ଡାବୁଗାଁ,୨୭/୮ – ୪ ଦିନ ବାକି ଗଣେଶ ପୂଜା | ୨ ବର୍ଷ ହେଲା କରୋନା ପାଇଁ କଟକଣା ଥିବାରୁ ବିଦ୍ୟାଳୟରେ ପୂଜା ହୋଇ ନଥିଲା | ଚଳିତ ବର୍ଷ କରୋନା କଟକଣା ନଥିବାରୁ ଏହାକୁ ପାଳନ କରିବା ପାଇଁ ଛାତ୍ରୀଛାତ୍ର ମହଲରେ ଆଗ୍ରହ ଭରି ରହିଛି | ସ୍କୁଲ ପାଇଁ କେଉଁଠୁ ମୂର୍ତ୍ତି କିଣିବେ ଓ ସାଜସଜା କିପରି ହେବ ତାହାକୁ ନେଇ ଜୋରସୋରରେ ପ୍ରସ୍ତୁତି ଆରମ୍ଭ କରିଦେଇଛନ୍ତି | ସାଧାରଣତ ସ୍କୁଲରେ ମୂର୍ତ୍ତି କିଣାଯାଇ ପୂଜା କରାଯାଉଥିବା ବେଳେ ନବରଙ୍ଗପୁର ଜିଲା ଡାବୁଗାଁ ବ୍ଲକ ଅଧୀନ ବଡଓଲମା ଆଶ୍ରମ ବିଦ୍ୟାଳୟ-୧ ରେ ୪ ଜଣ ଛାତ୍ର ନିଜ ହାତରେ ଗଢି ତୋଳିଛନ୍ତି ୪ ଫୁଟର ଆକର୍ଷଣୀୟ ଗଣେଶ ମୂର୍ତ୍ତି | ୩୧ ତାରିଖ ଏହି ମୂର୍ତ୍ତି ବିଦ୍ୟାଳୟରେ ପୂଜା କରାଯିବ | ବଡଓଲମା ଆଶ୍ରମ ବିଦ୍ୟାଳୟର ୧୦ ଶ୍ରେଣୀର ଭଗବାନ ସାନ୍ତା, ସତ୍ୟ ସାନ୍ତା, କୈଳାସ ଭତ୍ରା ଓ ଦେବେନ୍ଦ୍ର ଭତ୍ରା ଗଣେଶ ପୂଜା ପାଇଁ ମୂର୍ତ୍ତି ତିଆରି କରିବାକୁ ଚିନ୍ତା କରିଥିଲେ | ଏ ସମ୍ପର୍କରେ ପ୍ରଧାନ ଶିକ୍ଷକ ରଞ୍ଜନ କୁମାର ବେହେରା ଙ୍କୁ କହିଥିଲେ | ପିଲା ମାନଙ୍କ ଆଗ୍ରହ ଦେଖି ପ୍ରଧାନ ଶିକ୍ଷକ ଅନୁମତି ଦେଇଥିଲେ | ସେମାନେ ମୂର୍ତ୍ତି ପାଇଁ କାଠ, ମାଟି ଏବଂ ବିଭିନ୍ନ ସାମଗ୍ରୀ ସଂଗ୍ରହ କରିଥିଲେ | ୧୫ ଦିନ ପୂର୍ବରୁ ମୂର୍ତ୍ତି ତିଆରି ଶେଷ ପରେ ପ୍ରଧାନ ଶିକ୍ଷକ ଙ୍କୁ ରଙ୍ଗ ଆଣି ଦେବା ପାଇଁ କହିଥିଲେ | ୩ ଦିନ ତଳେ ପ୍ରଧାନଶିକ୍ଷକ ଛାତ୍ର ମାନଙ୍କୁ ରଙ୍ଗ ଓ ତୁଳି ଯୋଗାଇ ଦେଇଥିଲେ | ମୂର୍ତ୍ତି ତିଆରି କରିବା ପାଇଁ ସେମାନଙ୍କର ମନରେ ଭରି ରହିଥିଲା ଭକ୍ତି ଭାବନା | କାରଣ ମୂର୍ତ୍ତି ତିଆରି କରିବା ଦିନଠାରୁ ସେମାନେ ଆମିଷ ନ ଖାଇ ସଂପୂର୍ଣ୍ଣ ନିଷ୍ଠାର ସହ ରହିଥିବା କହିଥିଲେ | ଆଉ ଏହି ମୂର୍ତ୍ତି ତିଆରି ଯୋଗୁଁ ସେମାନଙ୍କ ପାଠପଢାରେ କୌଣସି ବ୍ୟାହତ ଘଟି ନାହିଁ | ସ୍କୁଲ ଛୁଟିପରେ ଅପରାହ୍ନ ୪ଟାରେ ସେମାନେ ନଖେଳି ମୂର୍ତ୍ତି ତିଆରି କରିଥିଲେ | ଏହି ଛାତ୍ର ମାନଙ୍କୁ ଶିକ୍ଷକ ଭୋଜରାଜ ମାଝି ଓ ଜଗଦୀଶ ସାହୁ ସହଯୋଗ କରିବା ସହ ଉତ୍ସାହିତ କରିଥିଲେ | ଭବିଷ୍ୟତରେ ଜଣେ ଭଲ ଶିଳ୍ପୀ ହେବା ପାଇଁ ଲକ୍ଷ୍ୟ ରଖିଥିବା ଛାତ୍ରମାନେ କହିଛନ୍ତି |
ପ୍ରଜ୍ଞାରଞ୍ଜନ ପରିଡା, ଡାବୁଗାଁ