ଭବାନୀପାଟଣା ରେଳ ଷ୍ଟେସନରେ କୋଚ୍ ଇଣ୍ଡିକେସନ୍ ବୋର୍ଡ ସ୍ଥାପିତ
ପ୍ଲାଟଫର୍ମ ରେ କୋଚ୍ ଏବଂ ଟ୍ରେନ୍ ର ସ୍ଥାନ ବିଷୟରେ ଯାତ୍ରୀମାନଙ୍କୁ ସୂଚନା ପ୍ରଦାନ କରିବା ଲକ୍ଷ୍ୟରେ ପୂର୍ବତଟ ରେଳପଥ ସମ୍ବଲପୁର ମଣ୍ଡଳ ଭବାନୀପାଟଣା ରେଳ ଷ୍ଟେସନର ପ୍ଲାଟଫର୍ମ ନମ୍ବର ୧ ରେ କୋଚ୍ ଇଣ୍ଡିକେସନ୍ ବୋର୍ଡ (CIB) କାର୍ଯ୍ୟକ୍ଷମ କରିଛି। ନୂତନ ଭାବରେ ସ୍ଥାପିତ କୋଚ୍ ଇଣ୍ଡିକେସନ୍ ବୋର୍ଡଗୁଡ଼ିକ ଟ୍ରେନ ଆସିବା ପୂର୍ବରୁ ବିଭିନ୍ନ ପ୍ରକାରର କୋଚ୍ ଯେପରିକି ଅଣସଂରକ୍ଷିତ କମ୍ପାର୍ଟମେଣ୍ଟ, ସ୍ଲିପର୍ କୋଚ୍ ଏବଂ ଏସି କୋଚ୍ ର ସ୍ଥାନ ସହଜରେ ଚିହ୍ନଟ କରିବାରେ ଯାତ୍ରୀମାନଙ୍କୁ ସହାୟତା କରିବ। ପ୍ଲାଟଫର୍ମରେ ମୋଟ ୨୫ଟି କୋଚ୍ ଇଣ୍ଡିକେସନ୍ ବୋର୍ଡ ସ୍ଥାପନ କରାଯାଇଛି। ଏହା ସହିତ ଯାତ୍ରୀମାନଙ୍କ ପାଇଁ ରିଅଲ୍-ଟାଇମ୍ ଟ୍ରେନ୍ ଅପଡେଟ୍ ସୁବିଧାଜନକ କରିବା ପାଇଁ ପ୍ଲାଟଫର୍ମ ପ୍ରବେଶ ପଥରେ ଏକ ଟ୍ରେନ୍ ସୂଚନା ପ୍ରଦର୍ଶନ ବୋର୍ଡ ପୂର୍ବରୁ ସ୍ଥାପନ କରାଯାଇଛି।ସ୍ଥାନୀୟ ରେଲ ଯାତ୍ରୀସଂଘ ଏବଂ ଗ୍ରାହକ ମଞ୍ଚ ଦୀର୍ଘ ଦିନଧରି ଏହି ସୁବିଧା ପାଇଁ ଅନୁରୋଧ କରିଆସୁଥିଲେ କାରଣ ଅଧିକାଂଶ ଏକ୍ସପ୍ରେସ୍ ଏବଂ ସୁପରଫାଷ୍ଟ ଟ୍ରେନ୍ ଭବାନୀପାଟଣାରେ କେବଳ କିଛି ମିନିଟ୍ ପାଇଁ ଅଟକିଥାଏ। ସାଧାରଣତଃ ୨୪ଟି କୋଚ୍ ବିଶିଷ୍ଟ ଟ୍ରେନଗୁଡ଼ିକ ସହିତ, ଯାତ୍ରୀମାନେ ବିଶେଷକରି ବୃଦ୍ଧ, ଭିନ୍ନକ୍ଷମ ଏବଂ ପିଲା ଥିବା ପରିବାର ପ୍ରାୟତଃ ସେମାନଙ୍କର ସଂରକ୍ଷିତ କୋଚ ଗୁଡ଼ିକକୁ ଶୀଘ୍ର ଖୋଜିବାରେ ଅସୁବିଧାର ସମ୍ମୁଖୀନ ହେଉଥିଲେ। କୋଚ୍ ଇଣ୍ଡିକେସନ୍ ବୋର୍ଡ (CIB) ସିଷ୍ଟମର ପ୍ରଚଳନ ଏହି ଅସୁବିଧାକୁ ବହୁତ କମ କରିବ ଏବଂ ସାମଗ୍ରିକ ଯାତ୍ରା ଅଭିଜ୍ଞତାକୁ ଉନ୍ନତ କରିବ ବୋଲି ଆଶା କରାଯାଉଛି।
ଭାରତୀୟ ରେଳବାଇର ଅମୃତ ଭାରତ ଯୋଜନା ଅଧୀନରେ ସମ୍ବଲପୁର ମଣ୍ଡଳ ଭବାନୀପାଟଣା ରେଳ ଷ୍ଟେସନର ଉନ୍ନତିକରଣ ପାଇଁ ବିଭିନ୍ନ ବିକାଶମୂଳକ କାର୍ଯ୍ୟ ମଧ୍ୟ କରୁଛି, ଯାହାର ଲକ୍ଷ୍ୟ ହେଉଛି ଏକ ଅଧିକ ଯାତ୍ରୀ-ଅନୁକୂଳ ଏବଂ ଆଧୁନିକ ଷ୍ଟେସନ ପରିବେଶ ସୃଷ୍ଟି କରିବା।
ବିଦ୍ୟାଧର ସାହୁଙ୍କ ରିପୋର୍ଟ….
