ସରକାରୀ ଉତ୍କୃଷ୍ଟ ଉଚ୍ଚ ବିଦ୍ୟାଳୟ, ସେକ୍ଟର-୬ ରେ ସାହିତ୍ୟ ସୃଜନୀ ମେଳା
ରାଉରକେଲା/ ବିଶ୍ୱ ଓଡ଼ିଆ ଭାଷା ସମ୍ମିଳନୀ ପାଳନର ଅବ୍ୟବହିତ ପୂର୍ବରୁ ସରକାରୀ ଉତ୍କୃଷ୍ଟ ଉଚ୍ଚ ବିଦ୍ୟାଳୟ, ସେକ୍ଟର-୬ରେ ପାଳିତ ହୋଇଯାଇଛି ଓଡ଼ିଆ ଭାଷା, ସାହିତ୍ୟ ଓ ସୃଜନଶୀଳତାର ମହୋତ୍ସବ l ଉଚ୍ଚ ବିଦ୍ୟାଳୟ ମାନଙ୍କରେ ଆକାଂକ୍ଷୀ ପାଠ୍ୟକ୍ରମ ଜରିଆରେ ସାମିଲ ହୋଇଥିବା ଚାରୋଟି କ୍ଲବ ଯଥା କୌଶଳୀ, କ୍ରୀଡାଙ୍ଗନ, ଜିଜ୍ଞାସା ଓ ସାହିତ୍ୟ ସୃଜନୀର ସଦସ୍ୟ ଛାତ୍ରଛାତ୍ରୀ ମାନେ ବିଭିନ୍ନ ଚିତ୍ରକଳା, କାରୁକାର୍ଯ୍ୟ, ପ୍ରକଳ୍ପ, ପୁସ୍ତକ ସଂକଳନ, ସମୀକ୍ଷା, ଗଳ୍ପ ପଠନ, କବିତା ଆବୃତ୍ତି, ଅଭିନୟ, କ୍ରୀଡା କୌଶଳ ତଥା ସୃଜନାତ୍ମକ ସୃଷ୍ଟି ମାଧ୍ୟମରେ ତାଙ୍କର ଉତ୍କର୍ଷ ପ୍ରତିପାଦନ କରିଛନ୍ତି l ପ୍ରଥମ ପର୍ଯ୍ୟାୟର ପ୍ରାରମ୍ଭରେ ବିଶ୍ରା ଗୋଷ୍ଠୀ ଶିକ୍ଷା ଅଧିକାରୀ ବେଣୁଧର ସ୍ୱାଇଁ ଫିତା କାଟି ଉତ୍ସବକୁ ଉଦଘାଟିତ କରିଥିଲେ l ତାଙ୍କ ସହ ଯୋଗ ଦେଇଥିଲେ ପୂର୍ବତନ ସ୍କୁଲ ଇନ୍ସପେକ୍ଟର ଶରତ ସାହୁ l ପୁରାତନ ଛାତ୍ର କମିଟିର ସଦସ୍ୟ, ଅଭିଭାବକ, ସ୍କୁଲ ପରିଚାଳନା କମିଟିର ସଦସ୍ୟ ସଦସ୍ୟା, ପାଖାପାଖି ସରକାରୀ ତଥା ବେସରକାରୀ ଉଚ୍ଚ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ମାନେ ପିଲାଙ୍କ ସୃଜନଶୀଳତା ଦେଖି ବିସ୍ମିତ ହେବା ସହିତ ବିଭୋର ମଧ୍ୟ ହୋଇଥିଲେ l
ମଧ୍ୟାହ୍ନ ବିରତି ପରେ ଦ୍ଵିତୀୟ ପର୍ଯ୍ୟାୟରେ ଆୟୋଜିତ ହୋଇଥିଲା ସାହିତ୍ୟ ସଭା ଏବଂ ପୁରସ୍କାର ବିତରଣୀ ଉତ୍ସବ l ବବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସୁସ୍ମିତା ମହାପାତ୍ର ଅତିଥି ପରିଚୟ ପ୍ରଦାନ ଓ ଅତିଥିଙ୍କୁ ସମ୍ବର୍ଦ୍ଧିତ କରିବା ସହିତ ସ୍ଵାଗତ ସମ୍ଭାଷଣ ରଖିଥିଲେ l ତାଙ୍କ ବକ୍ତବ୍ୟରେ ଏହି ଉତ୍ସବ ଏବଂ ପ୍ରଦର୍ଶନୀର ଆଢୁଆଳରେ ଥିବା ସରକାରଙ୍କ ଆଭିମୁଖ୍ୟ ମଧ୍ୟ ସ୍ପଷ୍ଟ କରିଥିଲେ l ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ବିଶିଷ୍ଟ ଲେଖିକା ତଥା ମାଟି ମନସ୍କ କବି ଡା ଗୀତାଞ୍ଜଳି ପତ୍ରୀ l ସେ ପିଲାଙ୍କୁ ଭାଷାର ଗୁରୁତ୍ଵ ଏବଂ ଆବଶ୍ୟକତା ବୁଝାଇବା ସହିତ ଗୁରୁଙ୍କୁ ଭକ୍ତି କଲେ କିପରି ଜୀବନରେ ସଫଳତା ମିଳିଥାଏ, ସେ ସମ୍ପର୍କରେ ଦିଗଦର୍ଶନ ଦେଇଥିଲେ l ସମ୍ମାନିତ ଅତିଥି ରୂପେ ଶିକ୍ଷାବିତ୍ ତଥା ପୂର୍ବତନ ଶିକ୍ଷା ଅଧିକାରୀ ମଞ୍ଜୁଳା କୁମାରୀ ରଥ ଯୋଗଦେଇ ଗଳ୍ପ ଛଳରେ ଭାଷା ରହିତ ଜୀବନ ପଶୁ ତୁଲ୍ୟ ଏବଂ ପ୍ରତ୍ୟେକ ଭାଷାର ସ୍ଵତନ୍ତ୍ରତା ଥିବା ଦର୍ଶାଇ ଥିଲେ l ନିମନ୍ତ୍ରିତ ମୁଖ୍ୟ ବକ୍ତା ଶିକ୍ଷାବିତ୍ ଏବଂ ପୂର୍ବତନ ଶିକ୍ଷା ଅଧିକାରୀ, ରାଷ୍ଟ୍ରପତି ପୁରସ୍କାର ପ୍ରାପ୍ତ ଶିକ୍ଷୟିତ୍ରୀ ରଶ୍ମିବାଳା ରାଉତରାୟ ବିଭିନ୍ନ ଉଦାହରଣ ମାଧ୍ୟମରେ ମାତୃଭୂମି, ମାତୃଭାଷା ଏବଂ ଆମ ଗୌରବମୟ ସଂସ୍କୃତି ଓ ପରମ୍ପରା ବିଷୟରେ ଛାତ୍ରଛାତ୍ରୀଙ୍କୁ ଗୁରୁତ୍ୱପୂର୍ଣ୍ଣ ତଥ୍ୟ ପ୍ରଦାନ କରିଥିଲେ l ଏହି ସଭାରେ ବିବେକାନନ୍ଦ ବିଦ୍ୟା ମନ୍ଦିରର ପ୍ରଧାନ ଶିକ୍ଷକ ରଶ୍ମିତ୍ କୁମାର ସାହାଣୀ ଯୋଗଦେଇଥିଲେ। ଏହି ଅବସରରେ ପୁରସ୍କାର ବିତରଣୀ ଉତ୍ସବ ଓ ସୁନ୍ଦର ଗଳ୍ପ ପଠନ ଏବଂ କବିତା ଆବୃତ୍ତି କରିଥିବା ପିଲାଙ୍କୁ ଏବଂ ସ୍ବରଚିତ ତଥା ସ୍ଵନିର୍ଦ୍ଦେଶିତ କ୍ଷୁଦ୍ର ନାଟକ ମାଧ୍ୟମରେ ଆମ ଭାଷା ଓ ସଂସ୍କୃତିକୁ ନିଖୁଣ ଭାବେ ପରିବେଷଣ କରିଥିଲେ l ସର୍ବ ଶେଷରେ ବରିଷ୍ଠ ଶିକ୍ଷକ ମାନସ ରଞ୍ଜନ ମହାନ୍ତି ଧନ୍ୟବାଦ ଅର୍ପଣ କରିଥିଲେ।
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
