କୋକସରା,୧୦/୧୨- କଳାହାଣ୍ଡି ଓ ନବରଙ୍ଗପୁର ସୀମା କୋକସରା ବ୍ଲକ ଆମପାଣି ଥାନା ଅନ୍ତର୍ଗତ ଆମପାଣି ଘାଟି ରାସ୍ତାରେ ଗୁରୁବାର ମଧ୍ୟାହ୍ନରେ ଏକ ପେଟ୍ରୋଲ, ଡିଜେଲ ବୋଝେଇ ଟ୍ୟାଙ୍କର ଭାରସାମ୍ୟ ହରାଇ ଦୁର୍ଘଟଣା ଗ୍ରସ୍ତ ହୋଇ ଓଲଟି ପଡ଼ିଥିଲା । ଏନେଇ ଆମପାଣି ପୁଲିସ ଖବର ପଇବା ପରେ କୋକସରା ଓ ପାପଡାହାଣ୍ଡି ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ଦୁଇ ପଟରୁ ରାସ୍ତାକୁ ସୁରକ୍ଷା ଦୃଷ୍ଟିରୁ ବନ୍ଦ କରିଥିଲେ। 
ପରେ ଘଟଣାସ୍ଥଳରେ ଜିଲ୍ଲା ପ୍ରସାସନିକ ଅଧିକାରୀ ଓ ଭାରତ ପେଟ୍ରୋଲିୟମର ଅଧିକାରୀ ପହଞ୍ଚି ଅଗ୍ନିଶମ ବିଭାଗ କର୍ମଚାରୀଙ୍କ ସହାୟତାରେ ରାସ୍ତାରୁ ଟ୍ୟାଙ୍କରକୁ ହଟାଇବା ପାଇଁ କ୍ରେନ ସାହାଯ୍ୟରେ ଉଦ୍ଧାର କାର୍ଯ୍ୟ ସମ୍ପାଦନ କରିଥିଲେ। ପ୍ରାୟ ଦଶ ଘଣ୍ଟାରୁ ଊର୍ଦ୍ଧ୍ବ ସମୟ ଧରି ଏହି ପ୍ରକ୍ରିୟା ପରେ ରାତି ୧୧ ଟା ପରେ ରାସ୍ତାରେ ଯାନବାହାନ ଗମନାଗମନ ସ୍ୱାଭାବିକ ହୋଇଥିଲା। ତେବେ ୧୦ ଘଣ୍ଟା ଧରି ଘାଟି ରାସ୍ତାର ଉଭୟ ପାର୍ଶ୍ଵରେ ଶହ ଶହ ସଂଖ୍ୟକ ଗାଡି ମୋଟର ଓ ଯାତ୍ରୀ ଅଟକି ରହିଥିଲେ। ରାସ୍ତାରୁ ଟ୍ୟାଙ୍କର ହଟିବା ପରେ ଗାଡି ମୋଟର ଚଳାଚଳ ସ୍ବାଭାବିକ ହୋଇଥିଲା।
ମସିହା ନିଉଜ ସର୍ଭିସ୍
