ରାଇଘର ୫/୫ ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ କୁନ୍ଦେଇ ପୁଲିସ ଜଣେ ଫେରାର୍ ଏଲଆଈସି ଏଜେଣ୍ଟଙ୍କୁ ଗିରଫ କରିଥିବା ଜଣାପଡିଛି | ଗିରଫ ଏଜେଣ୍ଟ ଜଣକ ହେଲେ ହାଟଭରାଣ୍ଡି ଗ୍ରାମର ଶତୃଘ୍ନ ନାୟକଙ୍କ ପୁଅ ପଞ୍ଚାନନ ନାୟକ ଏବଂ ସେ ଓଡ଼ିଶା ଓ ଛତିଶଗଡ଼ ଅଞ୍ଚଳରୁ ପ୍ରାୟ ୨୦ ଲକ୍ଷରୁ ଉର୍ଦ୍ଧ୍ବ ଟଙ୍କା ହଡ଼ପ କରିଥିବା କୁନ୍ଦେଇ ଥାନାରେ ଅଭିଯୋଗ ହୋଇଥିଲା |
ସୂଚନା ଅନୁଯାୟୀ ପଞ୍ଚାନନ ଜଣେ ଏଲଆଈସି ଏଜେଣ୍ଟ ଭାବେ କାମ କରୁଥିବା ବେଳେ ସେ ରାଇଘର ବ୍ଲକ ତଥା ଛତିଶଗଡ଼ ଅଞ୍ଚଳରେ ଲୋକଙ୍କୁ ବିମା କରୁଥିଲେ | କିନ୍ତୁ ବିମା ନାମରେ କିଛି ଦିନ ଟଙ୍କା ଆଦାୟ କରିବା ପରେ ସେ ଆଉ ଅଫିସ ରେ ପୈଠ ନକରି ସବୁତକ ହଡ଼ପ କରି ଦେଇଥିବା ଅଭିଯୋଗ ହୋଇଥିଲା | ମୂଖ୍ୟତଃ କୁନ୍ଦେଇ , ହାଟଭରଣ୍ଡି , ଯୋଡ଼ଜୋଙ୍ଗା, ଛେଳିଡଙ୍ଗରି, ରାଇଘର ଓ ପରଚିପାରା ଭଳି ବିଭିନ୍ନ ଅଂଚଳରୁ ପ୍ରାୟ ୨୦ ଲକ୍ଷ ଟଙ୍କାରୁ ଉର୍ଦ୍ଧ୍ବ ଟଙ୍କା ହଡ଼ପ କରିଥିବା ଅଭିଯୋଗ ହୋଇଥିଲା | ଏ ନେଇ କୁନ୍ଦେଇ ଥାନାରେ କିଛି ଲୋକ ଅଭିଯୋଗ କରିବା ଫଳରେ ସେ ଗତ ଏକ ବର୍ଷ ଧରି ଫେରାର ହୋଇ ଛତିଶଗଡ଼ ଅଞ୍ଚଳରେ ରହୁଥିଲେ l ଏପରିକି କିଛି ଦିନ ପୂର୍ବେ ପଞ୍ଚାନନଙ୍କ ଘର ସମ୍ମୁଖରେ ନକ୍ସଲ ପକ୍ଷରୁ ବ୍ୟାନର ମାରି ଲୋକଙ୍କ ଟଙ୍କା ଫେରାଇବାକୁ ଚେତାବନୀ ଦିଆଯାଇଥିଲା | ଅପରପକ୍ଷରେ ଗତକାଲି ପଞ୍ଚାନନ ହାଟଭରାଣ୍ଡି ଠାରେ କିଛି ସାଂଗ ମାନଙ୍କ ସହିତ ମଉଜ କରୁଥିବା ବେଳେ କୁନ୍ଦେଇ ପୁଲିସ ତାଙ୍କୁ ଗିରଫ କରିବାରେ ସଫଳ ହୋଇଥିଲା | ଏହି ଗିରଫ ସମୟରେ କୁନ୍ଦେଇ ଥାନା ଅଧିକାରୀ ପ୍ରଶାନ୍ତ କୁମାର ସେଠୀଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଥିଲା | ଆଜି ପଞ୍ଚାନନ ନାୟକଙ୍କୁ କୁନ୍ଦେଇ ଥାନା କେଶ୍ ନମ୍ବର ୪୩/୨୦୨୩ ରେ ଏକ ମାମଲା ଋଜ୍ଜୁ କରି କୋର୍ଟ ଚାଲାଣ କରାଯାଇଥିବା ଜଣାପଡିଛି |