ଆ’ ପଢ଼ିଯିମା ପାଠ୍
ସୁଶାନ୍ତ ରଣା
ଏ ଭାଏ, ଏ ବୁହେନ୍
ଆ’ ପଢ଼ିଯିମା ପାଠ୍
ପାଠ୍ ବିନେ ଇ ସଂସାର ଅନ୍ଧାର୍
ଉଁକିଆ ଦେଖାବା ପାଠ୍
ଏ ଭାଏ, ଏ ବୁହେନ୍…..!
ପାଠ୍ ବିନେ ଦିନେ
ହେଉଥିଲା ଚଲି
ସମିଆଁ ଗଲାନ ବଦଲି
ପାଠ୍ ଦି’ ଅଖର୍ ନି ପଢ଼ି ଥିଲେ
ଇ ସଂସାର ଦେବା ହସିଁ !
ଏ ଭାଏ, ଏ ବୁହେନ୍…..!!
ମାଷ୍ଟ୍ରେର୍,
ସେ ଦିନ ଆରୁ ନାଇଁନ
ମାଡ୍ କେ ଡର୍ ନାଇଁନ
ହସି ଖେଲେଇ ଆମକେ,
ମାଷ୍ଟ୍ରେ ପଢ଼ାବେ ପାଠ୍
ପାଠ୍ ଦେଖାବା ବାଟ୍ !
ଏ ଭାଏ, ଏ ବୁହେନ୍…..!!
ପାଠର୍ ପିଠି,
ଆମର୍ ଲୋକ୍ ଚଢ଼ି
ଦେଖ୍ ଲେ ଜନ୍ ମଙ୍ଗଲ୍
ଘର୍ କରି ତହିଁ ରହିହେବା କହନ୍
ଦେଖଦେଖ୍ ପାଠର୍ ଗୁନ୍
ଏ ଭାଏ, ଏ ବୁହେନ୍…..!!
କେତେ ଦିନ ଆରୁ
ଅନ୍ ପଢ଼ା ହେଇ
ମୁରୁଖ୍ ନେ ହେମା ଗଣା
ଆ’ ପଢ଼ମା ଲେଖ୍ ମା
ଆମେ ନୁହେଁ ଭକୁଆ !
ଧରଧର୍ ସିଲଟ୍ ଖଡ଼ି
ସମିଆଁ ଗଲା ନ ଗଡ଼ି
ଏ ଭାଏ, ଏ ବୁହେନ୍
ଆ’ ପଢ଼ିଯିମା ପାଠ୍…..!!
ସୁଶାନ୍ତ ରଣା
ତେରେସିଂହା, କଳାହାଣ୍ଡି
