କୃଷ୍ଣଚୂଡ଼ା
ବେଣୁଧର ସୂତାର
ମାଦକରେଭରା ସୌନ୍ଦର୍ଯ୍ୟ ପସରା
ଅଳିର ଅମରାବତୀ
ଅମୃତ ରାସର ମୁଁ ଯେ ଚାରୁଫୁଲ
ମଧୁଝରା ମଧୁ ପ୍ରୀତି ।।
ଅନନ୍ତଭୋଗ୍ୟା ମୁଁ ରୂପସୀ ଅନନ୍ୟା
ପ୍ରେମର କୁସୁମ କଳି
ମୋ ପରଶ ବିନା ପ୍ରୀତିର ଫଗୁଣ
ପାରେ ନାହିଁ ସୁର ତୋଳି ।।
ଚାରୁ ପ୍ରକୃତିର ଭବ୍ୟ ଉପହାର
ପ୍ରୀତିମୟ ସମ୍ମୋହନ
ମୋହିନୀମାୟାରେ ସ୍ଵପ୍ନିଳସମ୍ଭାରେ
ତୋଷେମୁଁ ନିଖିଳ ମନ ।।
ମୋ ବିନା ନବୀନା ହତମନା ସିନା
ଅକୁହା ଅନ୍ତର ସୁର
ପ୍ରେମୀ ଜୀବନର କାଉଁରୀକଳା ମୁଁ
ପ୍ରୀତିର ଅମିୟ ଧାର ।।
ବିଧୁର ପ୍ରାଣରେ ଭରେ ମୁଁ ମୂର୍ଛନା
ନୟନ କଟାକ୍ଷ ତୀରେ
ଶାଶ୍ଵତ ପ୍ରେମର ମୁଁ ସୁମନ ସାର
ନବ ରସ ସମାହାରେ ।।
ମଧୁପ ଅଧର ମଧୁ ସୁଧା ଧାର
ମୋ ଅମିୟ ପ୍ରୀତିପୁର
ମୋସାଥି ଭ୍ରମର ରତି ଅଭିସାର
ମଦନର ଉପଚାର ।।
ତଥାପି ମୁଁସତୀ ଦେବଅଙ୍ଗ ଜ୍ୟୋତି
ପୁଣ୍ୟ ପବିତ୍ର ଦେହୀ
ପୂଜା ଉପଚାରେ ମଙ୍ଗଳବେଭାରେ
ଲୋଡା ରୂପଚର୍ଯ୍ୟା ପାଇଁ ।।
ଦେବ ଅର୍ଚ୍ଚନାର ମଙ୍ଗଳ ଅର୍ଘ୍ୟରେ
ସାର୍ଥକ ଜୀବନ ମୋର
ଭବ ଉପବନେ ଭାବ ସମ୍ମୋହନେ
ଜନ୍ମ ନେବି ବାରବାର ।।
ଭକ୍ତି ଆରାଧନା ଅମୃତ ଅର୍ଚ୍ଚନା
ମୋ ଜୀବନ ପୁଣ୍ୟ ବ୍ରତ
ଜନ ମଙ୍ଗଳର ପାବନ ପଥରେ
ହେଉଥିବି ସମର୍ପିତ ।।
କେଶଦୁରାପାଳ କେନ୍ଦୁଝର
