ବିପର୍ଯ୍ୟସ୍ତ ହେଉଛି ଗ୍ରାମ୍ୟ ଉନ୍ନୟନ ବିଭାଗ ରାସ୍ତା
ରାଇଘର (ମ ନି ସ )୦୩/୦୯/୨୨- ରାଇଘର ବ୍ଲକରେ ଶହ ଶହ ହେକ୍ଟର ଜମିରେ ନୀଳଗିରି ଚାଷ ହେଉଥିବା ବେଳେ ବର୍ତମାନ ନୀଳଗିରି ଗଛ ବଡ ବଡ ହୋଇଥିବା ଯୋଗୁଁ ସେ ଗୁଡିକ କାଟି ସାଇଜ କରି ବାହାରେ ଚାଲାଣ ହେଉଛି l ତେବେ ଯେଉଁ ସ୍ଥାନରେ ସଫା କରାଯାଉଛି ସେହି ଅଞ୍ଚଳରେ ରାସ୍ତାଘାଟ ବିପର୍ଯ୍ୟସ୍ତ ସହ ପରିବେଶ ଦୁର୍ଗନ୍ଧମୟ ହେଉଥିବା ଅଭିଯୋଗ ହୋଇଛି l ରାଇଘର ବ୍ଲକର ଗ୍ରାମ୍ୟ ଉନ୍ନୟନ ବିଭାଗର ଅନେକ ରାସ୍ତା ଉପରେ ନୀଳଗିରି ବେପାରୀ ରାସ୍ତା ବିପର୍ଯ୍ୟସ୍ତ କରୁଥିବା ଦେଖିବାକୁ ମିଳୁଛି l ନୀଳଗିରି ଗଛ ବଡ ହେବା ପରେ ତାକୁ ପ୍ରଥମେ କାଟିବା ସହ ଗଛର ଛାଲ ବାହାର କରି ବାହାରକୁ ଚାଲାଣ ହେଉଛି l ତେବେ ଯେଉଁ ଜମିରେ ନୀଳଗିରି ଚାଷ ହୋଇଛି ବିଲ ମଧ୍ୟରେ ପତ୍ର ଓ ଛାଲ ବାହାର କରିବା ପରିବର୍ତେ ରାସ୍ତା ଉପରେ ଆଣି ସଫା କରାଯାଉଛି l ହେକ୍ଟର ହେକ୍ଟର ଜମିରେ ହେଉଥିବା ନୀଳଗିରି ଗଛର ପତ୍ର ଓ ଛାଲ ଗୁଡିକ ରାସ୍ତା ଉପରେ ଛାଡି ଚାଲି ଯାଉଥିବା ଯୋଗୁଁ ସଂପୃକ୍ତ ଅଂଚଳରେ ଯାତାୟତରେ ନାନା ସମସ୍ୟା ସହ ଉକ୍ତ ଅଂଚଳ ଦୁର୍ଗନ୍ଧମୟ ପରିବେଶ ସୃଷ୍ଟି ହେଉଛି l ଲଗାତାର କିଛି ବର୍ଷ ହେବ ସମାନ ସମସ୍ୟା ଦେଖା ଦେଉଥିବା ବେଳେ ଅଞ୍ଚଳବାସୀ ନୀଳଗିରି ବେପାରୀ ମାନଙ୍କୁ ବାରମ୍ବାର ଅଭିଯୋଗ କରିବା ପରେ ମଧ୍ୟ ଘଟଣା କୁ ସେମାନେ ଗୁରୁତ୍ବ ଦେଉ ନାହାନ୍ତି l ଅପରପକ୍ଷରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ତଦାରଖ କରି ସମ୍ପୃକ୍ତ ନୀଳଗିରି ବେପାରୀ ଉପରେ ବିହିତ ପଦକ୍ଷେପ ଗ୍ରହଣ କଲେ ରାସ୍ତା ଉପରୁ ଆବର୍ଜନା ହଟାଇବା ନିମନ୍ତେ ବ୍ୟବସ୍ଥା କରିଥାନ୍ତେ କିନ୍ତୁ ଅଧିକାରୀଙ୍କ ତଦାରଖ ଅଭାବରୁ ସମସ୍ୟା ଦ୍ବିଗୁଣିତ କରିଛି l ଏହି ସମସ୍ୟା ଉଦୟପୁର-ତୁରୁଡିହି ମୁଖ୍ୟ ରାସ୍ତା ସହ ପରଚିପାରା ଭଳି ଅଂଚଳରେ ଦେଖିବାକୁ ମିଳୁଛି l ପ୍ରଶାସନ ଏଥି ପ୍ରତି ସ୍ୱତନ୍ତ୍ର ଦୃଷ୍ଟି ଦେବାକୁ ସାଧାରଣରେ ଦାବୀ ହୋଇଛି l
ରାଇଘର ରୁ କିରଣ କୁମାର ପଟ୍ଟନାୟକ ଙ୍କ ରିପୋର୍ଟ