ପିଇଓଙ୍କ ମନମୁଖୀ କାର୍ଯ୍ୟକୁ ବିରୋଧ
ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ୱାର୍ଡମେମ୍ବରଙ୍କ ଧାରଣା
ବିଡ଼ିଓଙ୍କ ପ୍ରତିଶୃତି ପରେ ଧାରଣା ପ୍ରତ୍ୟାହୃତ
ବଦଳି ନହେଲେ ପୁଣି ଆନ୍ଦୋଳନ ଚେତାବନୀ
ବସ୍ତା ,29/2 ବସ୍ତା ବ୍ଲକ ଅନ୍ତର୍ଗତ ଗଡ଼ପଦା ପଞ୍ଚାୟତର ପିଇଓ ରଞ୍ଜିତା ଶତପଥିଙ୍କ ମନମୁଖୀ କାର୍ଯ୍ୟ, ପକ୍ଷପlତିତା ଓ ଦୁର୍ବ୍ୟବହାର ବିରୋଧରେ ଗୁରୁବାର ନାଏବ ସରପଞ୍ଚ ମନୋରଞ୍ଜନ ପାଣିଗ୍ରାହୀଙ୍କ ସମେତ ୱାର୍ଡମେମ୍ବର ରଶ୍ମିତା ପଣ୍ଡା, ପୂଜା ସିଂ, ଆରତୀ ବେହେରା, ଲକ୍ଷ୍ମୀମଣି ସିଂ, ଫକୀର ମୋହନ ପ୍ରଧାନ ପ୍ରମୁଖ ପଞ୍ଚାୟତ ଅଫିସ ସମ୍ମୁଖରେ ଧାରଣାରେ ବସିଥିଲେ l ସରପଞ୍ଚ ସଂଯୁକ୍ତା ନାୟକ ଓ ସମିତି ସଭ୍ୟ ହମିଦ ଖାନ ଘଟଣାସ୍ଥଳରେ ପହଞ୍ଚି ବୁଝାସୁଝା କରିଥିଲେହେଁ ଆନ୍ଦୋଳନକାରୀ ୱାର୍ଡମେମ୍ବରମାନେ ପିଇଓ ଶତପଥିଙ୍କ ବଦଳି ସହ କାର୍ଯ୍ୟାନୁଷ୍ଠାନ ଦାବି କରିଥିଲେ l ଶେଷରେ ଏମପି ପ୍ରତିନିଧି ପ୍ରଦୀପ ପଣ୍ଡା, ସମବାୟ ସମିତି ସଭାପତି ଦେବାଶିଷ ମହାପାତ୍ର, ପୂର୍ବତନ ସମିତି ସଭାପତି ହରେନ୍ଦ୍ର କୁମାର ଦାସ ପହଞ୍ଚି ଆଲୋଚନା କରିଥିଲେ l ବିଡ଼ିଓ ମୋହିନୀ କୁମାର ନାଏକଙ୍କୁ ଅଭିଯୋଗ ସମ୍ପର୍କରେ ଅବଗତ କରାଯାଇଥିଲା l ତଦନ୍ତ ପୂର୍ବକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଡ଼ିଓ ଫୋନ ଯୋଗେ ପ୍ରତିଶୃତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା l 7 ଦିନ ମଧ୍ୟରେ ପଦକ୍ଷେପ ଗ୍ରହଣ କରାନଗଲେ ଜୋରଦାର ଆନ୍ଦୋଳନ ହେବ ବୋଲି ଚେତାବନୀ ଦିଆଯାଇଛି l
ଗୁରୁବାର ପଞ୍ଚାୟତ ବୈଠକ ଅନୁଷ୍ଠିତ ହୋଇଥିଲା l ଅଭିଯୋଗକାରୀ ୱାର୍ଡମେମ୍ବରମାନେ ପିଇଓଙ୍କ ମନମୁଖୀ ଓ ପକ୍ଷପlତିତା କାର୍ଯ୍ୟ ସମ୍ପର୍କରେ ବୈଠକରେ ଆଲୋଚନା କରିଥିଲେ l ପିଇଓ ଜଣେ ସରକାରୀ ଅଧିକାରୀ ହୋଇ ଦଳୀୟ କର୍ମୀଙ୍କ ବାଇକରେ ବସି ଅଫିସ ଓ ୱାର୍ଡକୁ ଯିବା ଆସିବା କରିବା, ସରପଞ୍ଚ ସଂଯୁକ୍ତା ନାୟକ ଅଧିକାଂଶ ଦିନ ପଞ୍ଚାୟତରେ ଅନୁପସ୍ଥିତ ରହୁଥିବାବେଳେ ସରପଞ୍ଚଙ୍କ ଶ୍ୱଶୁର ନାରାୟଣ ନାୟକ ପଞ୍ଚାୟତରେ ଭତ୍ତା ବାଣ୍ଟିବା ଓ ଅଫିସ କାର୍ଯ୍ୟରେ ହସ୍ତକ୍ଷେପ କରିବାକୁ ପିଇଓ ପ୍ରଶ୍ରୟ ଦେବା, ବିଭିନ୍ନ ୱାର୍ଡରେ ୱାର୍ଡମେମ୍ବରଙ୍କୁ ନ ଜଣାଇ ପିଇଓ ନିଜ ଇଚ୍ଛାରେ କାର୍ଯ୍ୟ କରିବା, ବିଭିନ୍ନ ସମୟରେ ପଞ୍ଚାୟତ ବୈଠକକୁ ନୋଟିସ ନଦେଇ ସରପଞ୍ଚଙ୍କ ଶ୍ୱଶୁରଙ୍କ ଉପସ୍ଥିତିରେ ବିଭିନ୍ନ ପ୍ରକଳ୍ପକୁ ତାଲିକାଭୁକ୍ତ ଓ ଭତ୍ତା ବଣ୍ଟନରେ ଅନିୟମିତତା ହେଉଥିବା ଅଭିଯୋଗ କରିଥିଲେ l ପିଇଓ ରଞ୍ଜିତା ଶତପଥି ୱାର୍ଡମେମ୍ବର ମାନଙ୍କୁ ଦୁର୍ବ୍ୟବହାର କରିବା ସହ ଅଶ୍ଳୀଳ ଭାଷାରେ ଗାଳିଗୁଲଜ କରିଥିବା ଅଭିଯୋଗ ହୋଇଛି l ପ୍ରତିବାଦରେ ସେମାନେ ଧାରଣାରେ ବସିଥିଲେ l କୌଣସି ସମାଧାନ ହୋଇନପାରିବାରୁ କିଛି ସମୟ ପରେ ସରପଞ୍ଚ ଓ ପିଇଓ ଅଫିସରୁ ପଳାଇଥିଲେ l ଏ ସମ୍ପର୍କରେ ପିଇଓ ଶତପଥିଙ୍କୁ ପଚରାଯିବାରୁ ସେ ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି କହିଥିଲେ l ଛୁଆର ଦେହ ଭଲ ନାହିଁ ବୋଲି ସରପଞ୍ଚ ଘରକୁ ପଳାଇଥିଲେ ବୋଲି ତାଙ୍କ ପ୍ରତିକ୍ରିୟାରେ ପ୍ରକାଶ କରିଥିଲେ l