କିଡ଼ିଙ୍ଗ-ବଞ୍ଜାରି ଘାଟି ରାସ୍ତାରେ ଗଛ ପଡ଼ି ରାସ୍ତା ଅବରୋଧ
ରାଜ୍ୟ ରାଜପଥକୁ ଜାତୀୟ ରାଜପଥରେ ପରିଣତ କରାଯାଉ
ଲାଞ୍ଜିଗଡ଼,୧୧/୦୩(ମ.ନି.ସ)-କଳାହାଣ୍ଡି ଜିଲ୍ଲା ପୂର୍ତ୍ତ ବିଭାଗର ଠିକାଦାର ପୋଷାନୀତି ଓ ଚରମ ଦୂରଦୃଷ୍ଟିର ଅଭାବ ଯୋଗୁଁ ଭବାନୀପାଟଣାରୁ ରାୟଗଡ଼ାକୁ ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥ କିଡ଼ିଙ୍ଗଠାରୁ ଛତିକୁଡ଼ା ଛକ ଯାଏଁ ରାସ୍ତା ମରଣଯନ୍ତା ପାଲଟିଥିବା ଅଭିଯୋଗ ହେଉଛି । ଜିଲ୍ଲା ପୂର୍ତ୍ତ ବିଭାଗ ପକ୍ଷରୁ କିଡ଼ିଙ୍ଗଠାରୁ ଛତିକୁଡ଼ା ଛକ ଯାଏଁ ପ୍ରାୟ ୧୦ କିମି ରାସ୍ତାକୁ ଉଦ୍ଦେଶ୍ୟମୂଳକ ଭାବେ ଟେଣ୍ଡର ପ୍ରକ୍ରିୟାରୁ ବାଦ୍ ଦିଆଯାଇଥିବାବେଳେ ଏହି ରାସ୍ତା ସାରା ଶହଶହ ଖାଲଖମା ଭର୍ତ୍ତି ହୋଇଛି । 
ବିଭିନ୍ନ ସ୍ଥାନରେ ଏହି ରାସ୍ତା ସଂକୀର୍ଣ୍ଣ ଓ ଅଣଓସାରିଆ ହୋଇଥିବା ବେଳେ ଦୈନନ୍ଦିନ ଶହଶହ ଭାରୀଯାନ ଯାତାୟତ କରୁଥିବା ଏହି ଅନ୍ତଃରାଜ୍ୟ ରାଜପଥ ପ୍ରତି ମୁହୂର୍ତ୍ତରେ ସତେ ଯେମିତି ମରଣକୁ ହାତଠାରି ଡାକୁଛି । ଦିନାତିଦିନ ଏହି ରାସ୍ତାରେ ଛୋଟବଡ଼ ଦୁର୍ଘଟଣା ଘଟି ଧନଜୀବନ ହାନୀ ହେଉଥିବାବେଳେ ଅତୀତରେ ରାସ୍ତା ଯୋଗୁଁ ପୂର୍ତ୍ତ ବିଭାଗର ଜଣେ ଯନ୍ତ୍ରୀ ମଧ୍ୟ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଏହାସତ୍ତ୍ୱେ ବିଭାଗ ଚେତିବା ତ ଦୂରର କଥା, ବାରମ୍ବାର ଅଭିଯୋଗ କଲେ, ଜନ ଅସନ୍ତୋଷ ବୃଦ୍ଧି ପାଇଲେ କେବେ କ୍ରସର ଗୁଣ୍ଡ ତ କେବେ ନାମକୁ ମାତ୍ର ପେଚ୍ ୱାର୍କ୍ କରି ନିଜ ଦାୟିତ୍ୱ ସାରିଦେଉଛି ।
ଏପରିସ୍ଥଳେ ଏହି ରାସ୍ତାରେ ଏବେ ବିପଦ ଭାବେ ଠିଆ ହୋଇଛି ରାସ୍ତା କଡ଼ରେ ଥିବା ବିଶାଳକାୟ ଓ ପୁରୁଣା ଗଛ ସବୁ । ରାସ୍ତା କଡ଼ରେ ମୁଣ୍ଡ ଟେକି ଠିଆ ହୋଇଥିବା ଅନେକ ଗଛ ବହୁ ପୁରୁଣା ଓ ବିପଦ ସଂକୁଳ ହୋଇଥିଲେ ହେଁ ପୂର୍ତ୍ତ ବିଭାଗ ଏଥିପ୍ରତି ଆଦୌ ଦୃଷ୍ଟି ଦେଉନାହିଁ । ଯାହାଫଳରେ ଏହି ରାସ୍ତାର କିଡ଼ିଙ୍ଗ-ବଞ୍ଜାରି ଘାଟି ରାସ୍ତା ଉପରେ ଏକ ବିରାଟ ଗଛ ପଡ଼ିଯିବାରୁ ଦୀର୍ଘ ସମୟ ଯାଏଁ ରାସ୍ତା ଅବରୋଧ ହୋଇଥିଲା । ରାସ୍ତାର ଉଭୟ ପାଶ୍ୱର୍ରେ ଶତାଧିକ ଯାନବାହନ ଅଟକି ରହିଥିବାବେଳେ ଘଟଣାସ୍ଥଳରେ ସିକେରକୁପା ପୁଲିସ ପହଞ୍ଚି ବ୍ୟବସ୍ଥା ସମ୍ଭାଳିଥିବାବେଳେ ନର୍ଲା ଅଗ୍ନିଶମ ବିଭାଗର କର୍ମଚାରୀମାନେ ରାସ୍ତା ଉପରୁ ଗଛ ହଟାଇବା ପରେ ଯାତାୟତ ସ୍ୱାଭାବିକ ହୋଇଛି । ଏଣୁ ଭବାନୀପାଟଣା-ରାୟଗଡ଼ା ରାଜ୍ୟ ରାଜପଥକୁ ଜାତୀୟ ରାଜପଥ ଭାବେ ଘୋଷଣା କରାଯିବା ସହିତ ଏହାକୁ ଚାରି କିମ୍ବା ଛଅ ଥାକିଆ ରାସ୍ତା କରାଯିବାକୁ ଏବେ ଦାବି ଜୋର ଧରିବାରେ ଲାଗିଛି ।
–ଲାଞ୍ଜିଗଡ଼ରୁ ସୁଶୀଲ କୁମାର ବାଗଙ୍କ ରିପୋର୍ଟ୍
