ଅବସରପ୍ରାପ୍ତ ସରକାରୀ କର୍ମଚାରୀ ସଂଘର ବୈଠକ ଅନୁଷ୍ଠିତ
ବାଲେଶ୍ଵର,୦୯/୧୦/୨୩ – ବାଲେଶ୍ଵର ଜିଲ୍ଲା ଖଇରା ବ୍ଲକସରକାରୀ ଅବସରପ୍ରାପ୍ତ କର୍ମରଚାରୀ ସଂଘର ଏକ ବୈଠକ ଖଇରା ବରିଷ୍ଠ ନାଗରିକ ମଞ୍ଚ କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଅଛି । ଖଇରା ବ୍ଲକ ଅବସରପ୍ରାପ୍ତ କର୍ମରଚାରୀ ସଂଘର ସ୍ଥାୟୀ ସଭାପତି ମହେନ୍ଦ୍ର ପ୍ରସାଦ କବିଙ୍କ ସଭାପତିତ୍ବରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା । ଓଡ଼ିଶା ରାଜ୍ୟ ଅବସରପ୍ରାପ୍ତ କର୍ମରଚାରୀ ମହାସଂଘ ଆହ୍ବାନ କ୍ରମେ ଆସନ୍ତା ୧୧ ଅକ୍ଟୋବରରେ ରାଜଧାନୀ ଗାନ୍ଧୀମାର୍ଗ ସ୍ଥିତ ପିଏମଜି ଛକରେ ସମଗ୍ର ଓଡ଼ିଶାର ସବୁ ଜିଲ୍ଲାରେ ଥିବା ପଞ୍ଚାୟତରୁ ବ୍ଲକ ଓ ଜିଲ୍ଲାସ୍ତର ଶତାଧିକ ଶାଖା ସଂଘର ରାଜ୍ୟ ପେନସନ ମାନେ ହଜାର ହଜାର ସଂଖ୍ୟାରେ ପୂର୍ବାହ୍ନ ୧୦ଟାରେ ମାଷ୍ଟର କ୍ଯାଣ୍ଟିନ ଛକରେ ଏକତ୍ରିତ ହୋଇ ଏକ ବିରାଟ ଶୋଭାଯାତ୍ରାରେ ପି ଏମଜି ଛକରେ ଏକ ମହାସମାବେଶରେ ସମ୍ମିଳିତ ହୋଇ ମହାସଂଘର ଦୀର୍ଘଦିନର ଅମିମାଂସିତ ୯ ଦଫା ଦାବି ପୂରଣ ପାଇଁ ସ୍ଲୋଗାନ ଦେଇ ପ୍ଲାକାର୍ଡ ପ୍ରଦର୍ଶନ କରାଯିବା ପାଇଁ ସ୍ଥିର କରାଯାଇଛି । ପିଏମଜି ଛକର ମହାସମାବେଶରୁ ମହାସଂଘ ପକ୍ଷରୁ ଏକ ପ୍ରତିନିଧି ମଣ୍ଡଳୀ ମୁଖ୍ୟ ମନ୍ତ୍ରୀଙ୍କ ଦପ୍ତରକୁ ଯାଇ ମୁଖ୍ୟମନ୍ତ୍ରୀଙ୍କୁ ୯ ଦଫା ଦାବି ସମ୍ବଳିତ ଏକ ସ୍ମାରକ ପତ୍ର ପ୍ରଦାନ କରାଯିବ । ଏହି ଐତିହାସିକ ସମାବେଶରେ ଯୋଗ ଦେବା ପାଇଁ ରାଜ୍ୟର ସମସ୍ତ ସାଢେ଼ ୩ ଲକ୍ଷ ପେନସନରଙ୍କୁ ମହାସଂଘ ତରଫରୁ ଆହ୍ଵାନ କରାଯାଇଛି । ଏଣୁ ଏହି ବୈଠକରେ ଖଇରା ବ୍ଲକର ୨୦ ଜଣ ଅବସରପ୍ରାପ୍ତ କର୍ମରଚାରୀ ଭୁବନେଶ୍ୱରରେ ଯୋଗ ଦେବା ପାଇଁ ଆଜିର ବୈଠକରେ ସ୍ଥିର କରାଯାଇଛି । ଏଥିରେ ଅବସରପ୍ରାପ୍ତ କର୍ମରଚାରୀ ସଂଘର ଉପଦେଷ୍ଟା ଅନ୍ତର୍ଯ୍ୟାମୀ ପାତ୍ର, ମୁକ୍ତିକାନ୍ତ ଶତପଥୀ, ଉମେଶ ଚନ୍ଦ୍ର ନାୟକ, ପଦ୍ମଲୋଚନ ଦାସ, ସମ୍ପାଦକ ଅରୁଣ କୁମାର ସ୍ବାଇଁ, ଯୁଗ୍ମ ସମ୍ପାଦକ ନାରାୟଣ ପ୍ରସାଦ ପେଡା, ଉପସଭାପତି କମଳଲୋଚନ ଜେନା, କୋଷାଧ୍ୟକ୍ଷ ପଦ୍ମନାଭ ପଣ୍ଡା ଓ ବୁଦ୍ଧିରାମ ପାଣିଗ୍ରାହୀ ମହାସମାବେଶ ସଂପର୍କରେ ମତପ୍ରକାଶ କରିଥିଲେ । ଖଇରା ବ୍ଲକର ଅବସରପ୍ରାପ୍ତ କର୍ମରଚାରୀ ସଂଘର ବାର୍ଷିକ ସମ୍ମିଳନୀ ଆସନ୍ତା ନଭେମ୍ବର ମାସରେ କରାଯିବା ପାଇଁ ମଧ୍ୟ ସିଦ୍ଧାନ୍ତ ନିଆଯାଇଥିଲା ଏବଂ ନୂତନ ଭାବେ ସଂଘର ଯୋଗ ଦାନ କରିଥିବା ସଭ୍ୟ ମାନଙ୍କୁ ସ୍ବାଗତ କରାଯାଇଥିଲା । ସର୍ବ ଶେଷରେ ଧନ୍ୟବାଦ ପୂର୍ବକ ସଭା ସାଙ୍ଗ ହୋଇଥିଲା ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
