ବୌଦ୍ଧ 16/10 : ବୌଦ୍ଧ ସମବାୟ କେନ୍ଦ୍ର ବ୍ୟାଙ୍କ ପରିଚାଳନା କମିଟି ସଦସ୍ୟ ନିର୍ବାଚନରେ ସମସ୍ତ ଶତ ପ୍ରତିଶତ ଆସନ ସଂରକ୍ଷିତ ରଖି ସାଧାରଣ ବର୍ଗର ଲୋକଙ୍କ ଅଧିକାରକୁ କ୍ଷୁର୍ଣ୍ଣ କରା ଯାଇଥିବା ଅଭିଯୋଗ ହୋଇ ଆସୁଥିଲା l ଉକ୍ତ ପ୍ରସଙ୍ଗରେ ମାନ୍ୟବର ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇଛନ୍ତି ବୌଦ୍ଧ ସେବା ସମବାୟ ସମିତିର ସଭାପତି ତଥା ବରିଷ୍ଠ ସମବାୟବିତ ସତ୍ୟଜିତ କୁମାର ପଣ୍ଡା l ସେ ଉଚ୍ଚ ନ୍ୟାୟାଳୟରେ ବୌଦ୍ଧ ସମବାୟ କେନ୍ଦ୍ର ବ୍ୟାଙ୍କ ନିର୍ବାଚନ ଆସନ ସଂରକ୍ଷଣ ବ୍ୟବସ୍ଥାରେ ହୋଇଥିବା ତୃଟି ଓ ଅନିୟମିତତା ପ୍ରସଙ୍ଗରେ ହସ୍ତକ୍ଷେପ ପାଇଁ ପ୍ରାର୍ଥନା କରିଛନ୍ତି | ମାମଲାଟି WP(C) 27177/2022 ରେ ପଂଜିକୃତ ହୋଇଛି | ଏଠାରେ ଉଲ୍ଲେଖ ଯୋଗ୍ୟ ଯେ ବୌଦ୍ଧ ସମବାୟ କେନ୍ଦ୍ର ବ୍ୟାଙ୍କ ପରିଚାଳନା କମିଟିର 15 ଜଣ ସଦସ୍ୟ ନିର୍ବାଚନ ପାଇଁ ନିର୍ବାଚନ ଅଧିକାରୀ ତଥା ଅତିରିକ୍ତ ଜିଲ୍ଲାପାଳ ଗତ ତା 23. 09. 2022 ରେ ବିଜ୍ଞପ୍ତି ପ୍ରକାଶ କରିଥିଲେ | ମୋଟ୍ 15 ଆସନ ମଧ୍ୟରୁ ଅନ୍ୟାନ୍ୟ ପଛୁଆ ବର୍ଗ ତଥା ସାମାଜିକ ଓ ଶିକ୍ଷା କ୍ଷେତ୍ରରେ ଅନଗ୍ରସର ଶ୍ରେଣୀ ପାଇଁ 7 ଗୋଟି ଆସନ, ଉକ୍ତ ବର୍ଗର ମହିଳାଙ୍କ ପାଇଁ 1 ଗୋଟି ଆସନ, ଅନୁସୂଚିତ ଜନଜାତି ମାନଙ୍କ ପାଇଁ 3 ଗୋଟି ଆସନ, ଅନୁସୂଚିତ ଜାତି ପାଇଁ 2 ଗୋଟି ଆସନ ଓ ମହିଳାଙ୍କ ପାଇଁ 2 ଗୋଟି ଆସନ ସଂରକ୍ଷିତ କରା ଯାଇଛି l ଫଳରେ କୌଣସି ଆସନ ଅସଂରକ୍ଷିତ ରଖା ଯାଇନଥିବା ହେତୁ ସାଧାରଣ ବର୍ଗର ଲୋକେ ସେମାନଙ୍କ ରାଜନୈତିକ ଅଧିକାରରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି | ପ୍ରାଥମିକ ସମବାୟ ସମିତି ମାନଙ୍କରେ ଏକ କିମ୍ବା ଏକାଧିକ ସଦସ୍ୟ ପଦବୀ ଅସଂରକ୍ଷିତ ଥିବା ବେଳେ କେନ୍ଦ୍ର ବ୍ୟାଙ୍କ ନିର୍ବାଚନରେ କୌଣସି ଗୋଟିଏ ମଧ୍ୟ ଆସନ ଅସଂରକ୍ଷିତ ରଖାନଯିବା ସମସ୍ତଙ୍କୁ ବିସ୍ମିତ କରିଥିଲା l
ବୌଦ୍ଧରୁ ହୃଦାନନ୍ଦ ମେହେରଙ୍କ ରିପୋର୍ଟ ମସିହା ନିୟୁଜ
