ରାଉରକେଲା/ ସହରର ଚର୍ଚ୍ଚିତ ଉଦଘୋଷିକା ମୀନାକ୍ଷୀ ଧରଙ୍କ ଦ୍ବିତୀୟ ସ୍ମୃତି ଚାରଣ ସଭା ଓ ସ୍ମାରକୀ ଆଲୋଚନାଚକ୍ର ଆସନ୍ତା ୨୧ତାରିଖ ଦିନ ଆଦର୍ଶ ସାହିତ୍ୟ ଘର ଠାରେ ଅନୁଷ୍ଠିତ ହେବ ବୋଲି ଜଣାପଡ଼ିଛି । ମୀନାକ୍ଷୀ ଧର ଫାଉଣ୍ଡେସନର ଆବାହକ ନଳିନୀ କାନ୍ତ ଧରଙ୍କ ଆବାହକତ୍ବରେ କଲଚରାଲ ଏକାଡ଼େମୀ ଠାରେ ଆୟୋଜିତ ପ୍ରସ୍ତୁତି ବୈଠକରେ ବିଭିନ୍ନ କାର୍ଯ୍ୟକ୍ରମ ସଂପର୍କରେ ନିଷ୍ପତ୍ତି ନିଆଯାଇଛି । ନିଷ୍ପତ୍ତି ଅନୁଯାୟୀ ଆସନ୍ତା ୧୪ତାରିଖ ଦିନ ସେକ୍ଟର ୧୪ ଦିଲ୍ଲୀ ପବ୍ଲିକ୍ ସ୍କୁଲ ଠାରେ ସକାଳ ୮ ଘଟିକା ସମୟରେ ବିଦ୍ୟାଳୟ ସ୍ତରୀୟ ସାଧାରଣଜ୍ଞାନ ପରୀକ୍ଷା କରାଯିବ । ଦୁଇ ଭାଗରେ ବିଭକ୍ତ କନିଷ୍ଠ ବର୍ଗ ଷଷ୍ଠ ରୁ ଅଷ୍ଟମ ଶ୍ରେଣୀ ଓ ବରିଷ୍ଠ ବର୍ଗ ନବମ ରୁ ଦଶମ ଶ୍ରେଣୀର ଛାତ୍ର ଛାତ୍ରୀ ମାନେ ଏହି ପ୍ରତିଯୋଗିତାରେ ଅଂଶଗ୍ରହଣ କରିପାରିବେ। ଏଥିରେ 
କୃତୀତ୍ବ ହାସଲ କରିଥିବା ପ୍ରତିଯୋଗୀ ଙ୍କୁ ଆସନ୍ତା ୨୧ତାରିଖ କାର୍ଯ୍ୟକ୍ରମରେ ପୁରସ୍କୃତ କରାଯିବ । ସେହିପରି ଚଳିତ ବର୍ଷ ଉଦଘୋଷକ, ସାହିତ୍ୟ ଓ ସମାଜସେବା କ୍ଷେତ୍ରରେ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ବ୍ୟକ୍ତି ବିଶେଷଙ୍କୁ ସମ୍ବର୍ଦ୍ଧିତ କରାଯିବ । ଏହି କାର୍ଯ୍ୟକ୍ରମରେ ପ୍ରାକ୍ତନ ପ୍ରାଧ୍ୟାପକ ଡଃ ଶ୍ୟାମସୁନ୍ଦର ଧର ମୁଖ୍ୟ ଆଲୋଚକ ଭାବେ ଯୋଗଦେଇ ପଶ୍ଚିମ ଓଡିଶା ଲୋକ ସଂସ୍କୃତି – ସ୍ବରୂପ ସଂପର୍କରେ ଆଲୋଚନା ସହ ସ୍ବର୍ଗତା ଧରଙ୍କ ସ୍ମୃତି ଚାରଣ କରାଯିବ। ଏହି ପ୍ରସ୍ତୁତି ବୈଠକରେ ଶ୍ରୀ ଧରଙ୍କ ବ୍ୟତୀତ ସର୍ବଶ୍ରୀ ରାଜୀବ ପାଣି, ବ୍ରଜେନ୍ଦ୍ର ଦାଶ, ଶୈଳେନ୍ଦ୍ର ମହାନ୍ତି, ଶଙ୍କର ଜେନା, କୁଞ୍ଜବିହାରୀ ରାଉତ, ବିବେକାନନ୍ଦ ଦାସ, ନିରୁପମା ଦାଶ , ଆଲୋକ ଜେନା, ଅଶୋକ ପଟ୍ଟନାୟକ, ପ୍ରାଚୀ ଧର , ସ୍ମିତା ମିଶ୍ର, ସୂର୍ଯ୍ୟ ନାରାୟଣ ପାଢୀ, ସିଲି ମହାନ୍ତି ପ୍ରମୁଖ ଉପସ୍ଥିତ ଥିଲେ । ପ୍ରତିଯୋଗିତାର ବିଶେଷ ବିବରଣୀ ପାଇଁ ଛାତ୍ରଛାତ୍ରୀ ମାନେ ମୋବାଇଲ ନମ୍ବର ୭୦୦୮୨୫୫୫୦୯ ଓ ୮୨୪୯୫୮୭୦୯୩ ରେ ଯୋଗଯୋଗ କରିବା ପାଇଁ ଅନୁଷ୍ଠାନ ତରଫରୁ କୁହାଯାଇଛି । ସୂଚନା ଯୋଗ୍ୟ ଯେ ଗତ ଦୁଇବର୍ଷ ତଳେ ଏକ ଅଭାବନୀୟ ଦୁର୍ଘଟଣାରେ ମୀନାକ୍ଷୀଙ୍କ ମୃତ୍ୟୁ ଘଟିଥିଲା ।
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ
