“ଉତ୍କଳୀୟ ପରମ୍ପରାରେ ଲକ୍ଷ୍ମୀ ପୂଜନ”
ଚନ୍ଦ୍ରକଳା ଦେବୀ
ଓଡ଼ିଆ ସଂସ୍କୃତି ଆମ ପରମ୍ପରା
ଜଗତେ ଅଟେ ନିଆରା,
ବାରମାସେ ତେର ପରବ ପାଳନେ
ହସି ଉଠୁଥାଏ ଧରା ||
ମାର୍ଗଶିର ମାସେ ଲକ୍ଷ୍ମୀଙ୍କ ପୂଜନ
ହୁଏ ପ୍ରତି ଗୁରୁବାର
ଘରର ଘରଣୀ ସଅଳ ଉଠିଣ
ଲିପାପୋଛା ଘରଦ୍ୱାର ||
ସ୍ନାନାଦି ସକଳ ନିତ୍ୟକର୍ମ ସାରି
ଝୋଟି ଆଙ୍କେ ଆସ୍ଥାନରେ
ପଦ୍ମଫୁଲ ସାଥେ ଲକ୍ଷ୍ମୀ ପାଦପଦ୍ମ
କରଇ ବଡ଼ ସୁନ୍ଦରେ ||
ଧୂପ ନଇବେଦ୍ୟ କରଇ ଅର୍ପଣ
ଵିଧି ଆଉ ବିଧାନରେ
ତିନି ପାଳି ପୂଜି ଚତୁର୍ଥ ପାଳିକୁ
ମାଣବସା ପର୍ବ ପାଳେ ||
ରାତ୍ରିର ଚତୁର୍ଥ ପ୍ରହରୁ ଉଠିଣ
ଘରଦ୍ୱାର ଲିପି ପୋଛି
ସ୍ନାନଶୌଚ ଆଦି ନିତ୍ୟକର୍ମ ସାରି
ଝୋଟିଚିତା ଆଙ୍କେ ବସି ||
ନାନାବିଧ ପିଠା ଘରେ ସେ କରଇ
ଲକ୍ଷ୍ମୀଙ୍କ ଆସ୍ଥାନେ ରଖେ
ମାଆଙ୍କୁ ସଜାଏ ଖଟୁଲି ଉପରେ
ନାନାବିଧ ଫୁଲ ସାଥେ ||
ଶୁକଳ ଧାନକୁ ମାଣରେ ପୂରାଇ
ଧାନ ବେଣ୍ଟି ରଖେ ପାଖେ
ଧାନମାଣ ପରେ ଗୁଆ ତିନିଗୋଟି
ଯତନେ ସଜାଇ ରଖେ ||
ଆଖୁ ମୂଳା, କ୍ଷୀର କଦଳୀ ସାକର
ପଞ୍ଚାମୃତ ରଖେ ନେଇ
ଧୂପ ଦୀପ ନଇବେଦ୍ୟ ଅରପିଣ
ପୂଜା ବହି ପଢିଥାଇ ||
ପ୍ରଥମରେ ବାଳ ଧୂପ ସେ ଦିଅଇ
ତାପରେ ଶଙ୍ଖୁଡି ଭୋଗ
ଵିଧି ବିଧାନରେ ତିନି ଧୂପ ଦେଇ
ପୂଜେ ଲକ୍ଷ୍ମୀ ପାଦ ପଦ୍ମ ||
ଜୟ ମହାଲକ୍ଷ୍ମୀ ମା’ଲୋ ଅନ୍ନପୂର୍ଣ୍ଣା
ଜଗତ ରକ୍ଷା କାରିଣୀ
ଦୁଃଖି ରଙ୍କି କେହି ସଂସାରେ ନରହୁ
କରୁଣାକର ଜନନୀ ||
ବନ୍ଧୁଗାଁ,କୋରାପୁଟ
