ଜୟପାଟଣା:୨୨/୦୭/୨୩ // ଆମ ରାଜ୍ୟରେ ଦୁଇ ଦଶକରୁ ଉର୍ଦ୍ଧ୍ବ ସମୟ ଏକ ସ୍ଥିର ସରକାର ରହିଛି ।
ଶାଶକ ଦଳ ପ୍ରତି ଥର ରେକର୍ଡ ସଂଖ୍ୟକ ଆସନ ଜିତି ଅଦ୍ଵିତୀୟ ସଂଖା ଗରିଷ୍ଠ ଦଳ ଭାବେ ଶାଶନ କରୁଛନ୍ତି । ରାଜ୍ୟ ମୁଖିଆଙ୍କୁ ଦେଶର ସର୍ବଶ୍ରେଷ୍ଠ ମୁଖ୍ୟମନ୍ତ୍ରୀ ଭାବେ ପରିଗଣିତ କରାଯାଏ ।
ହେଲେ ପ୍ରଶ୍ନଟି ଉଠୁଛି, ସୁଦୃଢ଼ ଗଣତାନ୍ତ୍ରିକ ଶାସନ ଭଳି ପ୍ରତୀୟମାନ ହେଉଥିବା ଏକ ଶାସନ ବ୍ୟବସ୍ଥାରେ ଜଣେ ସାଧାରଣ ନାଗରିକର ସ୍ଥିତି କଣ ସନ୍ତୁଷ୍ଟି ଜନକ । ଶାଶନ ବ୍ୟବସ୍ଥାରେ ସ୍ୱଚ୍ଛତା ପାଇଁ ରାଜ୍ୟରେ ୫ଟି ପରି ଉଚ୍ଚକୋଟି ବ୍ୟବସ୍ଥା ଅଛି । କିନ୍ତୁ କେଉଁଠି ଅନ୍ତରାୟ ଶ୍ରୁଷ୍ଟି ହେଉଛି ଯାହା ପାଇଁ ସାମଗ୍ରୀକ ବିକାଶ ସବୁ ଆଢୁଆଳରେ ରହି ଯାଉଛି । ସ୍ଥାନୀୟ 
ଜନ ପ୍ରତିନିଧିଙ୍କର ଉପରେ କଣ କିଛି ଚାପ ପଡୁଛି କି ? ସେମାନେ କାହିଁକି ନିଜ ଅଞ୍ଚଳର ବିକାଶ କ୍ଷେତ୍ରରେ ଖୋଲି କାମ କେରି ପାରୁ ନାହାଁନ୍ତି । ତାଙ୍କ ପଛରୁ କିଏ ଏସବୁ ପରିଚାଳନା କରୁଛି କି ? ଏପରି ଅନେକ ପ୍ରଶ୍ନ ଜନତାଙ୍କର ମନରେ ଉଙ୍କି ମାରୁଥିବା ପ୍ରତୀୟମାନ ହେଉଛି । ଆଲୋଚନା ମଧ୍ୟ ହେଉଛି । ଅନ୍ତତଃ ସ୍ୱାସ୍ଥ୍ୟ ସେବା ପରି ସର୍ବୋତ୍ତମ ମୌଳିକ ଅଧିକାରକୁ ଅଗ୍ରାଧିକାର କାହିଁକି ଦିଆ ଯାଉନାହିଁ । ସ୍ୱାସ୍ଥ୍ୟସେବା କ୍ଷେତ୍ରରେ ଆମେ ସର୍ବଦା ପଡୋଶୀ ରାଜ୍ୟ ଉପରେ ନିର୍ଭର କରି ଶୋଷଣର ଶିକାର ହେଉଛୁ । ବିତ୍ତଶାଳୀ ବ୍ୟକ୍ତି ବିଶେଷ ଅନ୍ୟତ୍ର ଯାଇ ଚିକିତ୍ସିତ ହୋଇ ପାରୁଛନ୍ତି । ସାଧାରଣ ଜନତା କେବଳ ଭାଗ୍ୟକୁ ଆଦରି ଭଗବାନ ଭରସାରେ ରହି ଯାଆନ୍ତି ।
କଳାହାଣ୍ଡି ଜିଲ୍ଲା ସ୍ୱାସ୍ଥ୍ୟ ଜନିତ ସମସ୍ୟା ପାଇଁ ସର୍ବଦା ଖବରରେ ମଣ୍ଡିତ ହୋଇଥାଏ । ଆଜି ଆମେ ଜିଲ୍ଲାର ଏପରି ଏକ ଅବହେଳିତ ବ୍ଲକ ଜୟପାଟଣା ଉପରେ ଦୃଷ୍ଟି ନିକ୍ଷେପ କରୁଛୁ । ଜୟପାଟଣା ସ୍ୱାସ୍ଥ୍ୟକେନ୍ଦ୍ର ଉପରେ ବ୍ଲକର ୨୨ଟି ପଞ୍ଚାୟତର ଜନସାଧାରଣ ନିର୍ଭରଶୀଳ । ଏହି ସ୍ୱାସ୍ଥ୍ୟକେନ୍ଦ୍ର ବର୍ତ୍ତମାନ ସଂକଟରେ ଗତି କରୁଛି । ବିଶେଷଜ୍ଞ ଡାକ୍ତର ସାଙ୍ଗକୁ ଆବଶ୍ୟକୀୟ କର୍ମଚାରୀଙ୍କର ଅଭାବ ରହିଛି । କିନ୍ତୁ ଏହାଠାରୁ ବଡ଼ ଅସୁବିଧା ଏହି ପୁରାତନ ସ୍ୱାସ୍ଥ୍ୟକେନ୍ଦ୍ର ଆଜିଯାଏ ସେହି ଜରାଜୀର୍ଣ୍ଣ ପୁରୁଣା ଗୃହ ଗୁଡିକରେ ଚାଲିଛି । ଅସରାଏ ବର୍ଷା ହେଲେ ସବୁଆଡେ ପାଣି ଭରି ଯାଉଛି । ନୂତନ ଗୃହ ପରିବର୍ତ୍ତେ ସର୍ବଦା ଟିକେ ଅଧେ ମରାମତି କରି ଛାଡି ଦିଆଯାଉଛି । ନୂତନ ସରଞ୍ଜାମ ଗୁଡିକ ମହଜୁଦ ଥିଲେ ମଧ୍ୟ ସ୍ଥାନ ଅଭାବରୁ ବ୍ୟବହାର ହୋଇ ପାରୁନାହିଁ । ଜିଲ୍ଲା ସଦର ମହକୁମା ଠାରୁ ୮୦ କିମି ଦୁରତାରେ ଥିବା ଏହି ସ୍ୱାସ୍ଥ୍ୟକେନ୍ଦ୍ର ଉପରେ ଦୃଷ୍ଟି ଦିଆଗଲେ ସାଧାରଣ ଜନସାଧାରଣ ବିଶେଷ ଉପକୃତ ହୋଇ ପାରନ୍ତେ ।
ଜଗମୋହନ ପଟ୍ଟନାୟକ, ବରିଷ୍ଠ ସାମ୍ବାଦିକ
