ଲୁହରେ ଲେଖୁଛି ଚିଠି
ଶ୍ଯାମା ପ୍ରସାଦ୍ ବୋଷ୍
ଲୁହରେ ଲେଖୁଛି ଚିଠି ଟିଏ ଆଜି
ସାଥୀ ଏ ବିଜନ ରାତି
ପ୍ରାଣ ପ୍ରିୟା ତୁମ ବିରହେ ବେଦନା
କରତି ଦେଉଛି ଛାତି ।
ତୁମ ବିନା ଆଜି ଏ ମନ ଖୋଜୁଛି
ତାରା ଭରା ଜହ୍ନ ରାତି
ତୁମରି ସ୍ମୃତି ରେ ନିରେଖି ଦେଖୁଛି
ଜହ୍ନ ସାଥେ କଇଁ ପ୍ରୀତି ।
ପିଆସୀ ନୟନ ଆଜି ବି ଖୋଜୁଛି
ବିଗତ ଦିନର ସ୍ମୃତି
ନିଦ ଭରା ଆଖି ସପନ ଦେଖୁଛି
ଅତୀତ ର ମଧୁମତି ।
ନବ ଯଉବନେ ଉତ୍ତାଳ ତରଙ୍ଗେ
ପହିଲି ପରଶ ତାତି
ତୁମ ବିନା ଆଜି ଏ ମନ ଝୁରୁଛି
ଯାଇଅଛି ଯାହା ବିତି ।
କୋମଳ ଛୁଆଁ ର ଅଭୁଲା ଅତୀତ
ଥରାଏ ହୃଦୟ ତନ୍ତ୍ରୀ
ତୁମ ବିନା ଆଜି ଝୁରୁଛି ପରାଣ
ବଦଳେ ଜୀବନ ଗତି ।
ତୁମ ବିନା ଯେତେ ମଧୁର ସପନ
ଜାଗି ଉଠେ ମନେ ପ୍ରୀତି
ତୁମକୁ ଛାଡି ଏ ତୁଛ ଜୀବନ ଟା
ହୋଇ ଯାଉଅଛି ଇତି ।
ତୁମେ ପ୍ରିୟତ୍ତମା ପ୍ରୀତି ର ଉପମା
ଆସ ଭାବନାରେ ନିତି
ରୂପେ ନିରୂପମା ସତେ କି ଚନ୍ଦ୍ରମା
ତୁମେ ପ୍ରଣୟ ର ଗୀତି ।
ତୁମରି ବିରହେ ଫିକା ଯଉବନ
ପାରିଲିନି ପ୍ରେମେ ଜିତି
ହାରିବା ଗ୍ଲାନି ରେ ନିତି ଜୀଇଁ ମରେ
ଏଇ ମୋ ଜୀବନ ସ୍ଥିତି ।
ଭାଙ୍ଗି ଦେଇ ପ୍ରେମ ନିଡ ଟି ମୋହର
ସାଜିଗଲ ପ୍ରାଣଘାତୀ
କାହିଁ କେତେ ଦୂର ଉଡିଗଲ ପ୍ରିୟା
ଲୁହରେ ବିତୁଛି ରାତି ।
ଲୁହ ମାଗୁଅଛି ପ୍ରେମର ପାଉଣା
ଅତୀତ ର ସେହି ପ୍ରୀତି
ହୃଦୟ କାଗଜେ ଲୁହରେ ଲେଖୁଛି
ପ୍ରୀତିର ଚିଠି ମୁଁ ନିତି ।
ଲହୁରେ ବତୁରା ଲୁହର ଚିଠି ମୋ
କୋହରେ ଭରିଛି ଅତି
ଠିକଣା ବିହୀନ ଏଇ ଶେଷ ଚିଠି
ଏଇଠି କରୁଛି ଇତି ।
ଶ୍ଯାମା ପ୍ରସାଦ୍ ବୋଷ୍
ଗ୍ରାମ :- ବେଗୁନିଁଆ , ମଲ୍ଲୀକ୍ ସାହି
ପୋଷ୍ଟ / ଥାନା :- ଗୋପ୍ ଜିଲ୍ଲା :- ପୁରୀ
