ଡାବୁଗାଁ, ୨/୩ (ମ.ନି.ସ.) – ନବରଙ୍ଗପୁର ଜିଲା ଡାବୁଗାଁ ବ୍ଲକ ବଡଓଲମା ଗ୍ରାମ ପଞ୍ଚାୟତ ସଦର ମହକୁମା ବଡଓଲମା ଉନ୍ନୀତ ଉଚ୍ଚ ବିଦ୍ୟାଳୟରେ ଅଭିଭାବିକା /ଅଭିଭାବକ ଓ ଶିକ୍ଷକ, ଶିକ୍ଷୟତ୍ରୀ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏହି ଅବସରରେ ବିଦ୍ୟାଳୟ ପରିଚାଳନା କମିଟିର ସଭାପତି ଜଗଦିଶ ଭତ୍ରାଙ୍କ ସଭାପତିତ୍ଵରେ ସରପଞ୍ଚ ବୁଦାଇ ଭତ୍ରା ମୁଖ୍ୟ ଅତିଥି ରହିଥିବାବେଳେ ପ୍ରଧାନ ଶିକ୍ଷକ ରଞ୍ଜନ କୁମାର ବେହେରା ଓ ତାଙ୍କ ସମସ୍ତ କର୍ମଚାରୀଵୃନ୍ଦ ସହଯୋଗ କରିଥିଲେ । ଗେଟ ଆଗରେ ସ୍ଵାଗତ ସମ୍ବର୍ଦ୍ଧନା ଝୋଟି ପକାଇ ଅଭିଭାବିକା, ଅଭିଭାବକ ମାନଙ୍କୁ ଛାତ୍ରୀମାନଙ୍କ ଦ୍ଵାରା ପାଦ ଧୋଇ ଦେଇ, ଚନ୍ଦନ ଟିକା ଲଗାଇଦେବାପରେ ସମ୍ମିଳନୀ ଗୃହକୁ ପାଛୋଟି ନେଉଥିଲେ । ସମ୍ମିଳନୀରେ ବିଦ୍ୟାଳୟ, ଛାତ୍ର/ଛାତ୍ରୀ ମାନଙ୍କ ସମସ୍ୟା ଉପରେ ବ୍ୟାପକ ଆଲୋଚନା କରାଯାଇ ସମସ୍ୟାର ସମାଧାନ ଉପରେ ସମସ୍ତଙ୍କୁ ଅବଗତ କରାଇଥିଲେ । ସମସ୍ତେ ସମସ୍ତଙ୍କର ମତ ଆଦାନ ପ୍ରଦାନରେ ସମ୍ମିଳନୀ କକ୍ଷ ବେଶ ସରଗରମ ହୋଇ ଥିଲା । ଆଲୋଚନା ପରେ ସମସ୍ତ ଅଭିଭାବିକା/ଅଭିଭାବକମାନଙ୍କୁ ଧନ୍ୟବାଦ ପ୍ରଦାନ କରାଗଲା ପରେ ସଭା ସାଙ୍ଗ କରାଯାଇଥିଲା । ସମସ୍ତ ଉପସ୍ଥିତ ଅଭିଭାବିକା ଓ ଅଭିଭାବକ ମାନଙ୍କ ସହ ସମସ୍ତ ଛାତ୍ର/ଛାତ୍ରୀମାନଙ୍କୁ ମଧ୍ୟାହ୍ନ ଭୋଜନ ଦିଆଯାଇଥିଲା ।
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
