ଢେଙ୍କାନାଳ (ମସୀହା)୨୯/୧୧/ ଢେଙ୍କାନାଳ ଜିଲ୍ଲା ନିହଲପ୍ରସାଦ ଥାନା ଅଞ୍ଚଳରେ ରହିଥିବା କ୍ରସରଗୁଡିକ ବିରୋଧରେ ଏବେ ମାଳ ମାଳ ଅଭିଯୋଗ ନେଇ ଗ୍ରାମବାସୀ ଜିଲ୍ଲାପାଲଙ୍କ ଦ୍ୱାରସ୍ଥ ହେଉଛନ୍ତି । ନିହଲପ୍ରସାଦ ରାଜସ୍ୱ ମୌଜାରେ ରହିଥିବା ଜଗବନ୍ଧୁ ଷ୍ଟୋନ୍ କ୍ରସର ବ୍ୟାପକ ପ୍ରଦୂଷଣ କରୁଥିବା ନେଇ ପ୍ରଥମେ ଗ୍ରାମବାସୀ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସି ଧାରଣାରେ ବସିଥିଲେ । ତେବେ ଏହାରି ପଛରେ ଅନ୍ୟ ଜଣେ କ୍ରସର ମାଲିକଙ୍କ ପ୍ରଚ୍ଛନ୍ନ ହାତ ଥିବା ଜଣାପଡିଥିଲା । ତେବେ ସେହି କ୍ରସରମାଲିକଙ୍କୁ ପାନେ ଚଖାଇବା ପାଇଁ ମଙ୍ଗଳବାର ଅନ୍ୟ ଏକ ଗୋଷ୍ଠୀର ଶତାଧିକ ଗ୍ରାମବାସୀ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି । 
ନିହଲପ୍ରସାଦ ଅଞ୍ଚଳରେ ରହିଥିବା ଅରୁଣି ଷ୍ଟୋନ୍ କ୍ରସର ଗୋଟିଏ କ୍ରସର ଏନ୍ଓସି ପାଇ ଆଉ ୨ଟି କ୍ରସର ବେଆଇନ୍ ଭାବେ ଚଳାଇଛି । ବସ୍ତିଠାରୁ କ୍ରସରର ଦୂରତା ୧୦୦ ମିଟର । କ୍ରସର ଧୂଳିରେ ଘରଦ୍ୱାର, ବିଲବାଡିରେ ଧୂଳି ଆଚ୍ଛାଦିତ ହୋଇଯାଉଛି । ଦିନକୁ ୨ ଶହ ଟ୍ରିପ୍ ପଥର ଏହି କ୍ରସରରେ ପେଶା ଯାଉଛି । ନିହଲପ୍ରସାଦ ରୋଡ୍ ମେଟାଲ-୧ ଖଣିକୁ ଏହି କ୍ରସର ମାଲିକ କାଟି ପୋଖରୀରେ ପରିଣତ କରିଦେଲେଣି । ଏହାଦ୍ୱାରା କିଡ୍ନୀ ରୋଗ ବ୍ୟାପୁଛି । ଆସନ୍ତା ୭ ଦିନ ମଧ୍ୟରେ ଏହି କ୍ରସରକୁ ବନ୍ଦ କରାନଗଲେ ଗ୍ରାମବାସୀ ଢେଙ୍କାନାଳ-ଯାଜପୁର ରାସ୍ତାକୁ ଅବରୋଧ କରିବେ ବୋଲି ନିହଲପ୍ରସାଦ ପୂର୍ବତନ ସରପଞ୍ଚ ତାପସ କୁମାର ସାହୁ, ସଂଜୀବ ଧଳ, କୁଶ ଜେନା, ମଳୟ କୁମାର ଜେନା, କ୍ଷୀରୋଦ ମହାନ୍ତି ପ୍ରମୁଖ ଦାବି କରିଛନ୍ତି । ତେବେ ଅନ୍ୟ ଏକ କ୍ରସରକୁ ବନ୍ଦ କରିବା ପାଇଁ ଷଡଯନ୍ତ୍ର କରିଥିବା ଅରୁଣି ଷ୍ଟୋନ୍ କ୍ରସର ମାଲିକ ଅଜିତ କୁମାର ସାହୁଙ୍କ ପାଇଁ ଅଡୁଆ ବଢିଛି ।
ଢେଙ୍କାନାଳରୁ ନାୟକ ଅକ୍ଷୟ ରାଜହସ୍ତୀ ଙ୍କ ସହ ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
