ମାଧୁର୍ଯ୍ୟମୟୀ କାଶତଣ୍ଡି 

      ବେଣୁଧର ସୂତାର

ତୁମେ ଶାରଦୀୟ ସ୍ନିଗ୍ଧ ସମ୍ମୋହନ

ନିଖିଳ ମୋହିନୀ ଚାରୁହାସିନୀ

ରୂପସୀ ଅଳସୀ ଲାସ୍ୟ ମଦାଳସୀ

ଦିବ୍ୟ ଶୋଭାମୟୀ ଋତୁ କାମିନୀ 

ଆଗୋ ଶ୍ଵେତମୟୀ ପ୍ରକୃତି କନ୍ୟା

ଏ ଧରା ବକ୍ଷରେ ରୂପ କୁହକରେ

ନୈସର୍ଗୀକ ଶୋଭା ତୁମ ଅନନ୍ୟା

।।

ଅନବଦ୍ୟରୂପେ ନୈବେଦସମ୍ଭାରେ

ନିଟୋଳ ନୟନେ ସପନ ଭରି

ଗଙ୍ଗଶିଉଳିର ମହକ ମାଧୁରୀ

ବୁକୁରେ ଖେଳାଏ ପ୍ରୀତି ଲହରି

ଧୀର ସମୀରଣ ମୃଦୁ ପରଶେ

ଚାରୁ ଓଠ ଧାରେ ହସ ପୀୟୂଷରେ

ଲାସ୍ୟ ମଧୁଛନ୍ଦେ ନିଖିଳ ତୋଷେ

।।

ଭିଜା ଅସ୍ତରାଗ ସୁବର୍ଣ୍ଣ ଢେଉରେ

କାଉଁରୀ ମନ୍ତର ଦେଇଛ ବୁଣି

ମଧୁ ଯାମିନୀର ରୁପା ଜୋଛନାରେ

ଲାବଣ୍ୟ ଝରା ଯା ରୂପ ରୋଷଣି

ପ୍ରାଣେପ୍ରାଣେବୋଳେ ଭାବ ଅଞ୍ଜନ    

 ବିଶ୍ଵ ବିମୋହିନୀ ରୂପ ସୁହାଗିନୀ

ପ୍ରୀତିଛନ୍ଦମୟୀ ଚାରୁ ସୁମନ   

।।

ଶୁଭ୍ର ଶାରଦୀୟ ମଧୁ ଚନ୍ଦ୍ରିକାରେ

ଜୋଛନା ଝରଇ ଶିରି ଶିରିକା

ଆଗୋଲାସ୍ୟମୟୀ ଶରତପ୍ରେମିକା

ଅୟି ପ୍ରକୃତିର ଅଭିସାରିକା 

ଜ୍ୟୋତ୍ସ୍ନାଭିଜାତନୁ ଲାସ୍ୟ ବିଳାସ

ମର୍ତ୍ତ୍ୟ ବୈକୁଣ୍ଠରେ ରୂପସୁଧା ଧାରେ

ବୁହାଇଛ କଳ କଲ୍ଲୋଳ ରସ 

।।

ତୁମେ ଶରତର ପ୍ରୀତିନାୟିକା ଗୋ

ରୂପମାଧୁରୀରେ କରିଛ ବଶ

ନାହିଁ ମକରନ୍ଦ ନଲୋଡେ ଅଳିନ୍ଦ

ରଚିବାକୁ ପ୍ରୀତି ଅମିୟ ରାସ

ରୂପମୟୀ କାଶତଣ୍ଡି ସୁନ୍ଦରୀ

ଭବ ଉପବନେ ଭାବ ନିକେତନେ

ତୁମେ ଅଳକାର ପ୍ରୀତି ମଞ୍ଜରୀ ।।

କେଶଦୁରାପାଳ କେନ୍ଦୁଝର