ରାଇଘର ୨୭/୯ (ମ ନି ସ) ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ କାନାହାଣ୍ଡି ଯିବା ରାସ୍ତାକଡ଼ରେ ମଙ୍ଗଳବାର ସକାଳୁ ଜଣେ ବ୍ୟକ୍ତିଙ୍କ ମୃତ ଦେହ ଉଦ୍ଧାର ହୋଇଛି | ବ୍ୟକ୍ତି ଜଣକ ରାଇଘର ଗ୍ରାମର ଦିଲୁ ହାଲଦାର (୫୦) ବୋଲି ଜଣାପଡ଼ିଥିବା ବେଳେ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରି ସ୍ଥାନୀୟ ପୁଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି | ରାଇଘରର ଜଣେ ବ୍ୟବସାୟୀ ଦିଲୁ ହାଲଦାରଙ୍କ ଦୁଇ ପୁଅଙ୍କ ମୃତ୍ୟୁ ପରେ ଗତ କିଛି ମାସ ହେବ ପାରିବାରିକ ଅଶାନ୍ତି ଲାଗି ରହିଥିଲା l
ଗତ କିଛି ଦିନ ପୁର୍ବେ ପରିବାରର କିଛି ଲୋକ ନିର୍ଦ୍ଧୁମ ପିଟିଥିବା ନେଇ ଦିଲୁ ହାଲଦାର ରାଇଘର ଥାନାର ଦ୍ୱାରସ୍ଥ ହୋଇଥିଲେ | ସେହି ଦିନ ଠାରୁ ସେ ପ୍ରତିଦିନ ସ୍ଥାନୀୟ ସାଙ୍ଗସାଥୀଙ୍କୁ ଫୋନ କରି ସାହାଯ୍ୟ ଲୋଡୁଥିଲେ l ଅପରପକ୍ଷରେ ଆଜି ସକାଳୁ କାନାହାଣ୍ଡି ଯିବା ରାସ୍ତାର ଏକ ନଦୀ ନିକଟରେ ଦିଲୁଙ୍କ ମୃତ ଦେହ ପଡ଼ିଥିବା କିଛି ଲୋକ ଦେଖି ପରିବାର ଲୋକଙ୍କୁ ଖବର ଦେଇଥିଲେ | 
ଏହି ଖବର ପ୍ରଚାର ହେବା ପରେ ଘଟଣା ସ୍ଥଳରେ ଲୋକଙ୍କ ଭିଡ଼ ଜମିଥିଲା l ଖବର ପାଇ ସ୍ଥାନୀୟ ପୁଲିସ ଘଟଣା ସ୍ଥଳରେ ପହଞ୍ଚି ଶବ ଜବତ କରିଥିଲେ | ଦିଲୁଙ୍କ ପୁର୍ବରୁ ଦିଲୁଙ୍କ ପାରିବାରିକ କଳହ ଲାଗି ରହିଥିବା ସହିତ ସ୍ଥାନୀୟ ଲୋକଙ୍କ ମନ୍ତବ୍ୟକୁ ଆଧାର କରି ପୁଲିସ ଏହାକୁ ଗୁରୁତର ସହିତ ନିଜର ତଦନ୍ତ ପରିସରକୁ ନେଇଥିବା ଜଣାପଡ଼ିଛି l
ଏ ନେଇ ଘଟଣା ସ୍ଥଳରେ ଡଗ୍ ସ୍କାର୍ଡ୍ ଓ ସାଇଣ୍ଟିଫିକ ଟିମ୍ ପହଞ୍ଚି ତଦନ୍ତ ଚଳାଇଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ପରେ ହିଁ ଘଟଣାର ସତ୍ୟା ସତ୍ୟ ପ୍ରକାଶ ପାଇବ ବୋଲି ଉମରକୋଟ ଏସଡିପିଓ ଶୁଭେନ୍ଦୁ କୁମାର ଶବର ପ୍ରକାଶ କରିଛନ୍ତି | ଏହି ଘଟଣାରେ ଜଣେ ଯୁବକଙ୍କୁ ଅଟକ ରଖି ପୁଲିସ ପଚରା ଉଚରା ଚଲାଇଛି l
ରାଇଘର ରୁ କିରଣ କୁମାର ପଟ୍ଟନାୟକ ଙ୍କ ରିପୋର୍ଟ
