ସ୍ବାଗତମ୍ ମାଁ
ଆଶ୍ୱିନେ ଆସିବେ ମାଁ ଦେବେ ଆଶୀର୍ବାଦ
ସେ କାରଣେ ସଜବାଜ ଚାଲିଛି ଧରାରେ
ଭାଦ୍ରବର ଶୁକ୍ଳ ଚତୁର୍ଥୀରେ
ମଙ୍ଗଳାଚରଣର ଆଦ୍ଯ ଆଗମନୀ ସଙ୍ଗୀତରେ
ବିଘ୍ନେଶ୍ୱର ଗଜାନନେ କରି ଆବାହନ
ମାତାଙ୍କ ଆଗମନୀର ଶୁଭ ଶଙ୍ଖ
ଜନ ମୁଖେ ହେଲା ନିନାଦିତ ।
ପଞ୍ଚମୀରେ ନବାନ୍ନ ଭକ୍ଷଣେ
ହର୍ଷତ୍ତୋଫୁଲ୍ଲ ସକଳ ମାନସ
ସ୍ବଇଷ୍ଟଦେବଦେବୀଙ୍କୁ ଦେଇ ମଙ୍ଗଳ ଆରତୀ
ଦୁର୍ଗତିନାଶିନୀଙ୍କର ଆସିବା ପଥକୁ
ଉତ୍ସୁକ ହୃଦୟେ ସର୍ବେ
ସତେ ଅପେକ୍ଷିତ।
ଏ ଦୃଶ୍ଯ ଦର୍ଶନେ ବର୍ଷା ହୋଇଗଲା ସ୍ତବ୍ଧ
ଗ୍ରୀଷ୍ମର ପ୍ରକୋପ ଲାଜେ ହେଲା ଶକ୍ତିହୀନ
ନାତିଶୀତୋଷ୍ଣ ସମୟ ହୋଇ ଉପସ୍ଥିତ
ବସନ୍ତର ଭ୍ରମ ସୃଷ୍ଟିକଲା
ମିଳନର ମଧୁ ସ୍ବର ହେଲା ଗୁଞ୍ଜରିତ
ଶାନ୍ତ କାନ୍ତ ପୃଥିବୀ ବକ୍ଷରେ।
ନବ ରଙ୍ଗେ ଦେବାଳୟ ହୋଇ ପ୍ରଲେପିତ
ଚୂଡ଼ାଦେଶେ ଉଡ଼େ ଆଜି ନବ ନବ ନେତ
ମନ୍ଦାର ଦହନା ଦେଖ ଭାବ ବିହ୍ବଳିତା
କେତେବେଳେ ପାଇବେ ସେ ମାତାଙ୍କ ପରଶ
ଉଦ୍’ବିଗ୍ନ ଚିତ୍ତରେ ଏବେ ଅଛନ୍ତି ଅନାଇଁ।
ନଦୀମାନ ଜଳାଧାର ହ୍ରାସ ହେବା ଦେଖି
କର୍ଦ୍ଦମାକ୍ତ ରାସ୍ତା ସବୁ ହୋଇଲେ ସଜାଗ
ମାଆଁଙ୍କର ଆଗମନେ ମନେ ଆଣି ତତ୍ପରତା
ଶୁଷ୍କ ହୋଇଗଲେ ସୁଗମନାଗମନ ନିମିତ୍ତେ,
ଭାବୁଥିଲେ,
ଭକ୍ତଗଣ ହୋଇ ଆନନ୍ଦିତ
ମୋ ଦେହରେ ଯାଉଥାନ୍ତୁ ଭକ୍ତି ଭାବ ଘେନି।
ଅଘୋଷିତ “ସ୍ବଚ୍ଛ ଭାରତ” ସକାଶେ
ଆବାଳବୃଦ୍ଧବନିତା ସର୍ବେ ନିମଜ୍ଜିତ
ଯଥାସାଧ୍ଯେ ଲାଗିଛନ୍ତି ସର୍ବେ ନିଜ କର୍ମେ
ଅଦୃଷ୍ଟ ଇସାରା କିବା ସର୍ବ ଚରାଚରେ
ଦଶଭୁଜାଙ୍କର ଶୁଭ ଧରା ଆଗମନେ
ତିଳେହେଲେ କୌଣସିରେ କରିବେନି ହେଳା।
ଧର୍ମରାଜ ପ୍ରଧାନ
ସହକାରୀ ଶିକ୍ଷକ ଜଗନ୍ନାଥ ଉଚ୍ଚ ବିଦ୍ୟାଳୟ
ଝିଲିମିଣ୍ଡା ବ୍ଳକ ଅତାବିରା ଜିଲ୍ଲା-ବରଗଡ