ବାଲେଶ୍ଵର,୩୦/୧୦/୨୨- ବାଲେଶ୍ଵର ଜିଲ୍ଲା ରେମୁଣା ଠାରେ ରେମୁଣା ସାହିତ୍ୟ ସଂସଦ ତରଫରୁ ପୁସ୍ତକ ଲୋକାର୍ପଣ ଓ କବିତା ପାଠ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି ଉପଲକ୍ଷେ ଭାଗବତ ପ୍ରସାଦ ଦାସଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ବରେଣ୍ଯ ଅତିଥି ଭାବେ ବାଲେଶ୍ଵରସ୍ଥ ଫକୀର ମୋହନ ବିଶ୍ବବିଦ୍ୟାଳୟର ପ୍ରଫେସର ଡ.ମଣୀନ୍ଦ୍ର କୁମାର ବେହେରା,
ଅକ୍ଷାଂଶ ସମ୍ପାଦକ ଡ. ହରିଶ୍ଚନ୍ଦ୍ର ବେହେରା, ବିଶିଷ୍ଟ ସାହିତ୍ୟିକ ଓ ସମାଲୋଚକ ଡ. ଗିରିଶ ଚନ୍ଦ୍ର ଜେନା, କ୍ଷୀରଚୋରା ମନ୍ଦିରର କାର୍ଯ୍ୟନିର୍ବାହୀ ଅଧିକାରୀ ସରୋଜ କୁମାର ବେହେର ଓ ରେମୁଣା ସାହିତ୍ୟ ସଂସଦର ସଭାପତି ଡ. ସତ୍ୟ ରଞ୍ଜନ ଦାସ ପ୍ରମୁଖ ମଞ୍ଚାସୀନ ଥିଲେ । ବାଇଚଢେଇ ସମ୍ପାଦକ ବିକାଶ କୁମାର ଶତପଥୀ ସଂଯୋଜକ ଭାବେ ଦାୟିତ୍ବ ସମ୍ପାଦନ କରିଥିଲେ । ମଞ୍ଚାସୀନ ଅତିଥି ମାନଙ୍କ ଦ୍ବାରା ଡ. ସୁରେନ୍ଦ୍ର ପ୍ରସାଦ ମହାନ୍ତିଙ୍କ ‘ ରେମୁଣା କ୍ଷୀରଚୋରା ଗୋପିନାଥ ‘ ଓ ‘ ବ୍ରହ୍ମାଦ୍ରୀର ନୀଳମାଧବ ‘ ପୁସ୍ତକ ଲୋକାର୍ପଣ ହୋଇଥିଲା । 
ଏହି ଅବସରରେ କବୟିତ୍ରୀ ତାନଶ୍ରୀ ପାଣିଗ୍ରାହୀଙ୍କ ସମେତ ପ୍ରାୟ ୫୦ ଉର୍ଦ୍ଧ୍ବ କବି କବୟିତ୍ରୀ ମାନେ କବିତା ପାଠ କରି ଆତ୍ମସନ୍ତୋଷ ଲାଭ କରିଥିଲେ । ଶିକ୍ଷୟିତ୍ରୀ ସତ୍ୟଭାମା ମୁଦୁଲି ଓ ବ୍ଯଙ୍ଗ କବି ପ୍ରଭାକର ଦାସ କବିତା ସଂଯୋଜନା କରିଥିଲେ । ସଂସଦ ତରଫରୁ ଲେଖକ ମାନଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏଥିରେ ୧୦୦ ରୁ ଉର୍ଦ୍ଧ୍ବ ସାହିତ୍ୟ ବନ୍ଧୁ ଉପସ୍ଥିତ ଥିଲେ । ଶେଷରେ ଧନ୍ୟବାଦ ପରେ ସଭାପତି ସଭା ସାଙ୍ଗ କରିଥିଲେ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
