ଆମ୍ବୁଲାନ୍ସ ଧକ୍କାରେ ନାବାଳକ ପୁଅ ମୃତ ବାପା ଗୁରୁତ୍ତର
ଡାବୁଗାଁ, ୬/୭ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ମହେନ୍ଦ୍ରୀ ଛକ ନିକଟରେ ଶନିବାର ସକାଳେ ଆମ୍ବୁଲାନ୍ସ ଧକ୍କାରେ ପୁଅ ମୃତ ଓ ବାପା ଗୁରୁତ୍ତର ହୋଇଛନ୍ତି | ସୂଚନାଯୋଗ୍ୟ:- ଡାବୁଗାଁ ଥାନା ଅଧୀନ ମହେନ୍ଦ୍ରୀ ଗ୍ରାମର 
ଗଣେଶ ମହାନ୍ତି (୩୨) ଆଜି ସକାଳ ୫.୩୦ ସମୟରେ ସାଇକେଲରେ ପୁଅ ନିଖିଲ ମହାନ୍ତି (୧୦) କୁ ବସାଇ ଡାବୁଗାଁ – ପାପଡାହାଣ୍ଡି ମୁଖ୍ୟ ରାସ୍ତାରେ ଜଙ୍ଗଲକୁ ଶୌଚ ପାଇଁ ଆସୁଥିବା ବେଳେ ପଛ ପଟୁ ଏକ ଆମ୍ବୁଲାନ୍ସ ଆସି ଧକ୍କା ଦେଇଥିଲା | ଫଳରେ ଘଟଣାସ୍ଥଳରେ ପୁଅ ନିଖିଲ ର ମୃତ୍ୟୁ ଘଟିଥିବା ବେଳେ ବାପା ଗଣେଶ କୁ ସ୍ଥାନୀୟ ଲୋକେ 
ଉଦ୍ଧାର କରି ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ରେ ଭର୍ତ୍ତି କରିଥିଲେ | ସେଠାରୁ ତାଙ୍କ ଅବସ୍ଥା ଗୁରୁତ୍ତର ହେବାରୁ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି | ଏନେଇ ଗ୍ରାମବାସୀ ସକଳ ୬ ଘରେ ଘଟଣାସ୍ଥଳରେ ଶବ ରଖି ରାସ୍ତାରୋକ କରିଥିଲେ | ଖବର ପାଇ ଡାବୁଗାଁ ଥାନା ଆଇଆଇସି ସୁନୀଲ କୁମାର ପ୍ରଧାନ, ଡାବୁଗାଁ ବିଡିଓ ତଥା ତହସିଲଦାର ଶରତ ମାଝି, ପାପଡାହାଣ୍ଡି ତହସିଲଦାର ତପନ ନାୟକ ପ୍ରମୁଖ ପହଞ୍ଚି ବୁଝାସୁଝା କରିଥିଲେ | ପରେ ମୃତକକୁ ରେଡକ୍ରସ ପାଣ୍ଠିରୁ ୨୦ ହଜାର ଓ ହରିଶ୍ଚନ୍ଦ୍ର ଯୋଜନାରେ ୩ ହଜାର ଟଙ୍କା ସହାୟତା ରାଶି ପ୍ରଦାନ କରାଯିବା ପରେ ରାସ୍ତା ରୋକ ହଟିଥିଲା | ଏନେଇ ମୃତକର ବଡବାପା ପୂର୍ଣ୍ଣଚନ୍ଦ୍ର ମହାନ୍ତି ଡାବୁଗାଁ ଥାନାରେ ଏତଲା ଦେଇଥିଲେ | ଥାନା ସବଇନିସ୍ପେକ୍ଟର ବିଜୁରାମ ବାଗ ଶବ ଜବତ କରି ପାଞ୍ଚନାମା କରି ବ୍ୟବଚ୍ଛେଦ ପାଇଁ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ | ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି | ଏନେଇ ଥାନା କେସ ନଂ ୧୩୮/୨୪ ରେ ଏକ ମାମଲା ରୁଜୁ କରାଯାଇଛି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
