ଢେଙ୍କାନାଳରେ ଜିଲ୍ଲା ସ୍ତରୀୟ “ବନ୍ଦେ ମାତରମ @ ୧୫୦” କାର୍ଯ୍ୟକ୍ରମ ଅନୁଷ୍ଠିତ
ଢେଙ୍କାନାଳ(ମନିସ)7/11/25 — ଢେଙ୍କାନାଳ ଜିଲ୍ଲା ପରିଷଦ ସମ୍ମିଳନୀ କକ୍ଷରେ ରାଷ୍ଟ୍ରୀୟ ସଂଗୀତ “ବନ୍ଦେ ମାତରମ” ର ୧୫୦ ବର୍ଷ ପୂର୍ତ୍ତି ଅବସରରେ ଜିଲ୍ଲା ସ୍ତରୀୟ କାର୍ଯ୍ୟକ୍ରମ ମହା ସମାରୋହରେ ଅନୁଷ୍ଠିତ ହେଇଯାଇଛି । ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ରମେଶ ଚନ୍ଦ୍ର ସେଠି ମୁଖ୍ୟ ଅତିଥି ଭାବେ ଉପସ୍ଥିତ ହୋଇ ଅବସରଟିକୁ ଗୌରବମୟ କରିଥିଲେ। ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଓ ନିର୍ବାହୀ ଅଧିକାରୀ ଦୀପ୍ତି ରଞ୍ଜନ ସେଠି ଓ ଅତିରିକ୍ତ ଉନ୍ନୟନ ଓ ନିର୍ବାହୀ ଅଧିକାରୀ ଆଶିଷ ସାହୁ ସମ୍ମାନିତ ଅତିଥି ଭାବେ ଯୋଗଦେଇ ଥିଲେ। ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ପ୍ରସ୍ତୁତ “ବନ୍ଦେ ମାତରମ @୧୫୦” ଶୀର୍ଷକ ଦୃଶ୍ୟ-ଶ୍ରବ୍ୟ ଚିତ୍ର ପ୍ରଦର୍ଶନୀ କରାଯାଇଥିଲା, ଯେଉଁଥିରେ ବଙ୍କିମ ଚନ୍ଦ୍ର ଚଟ୍ଟୋପାଧ୍ୟାୟଙ୍କ ଦ୍ୱାରା ରଚିତ ଏହି ଅମର ସଂଗୀତର ଐତିହ୍ୟ, ରଚନା ପୃଷ୍ଠଭୂମି ଓ ଜାତୀୟ ଆନ୍ଦୋଳନରେ ଏହାର ଅବଦାନ ସଂକ୍ଷିପ୍ତ ଭାବେ ପ୍ରଦର୍ଶିତ ହୋଇଥିଲା। ପ୍ରଦର୍ଶନୀର ମାଧ୍ୟମରେ ଅନେକ ଯୁବପିଢ଼ୀ ଏହି ଗୀତର ଐତିହାସିକ ଗୌରବ ସହିତ ପରିଚିତ ହୋଇପାରିଥିଲେ। ଏହା ପରେ “ବନ୍ଦେ ମାତରମ @୧୫୦” ଜାତୀୟ ସ୍ତରୀୟ କାର୍ଯ୍ୟକ୍ରମର ସିଧା ପ୍ରସାରଣ କରାଯାଇଥିଲା ଏବଂ ସାମୁହିକ ଭାବେ ବନ୍ଦେ ମାତରମ ସଂଗୀତ ଗାନ କରାଯାଇଥିଲା l ଅତିରିକ୍ତ ଜିଲ୍ଲାପାଳ ଶ୍ରୀ ସେଠି କହିଥିଲେ , “ବନ୍ଦେ ମାତରମ କେବଳ ଏକ ଗୀତ ନୁହେଁ, ଏହା ଆମ ମାତୃଭୂମି ପ୍ରତି ଆମର ଅନନ୍ୟ ଶ୍ରଦ୍ଧା, ଭଲପାଇବା ଓ ତ୍ୟାଗର ପ୍ରତୀକ। ଏହି ସଂଗୀତ ଦେଶକୁ ଏକତାର ସୂତ୍ରରେ ବାନ୍ଧି ରଖିଛି।” ସେ ଅନୁରୋଧ କଲେ ଯେ, ଯୁବପିଢ଼ୀ ଏହାର ମୂଲ୍ୟବୋଧ ଅନୁସରଣ କରି ଦେଶଗଠନରେ ନିଜ ଅଂଶ ରଖନ୍ତୁ।ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଓ ନିର୍ବାହୀ ଅଧିକାରୀ ଦୀପ୍ତି ରଞ୍ଜନ ସେଠି ତାଙ୍କ ଅଭିଭାଷଣରେ କହିଲେ ଯେ, “ବନ୍ଦେ ମାତରମ ଗୀତ ଆମର ସାଂସ୍କୃତିକ ମୂଳ ଓ ଦେଶଭକ୍ତିର ପ୍ରତିକ। ଏହା ଆମକୁ ଏକତା, ସହଯୋଗ ଓ ସମର୍ପଣର ଶିକ୍ଷା ଦିଏ।” ସମାନ୍ତରାଳ ଭାବରେ ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟ, ମହାବିଦ୍ୟାଳୟ ଓ ବିଦ୍ୟାଳୟ ଗୁଡ଼ିକରେ ସାମୁହିକ ଭାବେ “ବନ୍ଦେ ମାତରମ” ଗାନ ଆୟୋଜନ କରାଯାଇଥିଲା।
ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
