ଭବାନୀପାଟଣା: ୨୯/୧୦ – (ମନିସ):- କଳାହାଣ୍ଡି ଜିଲ୍ଲାର ମ.ରାମପୁର ନିକଟସ୍ଥ ଗୌଡ କର୍ଲାଖୁଟାରେ ଅନୁଷ୍ଠିତ ରାଜ୍ୟସ୍ତରୀୟ କୁଶଲାପୁଞ୍ଜା ଡଙ୍ଗର ମହୋତ୍ସବ ଅବସରରେ ବିଶିଷ୍ଟ ଲୋକ ସଂସ୍କୃତି ଗବେଷକ, ସାହିତ୍ୟିକ ଡକ୍ଟର ଅଜିତ କୁମାର ବେହେରାଙ୍କୁ ମାନପତ୍ର, ଟ୍ରଫି ଓ ଉପଢୌକନ ଦେଇ ସମ୍ମାନୀତ କରାଯାଇଛି। 
ଏଥିରେ ବିଶିଷ୍ଟ ବୈଜ୍ଞାନିକ ଡକ୍ଟର ବିଜୟ କୁମାର ସାହୁ ମୁଖ୍ୟ ଅତିଥି, କଳାହାଣ୍ଡି ଜିଲ୍ଲା ପରିଷଦର ଅଧ୍ୟକ୍ଷ ପୁଷ୍ପେନ୍ଦ୍ର ସିଂହଦେଓ, ବରିଷ୍ଠ ସାମ୍ବାଦିକ ଦେବେନ୍ଦ୍ର କୁମାର ବିଶି ଓ କମ୍ଭୂପାଣି ମିଶ୍ର, ଅନନ୍ତ କୁମାର ପାଲ ସମ୍ମାନୀତ ଅତିଥି ଭାବରେ ଯୋଗଦାନ କରିଥଲେ। ଡକ୍ଟର ବେହେରା ଓଡ଼ିଶାର ଅନାଲୋଚିତ ଲୁପ୍ତ ଓ ଲୁପ୍ତପ୍ରାୟ ଲୋକଙ୍କ ଭାଷା, ସାହିତ୍ୟ ଓ ସଂସ୍କୃତି ଉପରେ ଗବେଷଣା କରି ତାର ପୁନରୁଦ୍ଧାର ସହ ଲୋକଲୋଚନକୁ ଆଣିବାରେ ବିଶେଷ ଭୂମିକା ନିର୍ବାହ କରିଛନ୍ତି। ତାଙ୍କରି ଏହି ଅବଦାନ ପାଇଁ ସମ୍ୱଲପୁର ବିଶ୍ଵବିଦ୍ୟାଳୟ ତାଙ୍କୁ ସର୍ବୋଚ୍ଚ ମର୍ଯ୍ୟାଦାଜନକ ପି.ଏଚ୍.ଡି. ଓ ଡି.ଲିଟ୍ ଡିଗ୍ରୀ, କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଭାରତ ସରକାର ଜୁନିଅର ଫେଲୋସିପ ସହ ସରକାରୀ ତଥା ବେସରକାରୀ ସଂସ୍ଥା ତାଙ୍କୁ ବହୁ ପୁରସ୍କାର ଓ ସମ୍ମାନ ପ୍ରଦାନ କରିଛନ୍ତି। ଡକ୍ଟର ବେହେରା ସଂପ୍ରତି କଶୃପଡା ମହାବିଦ୍ୟାଳୟରେ ଓଡ଼ିଆ ବିଭାଗୀୟ ଅଧ୍ୟାପକ ଭାବରେ କାର୍ଯ୍ୟରତ।
