ଫୁଟେ ସିନା ଫୁଲ କଢ଼

     ବେଣୁଧର ସୂତାର

ଖରାମାରେ ଚାଇଁ ଚାଇଁ

ଢୋଲବାଜେ ଢାଇଁ ଢାଇଁ 

ପୋଖରିରେ ଫୁଟେ କଇଁ

ପିଆଜ ରେ ହୁଏ ସାଇଁ

ଆଖିଥାଇ ସେତ ଅନ୍ଧ ମଧ୍ୟେ ଗଣା

ପାଠ ଯିଏ ପଢ଼ି ନାହିଁ ।।

ତେଲଫୁଟେ ଟକ ଟକ

ବେଙ୍ଗ ଡିଏ ଫକ ଫକ

କଇଁଚ କାଢିଛି ବେକ

ଗାଡ଼ିରେ ଲାଗିଛି ଚକ

ଏକଥା ବାବୁରେ ମନେ ରଖୂଥିବ

ଭେକଥିଲ ମିଳେ ଭିକ ।।

ମେଘ ବର୍ଷେ ଟପ ଟପ

ବତୀକରେ ଧପ ଧପ

ବୁଲା ପାରିଦିଏ ସପ

ଆଈମା କହନ୍ତି ଗପ

ବାଡି ଗଡିଆ ରେ ଶେଉଳ ମାଛଟି

ଡେଉଁ ଥାଏ ଖପ ଖପ ।।

ବାଡ଼ିରେ ଲଗାଅ ଗଛ

ଅନାବନା ଘାସ ବାଛ

ଗାଡି ଚାଲେ ଆଗପଛ

ନକହିବ ଖଚ ମିଛ

ପାଣି ପବନକୁ ଅସନା ନକରି

ପରିବେଶ ରଖ ସ୍ୱଛ ।।

ନିଜକାମ ନିଜେ କର

ମନରେ ନରଖ ଡର

ହୁଅ ନାହିଁ ତର ତର

ଗୁରୁଜନେ ଭକ୍ତି କର

ଧୀର ପାଣି ସିନା ପଥର କାଟଇ

ବିପଦରେ ଧର୍ଯ୍ୟ ଧର ।।

ପାଠରେ ଲଗାଅ ମନ

ପାଠରୁ ମିଳଇ ଜ୍ଞାନ

ସଞ୍ଚୟ କରିବ ଧନ

ବିନୟେ ତୋଷିବ ଜନ

ବାଲ୍ୟକାଳୁ ଧର୍ମ ଧନ ଅରଜିବ

ସମୟକୁ ରଖି ଧ୍ୟାନ ।।

ପିତା ମାତା ଠାରେ ଭକ୍ତି 

ଭକ୍ତିରୁ ମିଳଇ ଶକ୍ତି

କରନି ଅଯଥା ଯୁକ୍ତି

ଅଳପେ ଲଭିବ ତୃପ୍ତି

ଠିକଣା ସମୟେ ଉପଚାର କଲେ

ରୋଗରୁ ମିଳିବ ମୁକ୍ତି ।।

ଭଲକରି ପାଠପଢ଼

ନିଜ ଭବିଷ୍ୟତ ଗଢ଼

ସମୟ ସାଥିରେ ଲଢ଼

ଜୀବନ ଚରିତ୍ର ବଡ

ଫୁଟିଲା ଫୁଲକି ଫୁଟେ ଆଉଥରେ

ଫୁଟେସିନା ଫୁଲକଢ଼ ।।

କେଶଦୁରାପାଳ କେନ୍ଦୁଝର