ଲଳିତା
ଚୁମ୍ବନ ବୋଳା କେତେ ଚୋରା ଚିଠି
ରାଧାଠୁ କୃଷ୍ଣଙ୍କୁ ଦେଇଛ
ମହୁମୁହାଣର ମଧ୍ୟସ୍ଥି ତୁମେ ଗୋ !
ଲହୁ ଲୁହାଣରେ ରହିଛ ।
ତୁମ ମନ ବନ ଅବ୍ୟକ୍ତ ବେଦନା
ଶ୍ରୀରାଧାରେ କେବେ କହିଚ
କାହ୍ନୁ କର ସ୍ପର୍ଶେ କୁଆଁରୀ ସ୍ପନ୍ଦନ
ଅନୁଭବ କେବେ କରିଚ ?
ଦୁହେଁ କେବେ ଥରେ ପଚାରିଛନ୍ତି କି ?
ତୁମ ମରମର ବେଦନା
କାମିନୀ କାମନା ପ୍ରଣୟ ବାସନା
ତମ ମନେ ଜାଗି ଉଠେନା ?
କେତେଯେ ଗୁମାନ ମାନ ଅଭିମାନ
ସମାଧାନ ନିଜେ କରିଚ
ଯୌବନ ନଈରେ ମିଠା ତରଙ୍ଗର
ଅନୁଭବ କେବେ ଆଣିଚ ?
ତୁମେ ବି ତ ନାରୀ ରାଧିକାଙ୍କ
ପରି
କୃଷ୍ଣ ନ ଜାଣିଲେ କେମନ୍ତ ?
ଦୀପଶିଖା ଭଳି ନିଜେ ଜଳି ଜଳି
ଆଲୋକ ପ୍ରଦାନ ଯେମନ୍ତ୍ ।
ଯୁଗଳବନ୍ଦୀର ନଗ୍ନଭିସାରେ
ମଗ୍ନ ହେଲନି କେମିତି?
ଧନ୍ୟ ଗୋ ! *ଲଳିତା* ରଖି ଗଲ କଥା
ଧନ୍ୟ ଶ୍ରୀମତୀ ଶ୍ରୀପତି ।
କାଙ୍ଗାଳୀ ଚରଣ ସେଠୀ
ଯାଜପୁର
