ଶାଗୁଆନ କାଠ ଗଣ୍ଡି ଜବତ, ୬ ଗିରଫ
ଡାବୁଗାଁ, ୧୪/୯ (ମ.ନି.ସ)- ନବରଙ୍ଗପୁର ଜିଲା ଡାବୁଗାଁ ବନ ବିଭାଗ ଶାଗୁଆନ କାଠ ଗଣ୍ଡି ଜବତ କରିବା ସହ ୬ ଜଣ ଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି | ସୂଚନାଯୋଗ୍ୟ:- ବୁଧବାର ରାତିରେ ଡାବୁଗାଁ ବନ ବିଭାଗ କର୍ମଚାରୀ ପେଟ୍ରୋଲିଂ କରୁଥିବା ବେଳେ ବିଳମ୍ବିତ ରାତ୍ରିରେ ଜଟାବାଲ ସେକସନ ଅଧୀନ ଗୋଡେଗାଁ ପ୍ରସ୍ତାବିତ ସଂରକ୍ଷିତ ଜଙ୍ଗଲ ମଧ୍ୟରେ ଏକ ବୋଲେରୋ ଗାଡି ରହିଥିବା ଦେଖିବାକୁ ପାଇଥିଲେ | ପରେ ସନ୍ଧେହ ହେବାରୁ ଜଙ୍ଗଲ ଭିତରକୁ ଯାଇ ଦେଖିଥିଲେ ଯେ କିଛି ଲୋକ ଶାଗୁଆନ କାଠ ଗଣ୍ଡି ପିକ-ଅପ ଗାଡିରେ ଲୋଡିଙ୍ଗ କରୁଥିଲେ | ସଙ୍ଗେ ସଙ୍ଗେ ବନ କର୍ମଚାରୀ ମାନେ ଗୋଡେଗାଁ ବନ ସଂରକ୍ଷଣ ସମିତି ର ସଦସ୍ୟ ମାନଙ୍କ ସହଯୋଗରେ ଉକ୍ତ ସ୍ଥାନରେ ଚଢାଉ କରିଥିଲେ | ଏହି ଚଢାଉ ସମୟରେ କିଛି ଲୋକ ଖସି ଯିବାରେ ସକ୍ଷମ 
ହୋଇଥିବା ବେଳେ ୬ ଜଣ ଙ୍କୁ କାବୁ କରାଯାଇଥିଲା | ସେମାନଙ୍କ ଠାରୁ ୫ ଟି ଟାଙ୍ଗିଆ, ୩ ଟି ମୋବାଇଲ , ୧ ଟି ପିକ-ଅପ ଗାଡି ନଂ ଓଡି ୨୪ ଜି ୨୫୦୮ ଓ ୧ ଟି ବୋଲେରୋ ଗାଡି ନଂ ଓଡି ୦୮ ଏଲ ୧୮୨୪, ୬ ଫୁଟ ୬ ଇଞ୍ଚ ଲମ୍ବା ଓ ୩ ଫୁଟ ଗୋଳେଇ ର ୧୧ ଟି ଶାଗୁଆନ କାଠ ଗଣ୍ଡି ଜବତ କରାଯାଇଛି | ଅଭିଯୁକ୍ତ ୬ ଜଣଙ୍କୁ ଗିରଫ କରାଯାଇଛି | ଅଭିଯୁକ୍ତ ମାନେ ହେଲେ ପାତ୍ରୀ ଗ୍ରାମର ଗିରିଧର ହରିଜନ (୩୬), ମାନସିଂ ଭତ୍ରା (୨୩), ଭଞ୍ଜକିଶୋର ବେନିଆ (୩୨), ଜାମୁଗୁଡା ଗ୍ରାମର ଆସରନ ସାଗରିଆ (୩୦), ଖାଲିଗୁଡା ଗ୍ରାମର ଭଗବାନ ଭତ୍ରା (୫୩) ଓ ନବରଙ୍ଗପୁର ଥାନା ଅଧୀନ ମାଝିଗୁଡା ଗ୍ରାମର ଶୋଭନ ସୁନା (୩୩) | ସମସ୍ତଙ୍କୁ ଆଜି ସନ୍ଧ୍ୟାରେ କୋର୍ଟ ଚାଲାଣ କରାଯାଇଛି | ଏନେଇ ବନାଞ୍ଚଳ କାର୍ଯ୍ୟ|ଳୟ କେସ ନଂ ୯୭/୨୦୨୩-୨୪ ରେ ଏକ ମାମଲା ରୁଜୁ କରାଯାଇଛି | ଜବତ କାଠର ଆନୁମାନିକ ସରକାରୀ ମୂଲ୍ୟ ୧ ଲକ୍ଷ ଟଙ୍କାରୁ ଊର୍ଦ୍ଧ୍ଵ ହେବ ବୋଲି ବନାଞ୍ଚଳ ଅଧିକାରୀ ସେତୁରଞ୍ଜନୀ ଗମାଙ୍ଗ ସୂଚନା ଦେଇଛନ୍ତି | ଏହି ଚଢାଉରେ ଡାବୁଗାଁ ବନପାଳ ଉମାକାନ୍ତ ପଟ୍ଟନାୟକ, ଜଟାବାଲ ଭରପ୍ରାପ୍ତ ବନପାଳ ସଦା ସାନ୍ତା, ବନରକ୍ଷୀ ପ୍ରକାଶ ସରକାର, ଉମାଶଙ୍କର ମିଶ୍ର, କାର୍ତ୍ତିକ ମାଝି, ପାରା ଷ୍ଟାଫ ଓ ଗୋଡେଗାଁ ବନ ସଂରକ୍ଷଣ ସମିତିର ସଦସ୍ୟ ମାନେ ସାମିଲ ଥିଲେ |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
