍ଦ୍ରାପଡ଼ା