ରାଇଘର : ୧୭/୪ ନବରଙ୍ଗପୁର ଜିଲ୍ଲା ଅନ୍ତର୍ଗତ ରାଇଘର ବ୍ଲକ୍ ର ସଦର ମହକୁମାରେ ଅବସ୍ଥିତ ଜଗନ୍ନାଥ ମନ୍ଦିର ସମ୍ମୁଖରେ ସୋମବାର ସକାଳୁ ଦେଖିବାକୁ ମିଳିଥିଲା ମାଓ ପୋଷ୍ଟର l ଏହି ପୋଷ୍ଟର ମାଧ୍ୟମରେ CRPF କ୍ୟାମ୍ପ କୁ ବିରୋଧ କରି ମୁଖ୍ୟ ବଜାର ଉପରେ ନିଜର ଉପସ୍ଥିତି ଜାହିର କରି ଥିବା ବେଳେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି କରିଛି |
ଖବର ଅନୁଯାୟୀ, ଗତ କିଛି ଦିନତଳେ ଛତିଶଗଡ଼ ସୀମାକୁ ଲାଗି ରହିଥିବା ରାଇଘର ବ୍ଲକ୍ ର ହାତିଗାଁ ଅଞ୍ଚଳରେ ଜଣେ ଯୁବକ କୁ ମାଓବାଦୀ ହତ୍ୟା କରିଥିଲେ | ଏହାପରେ ସେହି ଗ୍ରାମ କୁ ପୋଲିସ ବିଭାଗର ଉଚପଦସ୍ଥ ଅଧିକାରି ବାରମ୍ବାର ଗସ୍ତ କରି ସେଠାରେ ଏକ ପୋଲିସ କ୍ୟାମ୍ପ ବସାଇ ଥିଲେ l ଆଜି ମୈନପୁର -ନୂଆପଡ଼ା (ମାଓବାଦୀ ) ସଂଗଠନ ପକ୍ଷରୁ ଏହି କ୍ୟାମ୍ପ କୁ ବିରୋଧ କରି ରାଇଘର ମୁଖ୍ୟ ବଜାର ଉପରେ ପୋଷ୍ଟର ମାରି ଥିବା ଦେଖିବାକୁ ମିଳିଥିଲା l ଏହି ପୋଷ୍ଟର ମାଧ୍ୟମରେ ସେମାନେ ତୁରନ୍ତ କ୍ୟାମ୍ପ କୁ ବନ୍ଦ କରିବା ପାଇଁ ଆନ୍ଦୋଳନ କରିବାକୁ ହାତିଗାଁ ଅଞ୍ଚଳ ବାସୀଙ୍କୁ ତାଗିଦ କରିଛନ୍ତି | ଏହି କ୍ୟାମ୍ପ ବସାଇ ବା ପାଇଁ ଗ୍ରାମସଭା ହୋଇ ନ ଥିବା ବେଳେ ଅଂଚଳର ୧୩ ଜଣ ବ୍ୟକ୍ତି ପୋଲିସ ର ସୁଚନାଦାତା ସାଜି ସେଠାରେ କ୍ୟାମ୍ପ କରିବାକୁ ସହଯୋଗ କରିଥିବା ଦର୍ଶାଇ ଥିବା ବେଳେ ତୁରନ୍ତ ଏହି କ୍ୟାମ୍ପ ସେଠାରୁ ହଟାଇବା ପାଇଁ ଚେଷ୍ଟା କରନ୍ତୁ, ନଚେତ୍ ଏହି ବ୍ୟକ୍ତି ମାନଙ୍କୁ ଜନ ଅଦାଲତରେ ମୃତ୍ୟୁ ଦଣ୍ଡ ଦେବାକୁ ଚେତାବନୀ ଦେଇଛନ୍ତି l ପୋଲିସ କ୍ୟାମ୍ପ ହେଲେ ଅଂଚଳର ମହିଳା ମାନଙ୍କ ପ୍ରତି ଅତ୍ୟାଚାର ବଢିବ ଓ ସାଧାରଣ ଲୋକ ମାନେ ହଇରାଣ ହେବେ l ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ଫାସିବାଦ୍ ଦମନ ନିତି କୁ ବିରୋଧ କରି ବା ପାଇଁ ଏହି ପୋଷ୍ଟର ମାଧ୍ୟମରେ ମାଓବାଦୀ ସଂଗଠନ ପକ୍ଷରୁ ଆହ୍ବାନ ଦିଆ ଯାଇଛି l ରାଇଘର ମୁଖ୍ୟ ବଜାର ଉପରେ ନିଜର ଉପସ୍ଥିତି ଜାହିର କରି ପୋଷ୍ଟର ମାରି ପୋଲିସ କୁ ଖୋଲା ଚାଲେଂଜ କରିଥିବା ଦେଖିବାକୁ ମିଳିଛି l