ନୂଆାଖାଇ ତିହାର

କୋଶଲି ମାଟିର ଅସଲି ପରବ

   ଆସିଛେ ହୋ ନୂଆଖାଇ

ମିଶିଭିରି ଆସ ସଭେ ପାଲି ଦେମା

    ଖୁସି ଭରା ନୂଆାଖାଇ।।

ଭଦୁଅ ମାସର ଋଷି ପଞ୍ଚମୀରେ

    ଆସେ ନବାନ୍ନ ତିହାର

ଘରେ ଘରେ ହସ ଖୁସି ଖେଲିଯାଏ

     କରି କି ସଫା ସୁତର।।

ଚାଉଲ୍ କୁଟି ସବୁ ଘରେ ପିଠାପନା

     କୁଟୁମ୍ ସବୁ ଗୁଟେ ଠାନେ

କୁରେ ପତର ଖଲି ଦନା ଟିପିକରି

    ଭୋଗ ଦେମା ଇଷ୍ଟ ଠାନେ।।

ନୂଆ ଶାଢି ଧୁତି ସଭେ ଦେମା ପିନ୍ଧି

     ପୁରୁଖା ସେ ପରମ୍ପରା

ଗାଆଁର ଝାକର ଡାକ୍ ଦେଉଚେ ହୋ

     ନିଅ ନୂଆଁ ଧାନ୍ କେରା।।

ଗାଆଁର ଦବୀ ଗୁଡି ବାସେ ମହ ମହ

     ବାସେ ଗାଆଁର ଧରନୀ

କେତେ ଗହ ଗହ ଲାଗୁଚେ ହୋ ଭାଇ

     ହସୁଚେ ପ୍ରକୃତି ରାନୀ।।

ଭାବ୍ ଦିଆନିଆ ବନ୍ଧୁବାନ୍ଧବ ସଙ୍ଗେ

    ବାନ୍ଧାମା ପ୍ରେମ ବନ୍ଧନେ

ନୂଆଧାନର ଗୁରସ ମିଶା ଚୂରାକେ

     ଖାଏମା ଶରଧା ମନେ।।

ଖାଇ କରି ଆସ ସଭେ ମିଶିଭିରି

    ପରା ପରା ବୁଲିଯିମା

ସବ୍ କୁ ଜୁହାର ଭେଟ ହେଉଥିମା

    ହିସା ଅଂକାର ଭୁଲିଯିମା।।

ବଛରକେ ଆସେ ଖୁସିର ତିହାର

     ନେଇ ନୂଆ ଆଶା ତାର

ଆସ ମିଶିଗୁଲି ପାଲିଥିମା ହସି

      ନୂଆଖାଇ ର ତିହାର।।

         

          ମମତା ସାହୁ

        ଗାଈଗାଁ,କଳାହାଣ୍ତି