କୁଆଁର ପୁନେଇ ଜହ୍ନ

କୁଆଁର ପୁନେଇ ଜହ୍ନ ଲୋ ସୁନ୍ଦର

କୁଆଁରି ମନରେ ଉଠେ ଲୋ ଜୁଆର।।

ବଉଦ ଉଢାଳେ ହସୁଛି ସେ ଜହ୍ନ

ଚାନ୍ଦ ଦେଖି ମନ ହୁଏ ଯେ ଉଚ୍ଛନ୍ନ।।

ଅସୁମାରି ଆଶା ଖେଳେ ଲୋ ମନରେ

ମନର କଥା କୁ ରଖିଣ ଗୋପନେ।।

ପାଦରେ ଅଳତା ଆଖିରେ କଜଳ

ବେଣୀରେ ଗଜରା ଦିସଇ ସୁନ୍ଦର।।

ପରିଧାନ କରି ନୂତନ ବସନ

ସଜବାଜ ହୋଇ ଦିସନ୍ତି ଶୋଭନ।।

ସାଙ୍ଗସାଥି ସବୁ ହରଷ ହୋଇଣ

ଚଉଁରା ମୂଳରେ ମିଳନ୍ତି ବହନ।।

ନାନା ଜାତି ଭୋଗ ବାଢନ୍ତି ହରଷେ

କଦଳୀ ନଡିଆ ପିଠା କୁ ସମସ୍ତେ।।

ଜହ୍ନିଫୁଲ ସାଥେ ପଦୁଅଁ କି କଇଁ

ଚଉଁରା ମୂଳରେ ଦିଅନ୍ତି ଯେ ଥୋଇ।।

ଦେଇ ହୁଳହୁଳି ଜହ୍ନକୁ ଯେ ଚାହିଁ

ଅନାବିଳ ଆଶା ମନରେ ଯେ ନେଇ।।

ଅଞ୍ଜୁଳା ଅଞ୍ଜୁଳା ଫୁଲକୁ ଯେ ଟେକି

ଦିଅନ୍ତି ମନର ମଣିଷ ପାଇଁ କି।।

ଦୀପ ଧୂପ ସାଥେ ଆଳତି କର୍ପୂର

ବନ୍ଦାଇବେ ଚାନ୍ଦ ଆନନ୍ଦ ମନର।।

   

         ମମତା ସାହୁ

               ଗାଈଗାଁ,କଳାହାଣ୍ତି