ସମିତି ସଭ୍ୟ ସଭ୍ୟାଙ୍କୁ ଚିଠି ହୋଇନଥିବାରୁ ବୈଠକରେ ହୋହଲ୍ଲା ସହ ରାଇଘର ମୁଖ୍ୟ ବଜାର ଓ ପୋଖରୀ ଜବରଦଖଲ ନେଇ ଉତେଜନା
ରାଇଘର ବ୍ଲକ ସ୍ଥିତ ସମ୍ମିଳନୀ କକ୍ଷ ଠାରେ ମଙ୍ଗଳବାର ସମିତି ବୈଠକ ଅନୁଷ୍ଠିତ ହୋଇଯାଇଛି | ସ୍ଥାନୀୟ ବିଡିଓ ଦେବାଶିଷ କର ଙ୍କ ସଭାପତିତ୍ୱ ରେ ଆୟୋଜିତ ଏହି ବୈଠକରେ ମୁଖ୍ୟଅତିଥି ଭାବେ ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ ଯୋଗ ଦେଇଥିବା ବେଳେ ସମ୍ମାନନୀୟ ଅତିଥି ଭାବେ ବିକେବିକେ ଉପଦେଷ୍ଟା ସୁକଦେବ ଗଣ୍ଡ , ବ୍ଲକ ଅଧ୍ୟକ୍ଷା ନବୀନା ନାୟକ , ଜିଲ୍ଲାପରିଷଦ ଉପାଧ୍ୟକ୍ଷା ଲିପିକା ବାରୋଇ , ଜିଲ୍ଲାପରିଷଦ ସଭ୍ୟ ଯତୀନ୍ଦ୍ର ଗଣ୍ଡ , ନାନାରା ଖରା , ଖଗେଶ୍ବର ହରିଜନ , ବ୍ଲକ ଉପାଧ୍ୟକ୍ଷ ଗୁପ୍ତ ପ୍ରସାଦ ଝାଙ୍କର , ସହକାରୀ ଯନ୍ତ୍ରୀ ସିଦ୍ଧାର୍ଥ ରଣା, ଏବିଡିଓ ବିଜୟ କୁମାର ସେଠୀ ଓ ଜିପିଓ ଦାୟିତ୍ୱରେ ଥିବା ଅଜିତ କୁମାର ନନ୍ଦ ଯୋଗ ଦେଇଥିଲେ |
ଶ୍ରୀ ନନ୍ଦ ପୁର୍ବ ବୈଠକ ର ବିବରଣୀ ପାଠ କରିବା ପରେ, ବୈଠକର ପ୍ରଥମ ପର୍ଯ୍ୟାୟରେ ରାଜସ୍ୱ ବିଭାଗ ନିଜ ବିବରଣୀ ପାଠ କରିଥିଲେ | ସ୍ଥାନୀୟ ବ୍ଲକରେ ୧୨୦୯୫ ପଟ୍ଟା ପ୍ରଦାନ କରାଯାଇଥିବା ବେଳେ ବର୍ତ୍ତମାନ ମଧ୍ୟ ଆବେଦନ ଜାରୀ ରହିଛି ବୋଲି ଅତିରିକ୍ତ ତହସିଲଦାର ଜଗୁ ପୂଜାରୀ ପ୍ରକାଶ କରିଥିଲେ | ଅପରପକ୍ଷରେ ସ୍ଥାନୀୟ ରାଜାମୁଣ୍ଡା ପୋଖରୀ କଡ଼ରେ ଜବରଦଖଲ କରି ଦୋକାନ ଗୃହ ନିର୍ମାଣ କରାଯାଇଥିବା ବେଳେ ଏହାକୁ ଉଚ୍ଛେଦ କରିବାକୁ ରାଇଘର ସରପଂଚ ଦାବୀ କରିଥିଲେ | ଏଥିସହିତ କୁରୁବେଲା ଠାରେ ଭାରତ ମାଳା ଯୋଜନାରେ ମନ ଇଛା ସ୍ଥାନରେ ମାଟି ଓ ମରମ ଖୋଳା ଯାଉଥିବା ବେଳେ ଏଥିରେ ଲୋକଙ୍କ ଧନଜୀବନ ନଷ୍ଟ ହେଉଥିବା ଅଭିଯୋଗ ହୋଇଥିଲା | ଏଥିସହିତ ସୋନପୁର ଯିବା ରାସ୍ତା କଡ଼ରେ ହୋଇଥିବା ଜବରଦଖଲ କୁ ଆସନ୍ତା ୩ ଦିନ ମଧ୍ୟରେ ଉଚ୍ଛେଦ କରାଯିବ ବୋଲି ରାଜସ୍ୱ ବିଭାଗ ପକ୍ଷରୁ ପ୍ରତିଶୃତି ମିଳିଥିଲା l ଏହାପରେ ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ପ୍ରଦାନ କରାଯାଇଥିଲା | ଚଳିତ ବର୍ଷ କୋଭିଡ଼୍ ଟିକା ସମ୍ପର୍କରେ ଆଲୋଚନା କରାଯାଇଥିବା ସହିତ ଆଗାମୀ ଦିନରେ ଗୋନା ସ୍ଥିତ ମେଡିକାଲକୁ ଏନଜିଓ ନିକଟରେ ହସ୍ତାଂତର କରାଯିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଥିଲା | ଏହାପରେ ସ୍ଥାନୀୟ ସମନ୍ନିତ ଶିଶୁ ବିକାଶ ବିଭାଗ ପକ୍ଷରୁ ସିଡ଼ିପିଓ ଗୀତାଂଜଳି ମିଶ୍ର ବିବରଣୀ ପାଠ କରିଥିଲେ | ସ୍ଥାନୀୟ ବ୍ଲକରେ ୩୧୩ କେନ୍ଦ୍ର ରହିଥିବା ବେଳେ ୩ ଗୋଟି କେନ୍ଦ୍ରରେ ଅଙ୍ଗନବାଡି କର୍ମୀ ନଥିବା ପ୍ରକାଶ କରିଥିଲେ |
ବୈଠକରେ ବ୍ଲକର ସମିତି ସଭ୍ୟ ସଭ୍ୟାଙ୍କୁ ନିମନ୍ତ୍ରଣ କରାଯାଇ ନଥିବା ଅଭିଯୋଗ କରି ଗୃହରେ ହଟ୍ଟଗୋଳ କରିଥିଲେ | ଆଗାମୀ ଦିନରେ ଏଥିପ୍ରତି ଦୃଷ୍ଟି ନ ଦେଲେ ବ୍ଲକ ଉପାଧ୍ୟକ୍ଷ ଶ୍ରୀ ଝାଙ୍କରଙ୍କ ନେତୃତ୍ବରେ ବୈଠକ ବର୍ଜନ କରିବାକୁ ନିଷ୍ପତ୍ତି ନିଆଯାଇଥିଲା l ଏହା ପରେ ଜଳ ଓ ପରିମଳ ବିଭାଗ ପକ୍ଷରୁ ୧୦୩ ଗ୍ରାମରେ ଜଳ ଜୀବନ ମିଶନ ଯୋଜନାରେ ଜଳ ଯୋଗାଣ ବ୍ୟବସ୍ଥା କରାଯାଇଛି ବୋଲି ସୂଚନା ପ୍ରକାଶ ପାଇଥିଲା | ଗୋନା ଭାରସୁଣ୍ଡି ଆଦିବାସୀ ଗ୍ରାମରେ ବସୁଧା ଯୋଜନାରେ ଜଳ ଯୋଗାଣ ବ୍ୟବସ୍ଥା ରହିଥିବା ବେଳେ ଦୁଇ ବର୍ଷ ଧରି ବନ୍ଦ ରହିଥିବା ଯୋଗୁଁ ଜଳ ଯୋଗାଣ ହୋଇ ପାରୁ ନଥିବା ଓ ତୁରୁପେନା ଗ୍ରାମରେ ଜଳ ଯୋଗାଣ ବ୍ୟବସ୍ଥା ବିପର୍ଯ୍ୟସ୍ତ ହୋଇଥିବା ବିଧାୟକ ଶ୍ରୀ ଗଣ୍ଡ ଅଭିଯୋଗ କରିଥିଲେ | ବିଭିନ୍ନ ସ୍ଥାନରେ ଜଳ ଯୋଗାଣ ନିମନ୍ତେ ପାଇପ ବିଛାଇବାକୁ ଖାଲ ଖୋଳି ମାଟି ରାସ୍ତା ଉପରେ ପାକାଇ ଦେଉଥିବା ଯୋଗୁଁ ଗାଡ଼ି ମଟର ଯାତାୟତ ରେ ଅସୁବିଧା ହେଉଥିବା ବିଷୟକୁ ନେଇ ବିଧାୟକ ଅଭିଯୋଗ କରିଥିଲେ | ଏଥିସହିତ ବିଭିନ୍ନ ଗ୍ରାମରେ ଜଳ ଯୋଗାଣ ବ୍ୟବସ୍ଥା ବିପର୍ଯ୍ୟସ୍ତ ହୋଇଥିବା ଉପସ୍ଥିତ ଜନପ୍ରତିନିଧି ଅଭିଯୋଗ କରିଥିଲେ | ଏହି ବୈଠକରେ କୃଷି ବିଭାଗ ପକ୍ଷରୁ ବିବରଣୀ ପାଠ କରାଯାଇଥିଲା | ସ୍ଥାନୀୟ ବ୍ଲକରେ ଅର୍ଗାନିକ ଚାଷ ହେଉନଥିବା କୃଷି ବିଭାଗ ପକ୍ଷରୁ ପ୍ରକାଶ ହୋଇଥିବା ବେଳେ ଜନ ପ୍ରତିନିଧି ମାନେ ଏ ନେଇ କାହିଁକି ସଚେତନତା ସୃଷ୍ଟି କରାଯାଉ ନାହିଁ ବୋଲି ପ୍ରଶ୍ନ କରିଥିଲେ | ସେହିଭଳି ଶିକ୍ଷା ବିଭାଗ ପକ୍ଷରୁ ବିବରଣୀ ପାଠ କରିବାକୁ ଯାଇ ସ୍ଥାନୀୟ ବ୍ଲକରେ ଆବଶ୍ୟକ ଥିବା ୩୯୧ ଶିକ୍ଷକ ପଦବୀ ଖାଲି ପଡ଼ିଥିବା ବିଇଓ ଇଶ୍ବର ମାଝୀ ପ୍ରକାଶ କରିଥିଲେ | ଏଥିସହିତ ଜୋଡିଙ୍ଗା ଠାରେ ୫ଟି ଯୋଜନାରେ ନିର୍ମାଣ କରାଯାଉଥିବା ଶ୍ରେଣୀ ଗୃହର ଛାତ ନିମ୍ନ ମାନର ହେଉଥିବା ବିଧାୟକ ଶ୍ରୀ ଗଣ୍ଡ ଅଭିଯୋଗ କରିଥିଲେ | ଏଥିସହିତ ମତ୍ସ୍ୟ ବିଭାଗ , ପଶୁ ଚିକିତ୍ସା ବିଭାଗ ସମେତ ଅନ୍ୟାନ୍ୟ ବିଭାଗ ପକ୍ଷରୁ ବିବରଣୀ ପାଠ କରାଯାଇଥିଲା | ଏହି ବୈଠକରେ ସମସ୍ତ ସରପଞ୍ଚ ଓ ସମିତି ସଭ୍ୟ ସଭ୍ୟା ସହିତ ଲାଇନ୍ ବିଭାଗର କର୍ମଚାରୀ ଉପସ୍ଥିତ ଥିଲେ
ରାଇଘର ରୁ କିରଣ କୁମାର ପଟ୍ଟନାୟକ ଙ୍କ ରିପୋର୍ଟ୍
