ହଷ୍ଟେଲ ପଙ୍ଖାରେ ଝୁଲି ଛାତ୍ରୀଙ୍କ ଆତ୍ମହତ୍ୟା । ଆତ୍ମହତ୍ୟାର କାରଣ ଅସ୍ପଷ୍ଟ
ହିଞ୍ଜିଳିକାଟୁ,୨୪/୬ ହିଞ୍ଜିଳିକାଟୁ ବ୍ଲକ୍ ତଥା ହିଞ୍ଜିଳି ଥାନା ଅନ୍ତର୍ଗତ ଗୋପିନାଥପୁର ଗ୍ରାମରେ ଥିବା ଆବାସିକ ବିଦ୍ୟାଳୟର ହଷ୍ଟେଲରେ ବୁଧବାର ଦିନ ଜଣେ ଛାତ୍ରୀ ଆତ୍ମହତ୍ୟା କରିଥିବାର ସୂଚନା ମିଳିଛି । ଛାତ୍ରୀ ଜଣକ ନିଜର ଓଢଣୀ ସାହାଯ୍ୟରେ ପଙ୍ଖାରେ ଝୁଲି ଆତ୍ମହତ୍ୟା କରିଥିବାର ଜଣାପଡ଼ିଛି । ତେବେ ଆତ୍ମହତ୍ୟାର କାରଣ ଅଶ୍ବଷ୍ଟ ରହିଥିବାବେଳେ ପୋଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ସୂଚନା ମୂତାକ ମୃତ ଛାତ୍ରୀ ଜଣକ ହେଲେ ବେଗୁନିଆପଡ଼ା ଥାନା ଅନ୍ତର୍ଗତ ତୋଟାପୋଡା ଗ୍ରାମର ବର୍ଷା ଦାସ (୧୪) ପିତା ସନ୍ତୋଷ କୁମାର ଦାସ । ପରିବାର ଲୋକଙ୍କ ଠାରୁ ଯାହା ସୂଚନା ମିଳିଛି ସେହି ଅନୁସାରେ ବର୍ଷା ୨ ବର୍ଷ ଧରି ସେହି ହଷ୍ଟେଲରେ ରହି ଆବାସିକ ବିଦ୍ୟାଳୟରେ ପାଠ ପଢୁଥିଲେ ଏବଂ ଚଳିତ ବର୍ଷ ନବମ ଶ୍ରେଣୀକୁ ଯାଇଥିଲେ । ଖରା ଦିନ ଛୁଟି ରହିଥିବାରୁ ସେ ଛୁଟି ରେ ନିଜ ଗ୍ରାମକୁ ଯାଇଥିଲେ । ଚଳିତ ମାସ ୨୨ ତାରିଖରୁ ରାଜ୍ୟରେ ସମସ୍ତ ବିଦ୍ୟାଳୟ କୁ ଖୋଲିଥିବା ବେଳେ ଖରା ଛୁଟି ସରିବା ପରେ ପରିବାର ଲୋକେ ଆଜି ବର୍ଷା ଙ୍କୁ ହଷ୍ଟେଲରେ ଛାଡି ନିଜ ଘରକୁ ଫେରିଥିଲେ । ଘରକୁ ଫେରିବାର କିଛି ଘଣ୍ଟା ପରେ ହଷ୍ଟେଲରୁ ପରିବାର ଲୋକଙ୍କୁ ଫୋନ ଆସିଥିଲା ଏବଂ ପରିବାର ଲୋକଙ୍କୁ ଏହି ଘଟଣା ବିଷୟରେ ଜଣାଇଥିଲେ । ପରିବାର ଲୋକେ ବର୍ଷାଙ୍କୁ ମେଡିକାଲରେ ଭର୍ତ୍ତି କରିବା ପାଇଁ ହଷ୍ଟେଲ କତୃପକ୍ଷଙ୍କୁ ନିବେଦନ କରିଥିଲେ । ସେ ଅନୁସାରେ ବର୍ଷାଙ୍କୁ ହିଞ୍ଜିଳି ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ସେଠାରେ ଡାକ୍ତର ବର୍ଷାଙ୍କୁ ମୃତ ଘୋଷଣା କରିଥିଲେ । ଅନ୍ୟ ପକ୍ଷରେ ହଷ୍ଟେଲ କତୃପକ୍ଷ ବର୍ଷା ଙ୍କୁ ବହୁ ସମୟ ବ୍ୟବଧାନ ପରେ ମେଡ଼ିକାଲ ରେ ଭର୍ତ୍ତି କରିଥିବା ନେଇ ଅଭିଯୋଗ ଆଣିଛନ୍ତି । ଖବର ପାଇ ହିଞ୍ଜିଳି ପୋଲିସ ଘଟଣାସ୍ଥଳରେ ପହଞ୍ଚି ମୃତ ଦେହକୁ ଜବତ କରିବା ସହ ଶବ ବ୍ୟବଛେଦ ପାଇଁ ଆସନ୍ତାକାଲି ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଯିବାର ସୂଚନା ମିଳିଛି । ତେବେ ଆତ୍ମହତ୍ୟାର କାରଣ ଅସ୍ପଷ୍ଟ ରହିଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିବାପରେ ଆତ୍ମହତ୍ୟାର କାରଣ ସ୍ପଷ୍ଟ ହୋଇପାରିବ ବୋଲି ପୋଲିସ ସୂତ୍ରରୁ ଜଣାପଡ଼ିଛି ।
